Policija (07.05.19)
Paduchow cigaretow lepili
Wojerecy. Kedźbliwa wobydlerka měješe w nocy na njedźelu rozsudny tip, zo móžeše policija we Wojerecach młodeju muži zajeć. Wonaj běštaj na Budyskej dróze cigaretowy awtomat rozbuchnyłoj a z njeho pjenjezy kaž tež cigarety pokradnyłoj. Jako alarmowani policisća přijědźechu, zwěsćichu w bliskosći podhladneju, kotrajž wopisanju swědki wotpowědowaštaj. Muži w starobje 19 a 27 lět nachwilnje zajachu, na rewěrje wonaj swój njeskutk přiznaštaj. Za njón wužiwaštaj zakazanu pyrotechniku. Pola skućićelow namakachu tež pjenježnu kasetu a pokradnjene cigarety.
Hotel hišće torhać njemóža
Nakupowanišćo w sprjewinym měsće chce wobsedźer powjetšić
Budyšin (CS/SN). Před rozwalinu bywšeho hotela „Husarenhof“, z kotrehož měješe dom za ćěkancow nastać, prjedy hač so wón wotpali, leža roły a dalše twaršćizny. To pak njezwisuje z twarskimi dźěłami na twarjenju, kaž bě tele dny na wobydlerskim forumje zhonić. Roły su přihotowane za wutwar hasy Při rězarni (Schlachthofstr.), kotraž je hižo zawrjena. Tam kaž tež pozdźišo na Naměsće Käthy Kollwitz a na Löhrowej bórze wjace hač 100 lět stare wopłóčkowe kanale wuměnja. Tež puće budu dospołnje ponowjene. Do nich kładu tohorunja wodowód, płunowód a roły za dalnoćopłotu. Twarnišćo ma 27. septembra hotowe być.
Napjeće čakachu wobydlerjo bydlenskeje štwórće na žurli njewotwisneho zwjazka seniorow na wuprajenje Jensa Säuricha z firmy Säurich und Sassenscheid, kotrejž teren Husarenhofa słuša, na jeho wuprajenja, kak ma z nakupowanišćom Husarenhof dale hić. Po jeho słowach ma so płonina kompleksa wo nimale 3 000 kwadratnych metrow rozšěrić, dokelž chcedźa so Edeka, Aldi a Rossmann powjetšić.
Maja nowe hašenske jězdźidło
Njebjelčicy (jl/SN). Runje na dnju swjateho Floriana, patrona wobornikow, dachu Njebjelčanscy wobornicy minjenu sobotu swoje nowe hašenske jězdźidło poswjećić. Swjatočnosć přewjedł je wosadny farar Michał Nawka.
28 aktiwnych kameradow dyrbješe sej nowe awto wobstarać, dokelž stare hižo za hašenje kmane njebě. Wobornicy běchu so hižo dwě lěće wo nowe awto prócowali. Dokelž njebě hinašeho wupuća, rozsudźichu so za njewšědny krok a swoje stare awto wot lońšeho junija hižo wužiwali njejsu, tak zo njeběchu zasadźomni. Wuslědk bě, zo měješe so gmejna wo nowe jězdźidło starać. Najwjetši problem při tym bě, spěšnje tajke namakać. Bychu-li pak na dospołnje nowym awće wobstali, by to najskerje dwě abo tři lěta trało. Telko chwile wězo njemějachu. Zo bychu wohnjoškit w gmejnje zaso zaručili, rozsudźichu so za trjebane awto a kupichu sej je loni spočatk nowembra pola wikowarja w durinskim Nordhausenje.
Třěchu Chróšćanskeje cyrkwje su dźensa rano ponowjeć započeli. ...
Krótkopowěsće (07.05.19)
Busowi šoferojo znowa stawkuja
Budyšin. Dalšeho warnowanskeho stawka dla wostanu tež busy tzwr Regionalbus Hornja Łužica jutře, srjedu, wot ranja w dwěmaj 24 hodźin w depoće. Wot namołwy dźěłarnistwa ver.di potrjecheny je linijowy kaž tež šulerski wobchad. Dźěłarnistwo wojuje wo jasny přirost mzdy. W dotalnych třoch jednanjach njejsu so dźěłodawarjo a ver.di zbližić móhli. Štwórtk rozmołwy dale du.
