Při nowowuhotowanju zachodneho wobłuka Mužakowskeho noweho hrodu móže so krajinowy architekt Holger Rothamel (nalěwo) cyle na swoju fantaziju spušćeć. Tule wón ničo historiskeho njeponowja, ale twori něšto noweho. Mjez druhim chcedźa hač do tři metry wysoke kerki nasadźeć. Za to André Großmann (naprawo) a jeho sobudźěłaćerjo z Pückleroweje załožby tuchwilu­ zemju přihotuja, štož ma do prěnjeho zmjerzka hotowe być. Foto: Joachim Rjela

Krótkopowěsće (09.11.17)

štwórtk, 09. nowembera 2017 spisane wot:

Wo Serbach so wobhonili

Budyšin. Wobdźělnicy tydźenskeho seminara Berlinskeho Goethoweho instituta su so wčera w Budyšinje wo aktualnym połoženju Serbow wobhonili. Zastupjerjo jědnaće němskorěčnych mjeńšin wuchodneje Europy a Azije wopytachu Domowinu, Serbski institut a Serbski muzej. Seminar słuži tomu, zo bychu němskorěčne mjeńšiny mjezsobne styki nawjazali a wušo hromadźe dźěłali.

Z Blunjom a Chrjebju-Nowej Wsu

Drježdźany. Tři hornjołužiske wsy – Bluń a Wjernarjecy w Budyskim kaž tež Chrjebja-Nowa Wjes w Zhorjelskim wo­krjesu – wobdźěla so na přichodnym kole 10. sakskeho krajneho wurisanja „Naša wjes ma přichod“. Dohromady 13 sakskich wsow wojuje nětko wo městnje za zwjazkowe wubědźowanje, kaž krajny zarjad za wobswět informuje.

Třinabožinska pěstowarnja

Swójbna atmosfera ke kermuši

srjeda, 08. nowembera 2017 spisane wot:
W swojim wjesnym klubje su so Smječkečenjo minjenu sobotu ke kermušnym rejam­ zetkali. Byrnjež to poměrnje mały swjedźeń był, bě žurla z něhdźe 40 hosćimi derje pjelnjena, tak zo knježeše swójbna atmosfera. Přisporjał je ju Syman Donat z Chrósćic, kiž hudźeše a spěwaše spodobne šlagry kaž tež popowe title. Wot někotrych hospozow zwarjena wječer a wuběr najwšelakorich cocktailow drje byštej tón wječor někotrym hosćencam abo baram konkurenca byłoj. Foto: Alena Pašcyna

Policija (08.11.17)

srjeda, 08. nowembera 2017 spisane wot:

Sam sebje zranił

Bjerwałd. Po swójbnym rozestajenju je 33lětny muž zawčerawšim popołdnju w Bjerwałdźe tež policiju zaběrał. Za­zwoni nuzowe čisło a prašeše so za lěkarjom. Jako wobsadka policajskeho awta tam přijědźe, pokaza wón zastojnikam sekeru kaž tež trašawku a so nadobo z no­žom sam zrani. Jeno z pomocu popjerjoweho sprayja móžachu jeho přewinyć. Při alkomatowym tesće naměrichu pola njeho 4,18 promilow alkohola w kreji. Lěkarsku­ pomoc pak muž wotpokaza.

Wobornicy dóstanu nowe awto

srjeda, 08. nowembera 2017 spisane wot:
Bukecy (CS/SN). Kameradow transportowace wohnjowoborne jězdźidło za Błócansku dobrowólnu wohnjowu woboru bě jedna z temow na zašłym posedźenju Bukečanskeje gmejnskeje trady. Po woh­njowobornym planje je awto nuznje trěbne. Tuž bě gmejna štyri awtowe domy wo poskitk prosyła. Jako najpřihódniši wukopa so tón domoródneho Voigtec awtoweho domu. Jeho wobsedźer Thomas Voigt je sam čłon gmejnskeje rady a njesmědźeše tuž zajatosće dla sobu wothłosować. Wšitcy tamni radźićeljo běchu za to, jězdźidło za 68 000 eurow kupić. Z nim móže přichodnje šěsć kameradow k městnu wohenja abo njezboža jěć. ­Dźakowano jeho wosebitemu wuhotowanju móža wobornicy nowe awto tež jako zasadźensku centralu na městnje wužiwać. Nimo toho wobsahuje wone modernu techniku k wobswětlenju. Ze swojim 140 PS sylnym motorom móže­ wohnjowoborne jězdźidło tež připowěšak ćahnyć.

