Hłowne wustawki přełoža
Chróšćanska gmejna wobdźěli so na wubědźowanju „Rěčam přichilena komuna“. Njedawno je wona wobydlerjow přeprosyła, zhromadnje za idejemi pytać. Što je při tym wuskočiło, wo tym je so Marian Wjeńka z wjesnjanostu Markom Klimanom (CDU) rozmołwjał.
Čehodla sće so rozsudźili, wobydlerjow na tajke zjawne zarjadowanje přeprosyć?
M. Kliman: Serbska rěč je w našej gmejnje prosće w zjawnosći žiwa. Wěmy drje, zo mamy w tym nastupanju jara dobry status. Přiwšěm widźimy hišće potencial, sej tu a tam něšto přidobyć. Mějachmy takrjec nadźiju, z wjele ludźimi wjele idejow znosyć. To bě naš wotpohlad.
A kajki bě wothłós mjez wobydlerjemi?
M. Kliman: Nul. Wězo je so naš kulturny wuběrk wobdźělił, to je jasna wěc. Ale z ludnosće tón wječor bohužel scyła nichtó přišoł njeje.
Je zajim za to mjez ludźimi tak snadny abo što je po Wašim měnjenju přičina, zo nichtó přišoł njeje.
Nic za wulku zjawnosć, ale za wjes
Miłoćicy (aha/SN). Do noweho měsaca podachu so Miłočenjo z třidnjowskim wjesnym swjedźenjom. Mjeztym zo mužojo pjatk wječor zhromadnje piwo natočichu a sej je tež słodźeć dachu, su žony skerje winowcej wotpowědowali a sej ze škleńčku wina připili.
Mjeztym 15. raz je Miłočanski młodźinski klub z podpěru wjesneho kluba wjesny swjedźeń přewjedł. Tomaš Rynč, předsyda młodźinskeho kluba, kiž ma tuchwilu dwanaće čłonow, je so znowa wo to postarał, zo wuhotuja swjedźeń za wšitke starobne skupiny wsy, nic pak za wulku šěroku zjawnosć. To pokaza so tež sobotu wječor, jako knježeše lóštna atmosfera w stanje na nawsy před wjesnej kupnicu. Tam předstajichu starši ze swojimi dźěćimi program, do kotrehož zapřijachu nimo wšelakich hrow tež wubědźowanje z wužadacymi nadawkami. Rjane při tym bě, zo wuńdźechu wšitcy wobdźělnicy jako dobyćerjo.
Rěki a hrjebje dyrbja so hdys a hdys wurjedźić, zo móhła woda po ...
Krótkopowěsće (02.10.17)
Ministerka wotstupiła
Drježdźany. Brunhild Kurth (CDU) je minjeny pjatk jako sakska statna ministerka za kultus wotstupiła. Kaž ministerstwo zdźěla, rjekny wona w rozmołwje z rěčnikom kultusa Dirkom Reelfsom: „Su to jeničce wosobinske přičiny, kotrež mje ke krokej pohnuwaja.“ Brunhild Kurth je zastojnstwo kultusoweje ministerki pjeć a poł lěta wukonjała.
Hladanje dźěći bóle spěchować
Budyšin. Němski zwjazk městow namołwja Zwjazk a kraje, hladanje dźěći bóle spěchować a so sylnišo na zawodnych kóštach pěstowarnjow wobdźělić. To je jedyn wuslědk pjatkowneje konferency 17 měšćanostow w Budyšinje. Dale sej komuny žadaja, zo měł Zwjazk masterski plan za „wutwar digitalneho kubłanja“ zdźěłać.
Łužiske imobilije požadane
Wojerecy. Lěkarski dom na Wojerowskej Hasy Ferdinanda von Schilla je předaty. Na awkciji w Berlinje wunjese twarjenje w bydlenskim kompleksu IX 475 000 eurow. Dalšej imobiliji bywšeho bliskozastaranskeho centruma stej za 38 000 eurow wobsedźerja měnjałoj, zdźěli Němska přesadźowanska towaršnosć. Štó je twarjenja kupił, njeje znate.
