Za měsac twarnišćo wopytać
Nutřkowny wutwar šulskeho kompleksa derje pokročuje
Slepo (AK/SN). Twar noweho Slepjanskeho němsko-serbskeho šulskeho kompleksa je dale w časowym a financnym planje. To zdźěli gmejnski twarski zamołwity Steffen Seidlich na wutornym posedźenju Slepjanskeje gmejnskeje rady. Srjedź měrca wobhladachu sej poskitki za wuhotowanje wšitkich rumnosćow a fachowych kabinetow. Za někotre jednotliwe losy pak dóstachu jenož jenički poskitk.
Nutřkowny wutwar mjeztym derje pokročuje. Tak su w zakładnej šuli lampy instalowane a wšitke wjerchi začinjene. Tuchwilu kładu špundowanja a zatwarjeja durje. We wyšej šuli dźěłaja molerjo a suchotwarcy. W sportowni montuja tepjenske promjenjaki. Poněčim tež wonkowne připrawy swoju doskónčnu formu dóstawaja. Ručež budźe parkowanišćo hotowe, chcedźa šulski dwór dotwarić. Nimo toho započnu cyły teren wozelenjeć. Spočatk tydźenja su hižo wulki dźěl štomow sadźeli. Zo je dźiwina skóncowała njeby, natwarichu sobudźěłaćerjo komunalneho twarskeho zawoda wosebity płót, z kotrymž twarnišćo před dźiwimi swinjemi škitaja.
Swójby pućuja
Policija (04.04.19)
Granaće we wjerchu namakali
Delni Wujězd. Zo při torhanju stareho twarjenja tu abo tamnu překwapjenku dožiwiš, njeje ničo njewšědneho. Předwčerawšim, wutoru, pak so w Delnim Wujězdźe tola chětro dźiwachu, jako běchu sobudźěłaćerjo twarskeje firmy w dodźeržanym domje při dźěle. W mjezywjerchu pod špundowanjom wuhladachu woni popołdnju dwě granaće, štož wobydler wězo policiji přizjewi. Rozbuchlinu wotstronjowaca słužba je namakance wotwjezła. Kaž Zhorjelska policajska direkcije rozprawja, běštej wonej wonkownje w dosć dobrym stawje. Nutřka w nimaj pak hižo žane rozbuchadło njebě. Na prašenje, štó bě granaće w Delnjowujězdźanskim domje něhdy schował a čehodla, pak najskerje hižo nichtó wotmołwić njemóže.
Na kěrchowje nowy porjad trěbny
Studenća Drježdźanskeje Techniskeje uniwersity běchu so z tym zaběrali, kak móhli w Chrósćicach kěrchow, fara ze zahrodu a Hatki za 20 do 30 lět wupadać. Wuslědki swojeje studije su woni předwčerawšim předstajili.
Chrósćicy (SN/MWj). Kěrchow wokoło Chróšćanskeje farskeje cyrkwje znowa rjadować je jedyn z namjetow studentow instituta za krajinowu architekturu Drježdźanskeje Techniskeje uniwersity. Něhdźe štyrceći zajimcam su woni wutoru na tamnišej farje rozłožili, kak móhło so to stać.
Běrokratija dobre ideje stajnje zaso haći
NaBudyšin (CS/SN). Kak dale z lěkarskim zastaranjom ludnosće na wuchodźe Sakskeje? Wo to dźěše tydźenja w Budyskim Serbskim domje. Zapósłanc SPD w Sakskim krajnym sejmje Harald Baumann-Hasske bě sej kompetentnych rozmołwnych partnerow na diskusiju přeprosył.
Předsyda zjednoćenstwa kasowych lěkarjow Sakskeje dr. Klaus Heckemann rozłoži, zo je „na papjerje“ wuchod Sakskeje z lěkarjemi runjewon žohnowany, zo pak woprawdźitosć cyle hinaša wupada. Runje we wjesnych kónčinach wšudźe lěkarjo pobrachuja. Porno tomu tójšto lěkarjow w rentowej starobje přeco hišće dale dźěła.
