Dalše wobzamknjenja trěbne

srjeda, 03. apryla 2019
artikl hódnoćić
(0 )

Zhorjelski krajnoradny zarjad budźe na městnje rozšěrjeny

Zhorjelc (AK/SN). Zhorjelski wokrjes koncentruje swoje zarjadnistwa a fachowe zarjady přichodnje bóle w Zhorjelcu. Jako centralne stejnišćo měł twarski kompleks při Berlinskej, Dwórnišćowej a Salomonowej hasy słužić. To podšmórny komornik Zhorjelskeho wokrjesa Thomas Gampe. „Zarjadaj za wobswět a krajměrjenje, kotrejž stej tuchwilu w Lubiju zaměstnjenej, so do Zhorjelca nawróćitej. W měsće samym pak stejnišćo Lunitz zawru, socialny zarjad a jobcenter so tuž přesydlitej. Tež porjadniski zarjad změje swój domicil na nowym stejnišću. Zachować pak chcedźa zamołwići strowotniski zarjad, kotryž wostanje na Reichertowej zaměstnjeny“, komornik wuswětla.

Na centralnym městnje maja tuchwilu 350 sobudźěłaćerjow, a ličba ma wo 380 dalšich rozrosć. Wonkowne stejnišća saněrować by přenaročne a předrohe było. Wokrjes by za to znajmjeńša 3,8 milionow eurow nałožić měł.

Najebać koncentraciju zarjadow chce wokrjes swoje stejnišća w Běłej Wodźe, Niskej, Lubiju a Žitawje zachować. „Předewšěm płaći to za wobłuki, kotrež wobydlerjo často trjebaja“, Thomas Gampe rozłožuje. „Chcemy wobydlerske běrowy zarjadować. Na mjenowanych městnosćach je předstajomne zapisowarnje za jězdźidła a jězbnu dowolnosć zarjadować. Tak móža sej wobydlerjo dołhe puće zalutować.“

Zhorjelski wokrjesny sejmik bě 29. měrca 2017 zakładnemu rozsudej přihłosował, bywši krajnoradny zarjad rozšěrić. Na to slědowaše architektne wubědźowanje, a kónc lěta 2017 bě dobyćer hižo jasny. Wokrjesny sejmik je jemu loni nadawk dał swój naćisk planować. Nětko maja radźićeljo wokrjesneho sejmika 9. meje twarski rozsud za přewostajenje swójskich srědkow wobzamknyć, za čož planuja dźesać milionow eurow. Cyłkowna suma twarskich kóštow hišće cyle jasna njeje. Dźakowano nowemu stejnišću móže wo­krjes podruž za dotalne objekty přichodnje zalutować. Tak nadźijeja so zamołwići jasnje mjeńšich kóštow wob­hospodarjenja.

Na centralnym stejnišću při Zhorjelskim dwórnišću ma zdobom podzemska garaža z něhdźe 120 městnami nastać. „To bě přeće města“, komornik Thomas Gampe wuzběhny. „My jako wokrjes chcemy to realizować a garažu potom tež wobhospodarjeć.“ Klětu chcedźa twarić započeć.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND