Přistaja dalšeho sobudźěłaćerja
Wudwor (AK/SN). W planowanej nowej bydlenskej štwórći při tankowni w Pančicach-Kukowje chce zaměrowy zwjazk za wopłóčki Při Klóšterskej wodźe (AZV) klětu a 2020 wopłóčkowe kanale kłasć. Tale inwesticija je zapisana do hospodarskeho plana za přichodne lěto, kotryž je hišće hač do 8. nowembra zjawnje wupołoženy.
Zaměrowy zwjazk liči klětu z dochodami 1,671 milionow a z wudawkami 1,663 milionow eurow. Přinošk zwjazkej přisłušacych gmejnow wostanje z dohromady 25 000 eurami konstantny. Z nim financuja te wudawki, kotrež njehodźa so na domjacnosće přepołožić. Po tuchwilnych předstawach ma klětu 8 510 eurow dobytka nastać. Jón chcedźa swojim rezerwam přirjadować.
Zo móhli wobstejace wodočisćernje optimalnišo hladać a trěbne reparatury spěšnišo přewjesć, chcedźa pjateho hladarja techniskich připrawow přistajić. Tak změje zaměrowy zwjazk za wopłóčki potom dźewjeć krutych přistajenych, z nich štyrjoch w zarjadnistwje. Personalne kóšty inkluziwnje socialne wotedawki maja klětu 540 000 eurow wučinjeć.
Zražka při awtodróhowej wotbóčce
Dróhotwar a wopłóčki
Gmejna wuda wjele pjenjez za planowanu nowu zakładnu šulu
Hodźij (CK/SN). Za hłubokotwarske dźěła planuje gmejna Hodźij klětu 947 000 eurow. Twarić chcedźa wjesny wopłóčkowy kanal w Debiškowje (Döbschke). Tež w Njezdašecach (Nedaschütz) stej nowy wopłóčkowy kanal a dróhotwarski projekt předwidźanej. To wuchadźa z naćiska hospodarskeho plana za 2019, z kotrymž je so gmejnska rada na swojim zašłym posedźenju zaběrała. W nim zapřijatych je 259 000 eurow, kotrež chcedźa takrjec přihotowane měć, móža-li ležownosć za nowotwar zakładneje šule kupić. Jako dochody planuja poł miliona eurow spěchowanskich srědkow, klučowe připokazanki Swobodneho stata Sakskeje a dróhotwarske přinoški wobydlerjow. Kaž wjesnjanosta Gerald Meyer (njestronjan) rozłoži, so sadźby za ležownostny a přemysłowy dawk klětu njezwyša. Dohromady steji pod smužku deficit 238 000 eurow. Přiwšěm płaći plan jako wurunany, dokelž jedna so při minusu wo wotpisanja za stare zamóženstwo.
Młoda hudźba na Romantice
Budyšin (SN/MWj). Wulke syły ludźi tłóčachu so zawčerawšim po Budyskich hasach. Za lětuši nakupowanski a dožiwjenski wječor Romantika běchu wonkowne wuměnjenja ze suchim a přijomnym wjedrom přewšo dobre. Wšo druhe bě Budyske nutřkoměšćanske towarstwo ze swojimi njeličomnymi partnerami wuběrnje spřihotowało: wobswětlene fasady, swěćace so hwězdy w štomach, widejowe animacije na wjacorych wěžach, młode holcy w frinkolacych kostimach, live-hudźba na hasach a w někotrych wobchodach, swěčki, smólnicy a lěhwowe wohenje atd.
Jedne ze srjedźišćow bě Póstowe naměsto před Serbskim domom. Tu měješe Radijo Satkula jewišćo natwarjene a poskićeše přihladowarjam młodu hudźbu. Tak wustupi z telewizijneho wusyłanja „The Voice kids“ znaty Gabriel Mommer. Wón njespěwaše jenož němsce a jendźelsce, ale tež jako premjeru swój serbski spěw, wšako ma z wowku Majku Kowarjec serbske korjenje. Dale připowědźi moderatorka Katka Pöpelec spěwarja Christopha Cyža. Nimo toho dožiwi serbski a němski publikum modowu přehladku tobołow z módroćišćom a Mühlmannec rejwansku šulu.
Krótkopowěsće (05.11.18)
Dźesać namjetow zapodatych
Budyšin. Dźesać wosobow ze serbskich zjednoćenstwow je zwólniwych kandidować za radu Załožby za serbski lud. Wo tym informuje Domowina, po tym zo je so doba zapodaća namjetow minjeny štwórtk skónčiła. Wólbna komisija namjety nětko pruwuje. Sakskich čłonow załožboweje rady wuzwoli Zwjazkowe předsydstwo Domowiny na swojim posedźenju 14. decembra w Chrósćicach.
