Hdyž hinak njeńdźe
Móhli sej změny předstajić
Krajny zličbowanski zarjad kritizuje wjelči management Swobodneho stata Sakskeje. Přisłušne ministerstwo přiznawa, zo wobsteji w tym nastupanju potencial optiměrowanja.
Rěčicy (UM/SN/JaW). W swojej rozprawje 2017 porokuje Sakski krajny zličbowanski zarjad tuchwilnu strukturu wjelčeho managementa swobodneho stata. Po měnjenju zarjada přewjele – mjenujcy jědnaće – wobdźělenych wobstatk wjelkow w Sakskej přepytuje a škita.
Wjelči management wopřijima tři hłowne wobłuki: slědźenje, zjawnostne dźěło a prewenciju škodow, jich posudźowanje a wotškódnjenje. Předewšěm poslednje wotbłyšćuje roztřěskanosć zamołwitosće. Za wobhladanje škodow su społnomócnjeni krajnoradneho zarjada zamołwići; kelko škody je nastało, posudźuje krajny zarjad za wobswět, ratarstwo a geologiju (LfULG); zarunanje škodow přewozmje krajna direkcija. Dale wobdźělene su mjez druhim statny zawod Sakski lěs, běrow Lupus, kontaktny běrow wjelčeho regiona a Zhorjelski Senckenbergski přirodowědny muzej.
Krótkopowěsće (25.10.17)
Piraća najtuńši byli
Praha. Čěska powěsćowa agentura čtk je nakłady kampanjow jednotliwych politiskich stron w njedawnych parlamentnych wólbach wozjewiła. Přeličene na jednoho zdobyteho wolerja wopokazachu so jako „najtuńši“ Piraća (58 centow za jedyn wolerski hłós). Dobyćer wólbow, hibanje ANO, wuda w tym zwisku 2,3 eura na wolerja a „najdróša“ strona TOP 09 samo 9,2 euraj.
George Young njebohi
Sydney. Wjelelětny manager skupiny AC/DC George Young je njedźelu w starobje 70 lět zemrěł. Starši bratr tohorunja w najwuspěšnišej hardrock-band hrajaceju Angusa a Malcolma bě mjez druhim zamołwity za organizaciju turnejow a nahrawanjow. Nimo toho skutkowaše jako producent a spěwytwórc.
Lipsk na „biblioteku lěta“
Lipsk. Sakske statne ministerstwo za wědomosć a wuměłstwo je zhromadnje z Němskim zwjazkom knihownjow wčera Wysoku šulu za hudźbu a dźiwadło „Felix Mendelssohn Bartholdy“ Lipsk jako „biblioteku lěta“ wuznamjenił. Mjez druhim mytowachu jeje sylnu inowaciju wosebje na polu digitalizacije. Myto je z 10 000 eurami dotěrowane.
Kehelerjo Sokoła podleželi
Policija (24.10.17)
Bencin z BMWja wotklumpali
Biskopicy. Paduši njekradnu ćěriwo jeno z nakładnych awtow, w nocy na njedźelu činjachu to w Biskopicach tež pola wosoboweho awta typa BMW. Po tym zo běchu wěko tanka namócnje wočinili, wotklumpachu 20 litrow bencina a načinichu tak dohromady 80 eurow škody.
Předstaja knihu
Budyšin. Nowu knihu Pawoła Roty „Z kameru a pisakom po Delanach“ předstaja štwórtk, 26. oktobra, w 19.30 hodź. w Budyskej Smolerjec kniharni. Zaměrnje a z wulkej přichilnosću je Pawoł Rota ze swojimi njeličomnymi přinoškami, powědkami a basnjemi w běhu lětdźesatkow Delanam w serbskim pismowstwje trajny pomnik stajił. Na knižnym předstajenju čitaja wurězki z jeho knihi. Awtor budźe přitomny.
Socialne poradźowanje
Hlinka. Zapósłanc Sakskeho krajneho sejma a prawiznik Hajko Kozel (Lěwica) přeproša pjatk, 27. oktobra, na darmotne socialne poradźowanje do rumnosćow „Stareje šule“ w Hlince (Cunnersdorf) w gmejnje Schönteichen. Zhromadnje z prawiznikom Gregorom Janikom, w socialnym prawje wosebje wobhonjenym, skići wón pomoc při rozrisanju problemow, kotrež so často w socialnych prašenjach jewja. Poradźowanje wotměje so wot 13 do 16 hodź.
