W prózdninach paslić
Łaz. We Łazowskim Domje Zejlerja a Smolerja móža prózdninske dźěći jutře, srjedu, paslić. Wot 9.30 do 11.30 hodź. nastanu tam z pomocu sobudźěłaćerjow biosferoweho rezerwata Hornjołužiska hola a haty kaž tež Łazowskeje gmejnskeje biblioteki nazymske dekoracije z přirodnych maćiznow. Nožicy, pisak a lěpk měł sej kóždy sam sobu přinjesć, nimo toho tři eura za material.
Neurobiologa přednošuje
Lipsk. Serbske blido Lipsk přeprosy pjatk, 19. oktobra, we 18 hodź. wšitkich zajimcow na přednošk neurobiologa dr. Jurja Brankačka do rumnosće 4.216 filologiskeje fakulty Lipšćanskeje uniwersity na Beethovenowej 15. Pod hesłom „Wědomosć je mjezynarodna – zaćišće z Japanskeje“ rozprawja dr. Brankačk wo swojim žiwjenju jako slědźer. Přizamknje so bjesada w kofejowni „Kowalski“ na Ferdinanda Rhodowej 12.
Mejenjo we Wrócławju byli
Na swojej hłownej zhromadźiznje spočatk lěta běchu spěwarki a spěwarjo Radworskeho chóra Meja wobzamkli, zo sej lětsa zaso zhromadnje wuleća. Po tym zo njeje so plan do Roma pućować zešlachćił, so rozsudźichu pólski Wrócław wopytać. A minjeny kónc tydźenja to činjachu.
Předsydstwo chóra z předsydku Angeliku Häneltowej na čole bě zhromadnje z Radworskim Šmitec busowym wozydłownistwom dosć wobšěrny program w štwórtym najwjetšim měsće susodneho kraja z něhdźe 630 000 wobydlerjemi zestajało. Na spočatku steješe wodźenje po měsće z wěcywustojnej pólskej přewodnicu, štož běše w někotrych hodźinach dosć naročne předewzaće. Při tym Mejenjo zhonichu, zo ma Wrócław wjace hač sto cyrkwjow. Najwjetši dźěl z nich dyrbjachu po Druhej swětowej wójnje znowa natwarić, dokelž bu 70 procentow města nad Wódru při wojowanjach mjez sowjetskimi wójskami a němskimi jednotkami kónc wójny zničenych.
W Klětnjanskim zawodźe Dietmara Bergmanna je minjenu sobotu něhdźe ...
Wjesne puće dóstanu mjena
Dobrošicy (aha/SN). Hižo před třomi lětami bě Njeswačanska gmejnska rada wobzamknyła, zo dyrbja puće we wšěch wjesnych dźělach gmejny pomjenowane a statoki z wotpowědnym domjacym čisłom wuhotowane być. Trjeba bě to tohodla, zo bychu nuzowa słužba, listonoš a docyła wšitcy podatu adresu spěšnje namakali. Wobydlerjow Dobrošic tehdy narěčachu, zo měli woni wo pomjenowanju swojich wjesnych pućow rozmyslować.
Krótkopowěsće (16.10.18)
Róčnica nastupa Jana Pawoła II.
Krakow. Předsyda Centruma Jana Pawoła II. „Njebojće so“ Jan Kabziński je składnostnje róčnicy nastupa Karola Wojtyły jako prěni słowjanski bamž dźensa před štyrceći lětami k tomu namołwjał, dale z jeho encyklikami so rozestajeć. W rozhłosu Jedynka Kabziński wuzběhny, zo njeměrja so wučby Jana Pawoła II. jenož na katolikow.
800 milionow eurow pokuty
Mnichow. Statne rěčnistwo w Mnichowje je awtotwarcej Audi w zwisku z dieselowej aferu pokutu 800 milionow eurow napołožiło. Audi, wotnožka awtotwarca VW, chłostanku akceptuje, kaž w zdźělence koncerna VW rěka. Přičiny pokuty su „ranjenja regulatoriskich předpisow“ pola wěsteje skupiny dieselowych agregatow, statne rěčnistwo piše.