Gmejny rozsudźa wo serbskim popisanju zastanišćow
Budyšin/Drježdźany (SN/at). Wobchadnej zwjazkaj Hornje Łobjo (VVO) a Hornja Łužica-Delnja Šleska (ZVON) přihotujetej jednotny informaciski system za pasažěrow we wjesnych kónčinach po swojimaj dospołnymaj teritorijomaj zwonka krajneje stolicy Drježdźan.
W hornjołužiskim zjawnym wosobowym bliskowobchadźe je na zakładźe sakskeho serbskeho zakonja dwurěčne popisanje informaciskich taflow při zastanišćach zawjazujcy předwidźane. Projekt, kotryž swobodny stat z dawkowymi srědkami sobu financuje, je na to wusměrjeny, zastanišća jednotnje woznamjenić. Tak chcedźa pasažěram přisłušnosć zastanišća k wobchadnemu zwjazkej wuwědomić. Charakteristiske za to su jednotny tarif, jednotny sortiment jězdźenkow a jednotny jězbny plan.
Krótkopowěsće (04.04.19)
Wjace přemysłow wotzjewjenych
Kamjenc. Loni su w Sakskej znowa wjace přemysłow wot- hač přizjewili. Porno 26 741 přizjewjenjam mějachu 28 663 wotzjewjenjow. To zdźěla Kamjenski krajny zarjad za statistiku. Saldo wučinja minus 1 922. W lěće 2017 bě 1 750 wotzjewjenjow wjace hač přizjewjenjow. Přičina za nimale 83 procentow wotzjewjenych přemysłow bě złoženje wobchodniskich aktiwitow.
Přećiwo spěšnosći 30 km/h
Choćebuz. Předewzaćeljo w měsće Choćebuz wuprajeja so přećiwo spěšnosći 30 km/h a přećiwo zawrjenju Stareho torhošća. Wo wuslědku swójskeho naprašowanja je Choćebuska Industrijna a wikowanska komora dźensa informowała. Z naprašowanych 1 500 firmow je 733 wotmołwiło. 81 procentow z nich wobmjezowanu spěšnosć 30 km/h wotpokazuje.
Hnydomny program wuhla dla
Na wuprawje do Bretonskeje w Parisu pozastali
Quimper. Šulerjo 8. a 9. lětnika Worklečanskeje wyšeje šule „Michał Hórnik“ a chowancy 9. a 10. lětnika Budyskeho Serbskeho gymnazija su tuchwilu na wuměnje z bretonskimi šulerjemi w francoskim Quimperje. Na dołhu jězbu 1 700 kilometrow startowachu młodostni wčera tydźenja. Prjedy pak, hač dojědźe serbska delegacija k swojej partnerskej šuli w Bretonskej, pozasta wona dźeń po wotjězdźe a po nimale tysac kilometrach najprjedy w francoskej stolicy Parisu. Tam wobhladachu sej zajimawosće města, kaž na přikład Eiffelowu wěžu, katedralu Notre Dame, Luovre a pobychu w kofejowni z najlěpšim lodom Parisa.
Štwórtk přewjedźechu Budyšenjo a Worklečenjo z busom kołojězbu po francoskej stolicy. Popołdnju podachu so do Versaillesa, hdźež wobdźiwachu krasny hród a wulkotnu zahrodu. Wječor čakaše na šulerjow hišće wosebitosć. Smědźachu so na 286 metrow wysoke wuhladnišćo Eiffeloweje wěže podać a widźachu wottam krasny wječorny panorama Parisa.
Toča za móžny móst nad Sprjewju
Za dawnymi slědami pytane
Wotrowske hrodźišćo znowa wědomostnicy přepytowali
Wotrow (SN/MWj). Starodawne Wotrowske hrodźišćo respektiwnje jeho wokolne łuki běchu tele dny znowa městno archeologiskeho a geologiskeho přepytowanja. Wotdaloka widźane móhł sej čłowjek minjeny pjatk myslić, zo tam něchtó skłoniny podłu puća do směra na Kanecy na starodawne wašnje ratarsce wobdźěłuje. Dwukolesaty nastroj, kotryž Patrick Mertl tam a sem ćišćeše, dopominaše skerje na samopasleny grat, z kotrymž móhł čłowjek pódu wobdźěłać.