Volker Braun wosomdźesatnik
Drježdźany. Sakska akademija wuměłstwow je w Berlinje bydlaceho spisowaćela Volkera Brauna k jeho wosomdźesaćinam jako časoweho swědka a chronista hódnoćiła. Rodźeny Drježdźanjan je čas žiwjenja do woprawdźitosće zapřimnył, rjekny prezident Holk Freytag wčera w sakskej krajnej stolicy. Braun, kiž słuša k najwažnišim němsko-němskim spisowaćelam powójnskeje doby, narodźi so 7. meje 1939 w Drježdźanach.
Akciski tydźeń zahajeny
Policija (06.05.19)
Meju podrězali
Worklecy. Rjany nałožk mejemjetanja něchtó Worklečanskim šulerjam najskerje zawidźi. Na dworje šule dyrbjachu sobotu připołdnju zwěsćić, zo běchu tam njeznaći w nocy do toho meju podrězali. To rozprawja policajska direkcija. Wěcnu škodu trochuja na něhdźe 150 eurow.
Dopominaja so na 600lětne stawizny
Porěči wo insektach
Stróža. Swět insektow w Hornjej Łužicy je tema přednoška rangera w biosferowym rezerwaće Hornjołužiska hola a haty Marija Trampenauwa zajutřišim, 8. meje, w 19 hodź. w Stróžanskim Domje tysac hatow. Trampenau porěči mjez druhim wo tym, kak so změna klimy na wobstatk překasancow wuskutkuje. Zastup płaći dwaj euraj.
Serbske blido w stolicy
Berlin. Přichodne Serbske blido w Berlinje budźe štwórtk, 9. meje, w 16 hodź. w hosćencu EINSTEIN KAFFEE na Friedrichowej 206. Hosćenc je direktnje pódla bywšeho namjezneho přechoda Checkpoint Charlie. Štóž ma lóšt a chwile, na měsačnych zetkanjach k hajenju maćeršćiny w cuzbje so wobdźěleć, je wutrobnje witany.
Hoyspoty derje wužiwane
Wojerecy (SN). Něhdźe dwaj měsacaj su we Wojerecach a pjeć měšćanskich dźělach tak mjenowane Hoyspoty přizamknjene. Takle mjenuja tam městna, hdźež móžeš mobilnje a darmotnje do interneta. Prěnje statistiske wuhódnoćenje pokazuje, zo wobydlerjo a hosćo tule móžnosć rady wužiwaja.
Njezadźiwa, tak rěka w zdźělence města, zo ludźo poskitk najčasćišo na Łužiskim naměsće a na torhošću před radnicu trjebaja. Derje přiwzaty je tohorunja Hoyspot na naměsće před dwórnišćom, předewšěm wot pućowacych a šulerjow. W pjeć měšćanskich dźělach widźa porno tomu hišće rezerwy, při čimž při Krabatowym młynje w Čornym Chołmcu wobstajny přirost zwěsćeja. Mjeztym zo registrowachu tam jutry wšědnje něhdźe 30 wužiwarjow, drje budźe jich přichodnje za čas turistiskeje sezony wjace. Dźewjeć Hoyspotow wužiwa wšědnje dohromady něhdźe 200 ludźi, štož wobhladuje měšćanske zarjadnistwo jako pozitiwne wuwiće. Najwjetšu ličbu zwěsćichu 18. apryla. Na tym dnju je 273 wosobow internetny serwis trjebało.
Klětu wuknjacy přećahnu
Twar Slepjanskeho šulskeho kompleksa w časowym a pjenježnym ramiku
Slepo (AK/SN). Na dnju wotewrjeneho twarnišća su sej sobotu w Slepom mnozy zajimcy nastawacy němsko-serbski šulski centrum wobhladali. „Smy w časowym a pjenježnym ramiku“, zjima Annett Dreißig, kotraž je ze stron gmejny za projekt zamołwita.
Nowe kubłanišćo nastawa na 54 000 kwadratnych metrach. 80 procentow wšěch dźěłow dyrbjachu po wšej Europje wupisać. Runočasnje k nutřkownemu wuhotowanju zakładneje a wyšeje šule kaž tež horta, biblioteki a sportownje nastawaja wonkowne připrawy. Tak změje sportnišćo 400metrowskej běhanskej čarje, připrawje za kulostork a dalokoskok, wolejbulnišćo a gymnastisku łuku. 12. decembra ma šulski centrum hotowy być. Potom měsac dołho wšitko přepruwuja. W zymskich prózdninach 2020 wuknjacy zakładneje a wyšeje šule přećahnu.