Policija (29.09.17)
W jastwje so paliło
Budyšin. K hašenju su wohnjowych wobornikow wčera wječor do Budyskeho jastwa wołali. Po informacijach policije bě tam młody muž z Lybiskeje swoju matracu zapalił. Dokelž alarmowa připrawa hnydom fungowaše, běchu wobornicy spěšnje na městnje a woheń zhašachu. 25lětneho Lybičana w chorowni zastarachu, wón pak bě dźensa rano zaso w jastwje. Zasadźenych bě pjeć wohnjowych woborow z jědnaće jězdźidłami.
Wobkuzłaca klasika
Dawki zwyšene
Dlěje hač dwaceći lět běchu sadźby za ležownostny dawk A a B w měsće Budyšinje konstantne. Na swojim posedźenju zawčerawšim su měšćanscy radźićeljo rozsudźili je zwyšić.
Budyšin (SN/MWj). Sadźby za ležownostny dawk A a B w městach a gmejnach njesłuži jenož tomu, zo bychu komuny dawkowe dochody měli. Po tychle sadźbach so tohorunja wobliči, kelko klučowych připokazanjow wone dóstanu. Za to rozsudne su tak mjenowane niwelěrowanske sadźby. Su-li sadźby města niše, so město wěsteje sumy klučowych připokazanjow wzda. W Budyšinje je to lětsa něhdźe 251 000 eurow. Tohodla je měšćanska rada na swojim srjedownym posedźenju wobzamknyła, sadźbu za ležownostny dawk A wot 300 na 310 procentow zběhnyć, sadźbu za ležownostny dawk B pak wot tuchwilu 380 na 420 procentow. Wobě sadźbje matej wot 1. januara 2018 płaćiwej być.
Zmije pušćeć a plincy jěsć
Smječkecy. Wšitke swójby z dźěćimi přeproša Smječkečanski wjesny klub njedźelu, 1. oktobra, na zhromadne zmijepušćenje. Zajimcy zetkaja so w 15 hodź. na łuce za Bjeńšec twarskim zawodom, potajkim ze Serbskopazličanskeho směra na prawym boku. Jako chłóšćenku wjesne žony plincy napjeku.
Poslednje wodźenje
Wojerecy. Pod hesłom „Z hrabju Hoyerom so wšitko započa“ wotměje so njedźelu, 1. oktobra, w 10 hodź. lětuše poslednje wodźenje po historiskim centrumje Wojerec. Start budźe při hrodźe. Wobdźělenje płaći pjeć eurow, potuńšene tři. Přizjewjenje trěbne njeje.
Wo serbskich wosebitostkach
Janšojce. Z wosebitostkami serbskeje Delnjeje Łužicy zaběra so přednošk 5. oktobra w 19 hodź. w Janšojskim Serbsko-němskim domizniskim muzeju.
při twarnišću
Wobchod wojuje wo přežiwjenje
Nowy móst nad Klóšterskej wodu a wutwar statneje dróhi S 100 w Pančicach-Kukowje stej tuchwilu z wotstawkom najwjetše nadróžne twarnišćo w dwurěčnych gmejnach. Z tejle seriju twarnišćo přewodźamy a wobswětlamy starosće tamnišich wobydlerjow.
Čas wulkeje hary na twarnišću wosrjedź Pančic-Kukowa, jako za tamniši nowy móst hłuboke dźěry točachu, je mjeztym dawno nimo. Hara je so tež za Elku Noack pominyła. Wona pak ma cyle hinaše starosće, a to hižo wot wšeho spočatka twarnišća. Elke Noack wjedźe w swójskim domje na Róžeńčanskim puću, dobre sto metrow wot twarnišća zdalene, kwětkowy wobchod. Mjeztym wobsteji tón 20 lět. Ale jubilej je sej wobchodnica zawěrno hinak předstajiła. „Twarnišćo so woprawdźe jara zlě wuskutkuje. Přerěznje mam jenož połojcu toho wobrota, kaž bě wón do toho, a tendenca je woteběraca“, Kukowčanka rozłožuje. Po jeje słowach móže wona tónle wupad poł lěta kompensować, potom pak budźe ćežko.
