Wokrjes chce přiwšěm twarić
Ponowjenje Kamjenskeju šulow pjenježnje hišće njerjadowane
Budyšin/Kamjenc (UM/SN). Přirjadnik Budyskeho krajneho rady Udo Wićaz sej to radšo předstajić nochce. Wón pak njemóže z wěstosću wuzamknyć, zo dojednanje ze Swobodnym statom Sakskej wo noworjadowanju dalewjeducych šulow w Kamjencu tola hišće zwrěšći. Přičina dilemy je, zo dyrbja zakonskich postajenjow dla plany za powjetšenje Lessingoweho gymnazija na Henselowej změnić, štož přidatne kóšty zawinuje. Tak žada sej šulski zakoń z lěta 2017 w zajimje inkluzije wjetše rjadowniske rumnosće, čehoždla dyrbja rumnostny program kubłanišća změnić. Twarsce njeje to žadyn problem, „je pak z přidatnymi srědkami hač do 20 procentow zwjazane“, praji přirjadnik krajneho rady Michaela Hariga (CDU). Swobodny stat drje je za cyłkowny kompleks wulkomyslne spěchowanje přewostajił, ale na zakładźe wobličenja z lěta 2015. „Za přidatne wudawki žane spěchowanje njepředleži.“ Njewotwisnje wot toho dyrbi wokrjes wjace swójskeho podźěla přewzać a jón do swojeho hospodarskeho plana zapisać.
Za zetkanje so přizjewić
Worklecy. Dekanatne dušepastyrstwo dźěći přeprosy šulerki a šulerjow 3. a 4. lětnika wutoru, 16. oktobra, wot 9 do 15 hodź. do Worklečanskeho Don Boskoweho domu. Tam chcedźa so ze swjedźenjom domchowanki zaběrać, sej zhromadnje a z wjeselom słódny nazymski meni zwarić a sej jón wězo słodźeć dać. Zajimcy njech přizjewja so hač do jutřišeho pjatka pod tel. čo. 035796/88 707 abo e-mailnje pod worklecy-kise@gmx. de. Za wudawki dnja zběraja wobdźělenski přinošk pjeć eurow.
Programěrować wuknyć
Wojerecy. Prózdninski poskitk za dźěći a młodostnych w starobje dźesać do 15 lět ma Wojerowski kompjuterowy muzej ZCOM jutře, pjatk, wot 15.30 do 18 hodź. Tam rozłoža, kak mikrokontrolery, kotrež su w nimale kóždym elektroniskim nastroju zatwarjene, funguja. Wobdźělnicy budu tajke kontrolery sami programěrować móc. Wobdźělenje je darmotne.
Policija (11.10.18)
Z rubiznu njespokojom był
Běła Woda. Wulkeje rubizny nadźijał bě so po wšěm zdaću 13lětny hólčec předwčerawšim w Běłej Wodźe. Tam bě wón na Zahrodowej po puću a hrabny sej z wočinjeneho transportera paket. Kedźbliwy swědk pak jeho při tym wobkedźbowaše a zawoła policiju. Wot swědka na padustwo narěčane, pakostnik wočinjeny paket mjeztym preč ćisny. Najskerje so jemu dźěćace gumijowe škórnje w nim lubili njejsu. Dźakowano swědkej móžachu paket skónčnje tola hišće prawemu adresatej posrědkować.
Na wulku wodu přihotowani
Tójšto twarskich projektow naraz tuchwilu w Bukečanskej gmejnje zmištruja. Někotre su samo stoprocentnje spěchowane, štož gmejnsku kasu chětro wolóža.
Bukecy (CS/SN). Wšón Něćin (Niethen) w Bukečanskej gmejnje je tuchwilu kaž twarnišćo. Po škodach wulkeje wody dla ponowjeja tam nětko dwaj mostaj, rjedźa rěčnišćo Koporčanki a saněruja puće. Dokelž jězdźidła móst na kromje wsy wužiwać njemóža, su hižo loni bywši ratarski puć tak zwuporjedźeli, zo dóstawaja so wobydlerjo do swojeje wsy ze směra Kołwaza (Kohlwesa). Někotři swoje jězdźidło tež na kromje wsy do směra na Pomorcy (Pommritz) wotstajeja. Za to maja tam improwizowane parkowanišćo. Móst pod Něćinskim hrodźišćom je nimale hotowy. Nětko dyrbja jenož hišće na woběmaj bokomaj puć přiměrić.
Katolska wosadna cyrkej w Kulowje dóstawa tuchwilu zdźěla nowe ...
Mostaj w gmejnje Sprjewiny Doł bórze hotowej
Drětwja/Sprjejcy (JoS/SN). Hižo nětko je spóznajomne, kak so nowy, tak mjenowany Kruwjacy móst w Drětwi (Zerre) do Srjewineje łučiny jónu zarjaduje. Turisća, kotřiž budu přichodnje po kolesowanskej šćežce po puću, nańdu tu potom zawěsće mnoho rjanych motiwow. Tola cyle tak daloko hišće njeje, wšako maja twarscy dźěłaćerjo hišće tójšto činić. Spočatk septembra su woni tam wulke nošaki noweho mosta na sćežory zmontowali a wot toho časa pilnje dale twarili. Zakładne betonowe dźěła su zakónčene, statikarjo běchu hižo na městnje a su za dalše postupowanje zelenu swěcu dali. Wčera a dźensa kidachu beton, kotryž bě ze zawoda KANN z bliskeje Dubrawy (Trattendorf).