Mjezynarodny flair w hosćencu
Klukš (HN/SN). Wot lětušeho swjedźenja Božeho spěća wobhospodarja 45lětny Madźar Attila Horváth něšto lět zawrjeny Klukšanski hosćenc, kotremuž je wón nowe žiwjenje zadychał. Ze swojej žiwjenskej towaršku, docentku za madźaršćinu a němčinu, bydli wón w Budyšinje. Tu zajimuje so wón jara za stawizny, kotrež wšak su z madźarskim kralom Matthiasom Corvinusom zwjazane.
Jónu zwóńk – stajnje zwóńk
Wo swojich dožiwjenjach w běhu nimale poł lětstotka jako zwóńk w najwjetšej simultanej cyrkwi Němskeje a jako sobudźěłaćer Budyskeho tachantstwa za najwšelakoriše nadawki je Handrij Njek wězo tójšto dožiwił. Njedawno wědźeše wón serbskich seniorow we wobłuku jich měsačneho zetkanja ze swojim fenomenalnym pomjatkom na něštožkuli dopomnić, štož běchu zdźěla tež sami dožiwili. Ze swojim šibałym wašnjom zamóže wón tež derje zabawjeć a někotružkuli zwažliwu naležnosć złahodźić. Byrnjež so po 47 lětach słužby loni do renty podał, „zaby wón na wuměnk hić“. Bydli dale na tachantstwje a spjelnja hišće kopicu nadawkow. Tak widźi w tymle powołanju swójske powołanje: jónu zwóńk – stajnje zwóńk.
Předpisy dźěło poćežuja
Zarjadnistwa gmejnow a zarjadniskeho zwjazka trjebaja dobry dorost
Róžant/Pančicy-Kukow (JK/SN). Jako je na minjenym posedźenju gmejnskeje rady Ralbicy-Róžant dotalny zastupowacy wjesnjanosta Tomaš Bjeńš próstwu, jeho z funkcije wotwolić, wopodstatnił, poda wón jako přičinu rozsuda mjez druhim njespokojace zarjadniske struktury a wobćežnosće w gmejnje kaž tež w zarjadniskim zwjazku Při Klóšterskej wodźe. W tym dypku staj jemu wjesnjanosta Hubertus Ryćer (CDU) kaž tež předsyda zarjadniskeho zwjazka Měrko Domaška přihłosowałoj.
Diskusija znowa rozpłomjeniła
Wo škiće wjelkow w Sakskej znowa wótrje diskutuja. Přičina je najmłódši podawk pozdatneho nadpada wjelka abo wjelkow pola Łazka. Wowčer Swen Šlafka bě tam předwčerawšim wjacore zahinjene wowcy našoł.
Łazk/Budyšin/Rěčicy (SN/JaW). Wjelki staraja so w Budyskim wokrjesu znowa wo wótre diskusije. Kaž mnohe regionalne medije, tež Serbske Nowiny, wčera hižo rozprawjachu, běchu njedźelu pola Łazka wjacore wowcy mortwe našli. „15 skoćatow bu morjenych, dalše hišće pytaja“, zdźěli wčera medijowy rěčnik krajnoradneho zarjada Gernot Schweitzer na naprašowanje SN. „Posudźowarjo njemóža wjelka jako skućićela wuzamknyć, byrnjež stadło z elektropłotom a předpisanym bantom škitane było“, Schweitzer rozjasni. Mortwe skoćata hromadu znosyć pomhachu njedźelu wowčerjej Swenej Šlafce, kotremuž stadło słuša, mnozy pomocnicy a wohnjowa wobora.
Krótkopowěsće (24.10.17)
Dalše spěchowanje
Drježdźany. Sakske statne ministerstwo za wědomosć a wuměłstwo (SMWK) chce wysoke šule a slědźerske zarjadnišća při próstwach wo spěchowanske programy Europskeje unije z přidatnym milionom eurow podpěrać. Za to je SMWK spěchowansku směrnicu EuProNet zdźěłało.
Realistiske rozestajenje trěbne
Choćebuz. Łužiska hospodarska iniciatiwa (WiL) kritizuje minjeny štwórtk wot organizacije AGORA energijowy přewrót wozjewjenu studiju „Přichod za Łužicu“ (SN rozprawjachu). Tam žadana lětna spěchowanska suma 100 milionow eurow njeje wjace hač kapka na horcy kamjeń. LEAG wšědnje 2,5 milionow eurow za nadawki a mzdy we Łužicy wudawa. Je trjeba so realistisce z tymle procesom rozestajeć, rěka ze stron WiL.
Za nowy młodźinski orchester