Šěsć firmow tež ze Sakskeje
Pisany poskitk za cyłu swójbu był
Kombinacija ličbow a pismikow móže pomhać
Běła Woda (SN/MWj). Kak wunošne móže koděrowanje kolesow być, je policija nětko w Běłej Wodźe wobkrućene dóstała. Tam móžeše wona 36lětnemu mužej groćaneho konika wróćić, kotryž bu jemu něšto dnjow do toho pokradnjeny. Kedźbliwi wobydlerjo běchu policistow w Mužakowje na to skedźbnili, zo blisko Nysy samelutke koleso steji. A w bliskosći njebě nichtó, kotremuž móhło wone słušeć. Zastojnicy přepruwowachu najprjedy ramikowe čisło, pod kotrymž pak koleso jako pokradnjene přizjewjene njebě. Dokelž mějachu woni njedobre začuće, zwěsćichu z kombinaciju ličbow a pismikow kolesoweho koděrowanja muža, kiž bě slěbro-čerwjene koleso znački Giant něhdy registrować dał. Tón pak zdźěli, zo je je mjeztym w Běłej Wodźe dale předał. Tuž policisća tež noweho wobsedźerja wopytachu. 36lětny swoje koleso spózna a rjekny, zo bě je něchtó pokradnył. Policiji wón to hišće zdźělił njeje.
Policija (15.10.18)
Baterija so paliła
Kamjenc. W baterije produkowacym zawodźe na kromje Kamjenca wołachu wčera rano wohnjowu woboru, dokelž so tam jedna z baterijow paleše. Ju kontrolujo běchu do toho njedostatki zwěsćili a bateriju do składa połožili, hdźež pak so wona pozdźišo paleše. Pjeć sobudźěłaćerjow dowjezechu do chorownje, tamni dyrbjachu produkcisku halu nachwilnje wopušćić.
Zajimawostki ze studija
Kulow. Za kulisy filmowanja a telewizije pohladnyć móža zajimcy srjedu, 17. oktobra, w 14.30 hodź. na Kulowskim Starym dwórnišću we wobłuku popołdnja seniorow Křesćansko-socialneho kubłanskeho skutka. Martina Janus rozprawja tam wo Lipšćanskim studiju MDR.
Na serbsku rozmołwu
Drježdźany. Na wólnu bjesadu w maćernej rěči přeprošeja někotři Serbja, bydlacy w sakskej stolicy. Wona wotměje so štwórtk, 18. oktobra, wot 19 hodź. w hospodźe „Altes Wettbüro“ na Antonowej 8 (blisko dwórnišća Drježdźany-Nowe město). Wšitcy zajimcy, hornjo- abo delnjoserbšćinu rěčacy a wuknjacy, su na rozmołwu wutrobnje witani.
Porěči wo domjacych pawkach
Łaz. Kak su pawki žiwe, kak so zežiwjeja a kak wažne su, z tajkimi a dalšimi prašenjemi zaběra so přednošk zajutřišim, srjedu, 17. oktobra, we 18 hodź. we Łazowskim Domje Zejlerja a Smolerja. Referent budźe Wolfgang Kotisek, hobbyjowy fotograf a wjelelětny nawoda Serbskeho folklorneho ansambla Slepo.
Spjaty jězor póčnje so wuwiwać
Tež hdyž je w Budyskim spjatym jězoru tuchwilu chětro mało wody, je so tam něštožkuli na dobro změniło, z čimž chcedźa tež přichodny čas pokročować.
Budyšin (UM/SN). „Lěto 2018 bě woprawdźe wulkotne!“ Telko wopytowarjow kaž lětsa Matthias Schneider na sezonu hišće ženje zličił njeje. „Wězo je nam wulki nawal tež naše hranicy pokazał“, wuznawa mějićel bary Ocean Beach na promenadźe při Budyskim spjatym jězoru. Sćěh běštej mjenujcy dołhe čakanje a sčasami njespokojni hosćo. Tuchwilu woblubowany lokal wutwarjeja. Na městnje dotalneje drjewjaneje terasy nastawa betonowa, nimo toho Matthias Schneider nowu kuchnju zatwari.