Hižo spočatk tydźenja bě předewzaće beton za dalši móst w Sprjejcach (Spreewitz) zhotowił. „Tam mnozy na to čakaja, zo je skónčnje hotowy, zo móža zaso zwisk na wokrjesnu dróhu wužiwać. Tohodla wšak steji Kruwjacy móst na druhim městnje“, wuswětla nawoda Sprjewinodołskeho hłowneho zarjada Frank Fichtner. Stary móst nad Sprjewju dźě je dale wobjězdźomny.
Krótkopowěsće (11.10.18)
Start rakety zwrěšćił
Bajkonur. Wotlět ruskeje rakety k mjezynarodnej swětnišćowej staciji ISS je po informacijach ruskich medijow zwrěšćił. Kapsla rakety z dwěmaj kosmonawtomaj dyrbješe krótko po starće nuzowje přizemić. Wobaj kosmonawtaj staj njezranjenaj. Po prěnich informacijach bě druhi schodźenk ćěridła rakety zaprajił.
Myto pólskemu žurnalistej
Lipsk. Medijowa załožba Lipšćanskeje lutowarnje spožči lětsa pólskemu žurnalistej Tomaszej Piątekej Myto za swobodu a přichod medijow. Kaž załožba zdźěla, počesća Piąteka za kritiske wobkedźbowanje towaršnostneho wuwića w Pólskej. Myto w hódnoće 30 000 eurow spožča lutowarnja wot lěta 2001 předewšěm za zmužite a zaměrne zwoprawdźenje nowinarskeje swobody.
50 wowcow dale zhubjenych
Policija (10.10.18)
Pytaja swědkow
Budyšin. Policija pyta swědkow móžneho seksualneho nadpada, kotryž sta so zawčerawšim krótko do 19 hodź. w Budyskich Schillerowych zelenišćach. Tam bě so njeznaty 15lětnej holcy bližił a ju k zemi stłóčił. Jako młodostna wo pomoc wołaše, so wón do směra na Lubijsku dróhu zhubi. Holca so njezrani. Wona wopisuje muža jako korpulentneho a 30 do 40 lět stareho. Wón měješe krótke ćmowe włosy, zdrasćeny bě módre jeansy a ćmowy pjezl. Pokiwy přijimuja pod telefonowym čisłom 03581/ 468 100.
Spěchowanske towarstwo muzeja pola susodow
Podpěra za Budyski Serbski muzej čłonam jeho spěchowanskeho towarstwa zdobom woznamjenja, zwiski z druhimi muzejemi a kulturnymi institucijemi nawjazać. Tak podachu so čłonojo towarstwa minjenu sobotu do Libereca w susodnej Čěskej. We Wědomostnej knihowni Liberecskeho kraja nam jeje direktorka Blanka Konvalinková rozłoži, zo njewupožčuja jenož knihi, ale zo skutkuje biblioteka zdobom jako kulturne srjedźišćo města a wokoliny. Do domu je tež nowotwar synagogi zapřijaty, přetož w lěće 2001 zjawnosći přepodata biblioteka steji na městnje stareje synagogi, kotraž bu w nowembru 1938 zničena. Njedaloko njeje steješe mjeztym spotorhany hotel, słužacy 1949/1950 serbskim gymnaziastam jako internat.
Dale wopytachu čłonojo spěchowanskeho towarstwa Serbskeho muzeja wobrazowu galeriju „Lázně“. Ta je zaměstnjena w bywšej halowej kupjeli, dotwarjenej 1902 jako „Kaiser-Franz-Joseph II.-Bad“. Hač do 1980tych lět słužeše wona hišće jako zjawna kupjel. Direktor wustajenišća Jan Randáček rozprawješe nam wobšěrnje wo zajimawych stawiznach přetwara a wo wobrazowych zběrkach galerije.
Kritiske hłosy w Koblicach
Wokrjes a gmejna chcetej klětu zhromadnje twarski projekt zwoprawdźić
Koblicy (AK/SN). Hłowny puć w Koblicach pola Wulkich Ždźarow chce Budyski wokrjes klětu wobšěrnje wutwarić. W tym zwisku chce Łazowska gmejna tam wopłóčkowy kanal kłasć. Tomu je wčera wjetšina Łazowskeje gmejnskeje rady přihłosowała. Naprawa je nuznje trěbna, dokelž tam sylneho wobchada a špatneho puća dla wěstota zaručena njeje“, podšmórny wjesnjanosta Thomas Leberecht (CDU). Wobydlerjow běchu hižo loni wo projekće informowali. Tež woni jón witaja, wčera rěkaše.
Po dojednanju mjez wokrjesom Budyšin a gmejnu Łaz, kotrež ma so hišće podpisać, stara so wokrjes w dorěčenju z komunu wo twarske nadawki. Mjeztym zo wokrjes wšitke wudawki za wutwar puća, za móžnosće k přeprěčenju dróhi a za busowe zastanišćo přewozmje, zapłaći gmejna chódnik, wopłóčkowy kanal, wotwodźowanje dešćikoweje wody a nadróžne wobswětlenje.