Hižo 750 podpismow
Pančicy-Kukow. Po druhim tydźenju naprašowanja je skupina Kukowske prašaki hižo wjace hač 750 podpismow zezběrała. Z toho je so 713 Serbow přećiwo aktualnej formje Serbskeho sejma wuprajiło. Jeničce sydomatřicećo, něhdźe pjeć procentow, su za sejm hłosowali. Podpismowa akcija běži hač do kónca lěta. Wjacori zajimcy nawjazachu kontakt ke Kukowskim prašakam. Tež w Delnjej Łužicy přichodnje podpisma zběraja.
Za mnohotnosć w redakcijach
Serbski poskitk na Romantice
Budyšin. Na dožiwjenski a předawanski wječor Romantica sće jutře, sobotu, wot 16 hodź. do Budyšina přeprošeni. Mjez najwšelakorišimi poskitkami na naměstach, hasach a před wobchodami budu tohorunja serbske. Tak prezentuje na jewišću před Serbskim domom Radijo Satkula młodu serbsku hudźbu, mjez druhim z Gabrielom Mommerom a Christophom Cyžom. Dale budźe widźeć módro-běła modowa přehladka Dilians-tobołow. Přistupna budźe tohorunja Serbska kulturna informacija.
Informuja wo spěšnej syći
Radwor. Informaciske zarjadowanje wo wutwarje šěrokopasmoweje syće přewjedźe Telekom póndźelu, 5. nowembra, w Radworskim hosćencu „Meja“. W 17 hodź. su wobydlerjo Radworskeje gmejny přeprošeni, we 18 hodź. zajimcy z Njeswačanskeje gmejny.
W stolicy serbować
Policija (02.11.18)
Zastojnikam ćeknył
Kubšicy. Wosobowe awto typa Toyota Auris je wobsadce policajskeho awta minjenu wutoru něhdźe w 22.30 hodź. w Kubšicach napadnyło. Jako chcychu zastojnicy jězdźidło z Drježdźanskim čisłom kontrolować, stupi šofer na płun a ćekny. Policisća přesćěhachu jeho přez Sowrjecy (Soritz), Rachlow a dale do směra na Brězow (Blösa). Pozdźišo wuhladachu awto při Kubšiskim zastanišću železnicy. Šofer pak bě so mjeztym zminył.
Miła nazyma dobra za wiki
Wotnožki dźěłoweho zarjada najprjedy raz njezawru
Budyšin (CK/SN). W Hornjej Łužicy bě kónc oktobra 17 862 ludźi jako bjezdźěłnych registrowanych. To je 401 mjenje hač měsac do toho a 1 509 mjenje hač w samsnym času loni. Demografiski faktor drje wažnu rólu hraje, „ale wjele ludźi je tež nowe dźěłowe městno namakało“, rjekny tele dny šef Budyskeje agentury za dźěło Thomas Berndt. „Za tuchwilny počas překwapja, zo je bjezdźěłnosć w oktobrje dale woteběrała“, wón rozłoži. Dźakowano miłej a rjanej nazymje ma wjele předewzaćow we wot wjedra wotwisnych branšach kaž twarstwje abo zahrodnistwje tež nětko hišće tójšto dźěła.
We wuchodnej Sakskej je 4 707 swobodnych dźěłowych městnow, nimale wšitke z winowatostnym socialnym zawěsćenjom. Najwjace městnow maja we wobłuku dźěła na čas, ale z 969 swobodnymi městnami je jich mjeztym nimale runje telko w předźěłacym přemysle. Při tym je dźeń a ćešo kmanych fachowocw namakać. W někotrych branšach traje to mjeztym hač do 250 dnjow, Thomas Berndt měnješe.
Dopominaja na měrliwu rewoluciju
Wojerecy (UH/SN). 9. oktobra 1989 je wjace hač 70 000 ludźi w Lipsku přećiwo diktaturje SED demonstrowało, štož bě rozsudny krok za politiski přewrót w NDR a skónčnje za znowazjednoćenje. Wot toho časa je 9. oktober jako „dźeń měrliweje rewolucije“ centralny termin dopomnjeća na tehdyše towaršnostne změny. Tež we Wojerecach po wobzamknjenju měšćanskeje rady wot lěta 2008 stajnje kónc oktobra w radnicy z najwšelakorišimi wustajeńcami na historiski podawk dopominaja. Minjenu wutoru je wyši měšćanosta Stefan Skora (CDU) dalšu přehladku wo temje wotewrěł.