Radźićeljo so zetkaja

srjeda, 08. nowembera 2017 spisane wot:

Kašecy. Njewšědnje wobšěrny je dnjowy porjad posedźenja gmejnskeje rady Pančicy-Kukow jutře, štwórtk, w 19 hodź. w Kaščanskim wjacezaměrowym twarjenju. Sobu najzajimawši dypk drje budźe, zo chcedźa radźićeljo planować započeć, kak bywši hosćenc wosrjedź Pančic-Kukowa spotorhać a ležownosć zrunać. Dale maja radźićeljo rozdawać planowanske dźěła za přetwar domu za Pančičanskej pěstowarnju na hort a za saněrowanje wjesneho puća w Kanecach.

Worklecy. Porno tomu runjewon skromny je dnjowy porjad posedźenja Wor­klečanskich radźićelow jutře wječor w samsnym času na tamnišej wyšej šuli. Tam zaběraja so ze zahajenskej bilancu gmejny a z priwatnymaj twarskimaj naležnosćomaj. Wjesnjanosta poda někotre dalše informacije.

Chrósćicy. Zahajenska bilanca budźe tež tema­ na posedźenju Chróšćanskeje gmejnskeje rady jutře w 19.30 hodź. w gmejnskej sydarni. Nimo toho chcedźa tam nadawki za nakup wohnjowobor­neje potrjeby přepodać. W nje­zjawnym dźělu­ zaběraja so radźićeljo z popłatkami za wjacezaměrowu halu „Jednota“.

Wuskich poměrow dla jednać

srjeda, 08. nowembera 2017 spisane wot:

Staršiska přirada pěstowarnje „Krabat“ chce polěpšenja docpěć

Wojerecy (AK/SN). Čornochołmčanske dźěćace dnjowe přebywanišćo „Krabat“ trjeba nuznje lěpše wuměnjenja. Tole žadachu sej starši na zašłym posedźenju Wojerowskeje měšćanskeje rady. „W našej pěstowarni je jara wusko. Rozdźělenje rumnosćow w twarjenju je chětro kućikate“, rozłoži Susann Sellge ze staršiskeje rady. „Dokelž su w samsnym twarjenju priwatni podružnicy kaž tež zubnolěkarska praksa, chodźa dźěći po zjawnej chódbje do pěstowarnje. Na dlěši čas njeje to žane rozumne rozrisanje“, praji rěčnica staršich.

Běrnowy swjedźeń w Droždźiju pola Bukec je lěto a woblubowaniši, kaž so minjenu njedźelu znowa wopokaza. Wopytowarjo móžachu tam wšelake družiny běrnow woptać, mjez nimi tež nowe. Čłonojo domizniskeho towarstwa změšachu z nich słódne solotje a zwarichu poliwki a dalše jědźe. Dźěći so tule pospytachu, kak běchu něhdy běrny myli. Foto: Carmen Schumann

Dalši wandrowski so na puć nastajił

srjeda, 08. nowembera 2017 spisane wot:
Młodostni z Radworja a Kamjeneje su so zawčerawšim popołdnju ze swojim přećelom Bobowom, kotryž rěka z byrgarskim mjenom Bosćij Wencl (naprawo) rozžohnowali. Kamjenjan je po Chróšćanu Francu Čornaku dalši Serb, kiž so na wandrowstwo poda. Wjelelětneho čłona a předsydu Radworskeho młodźinskeho kluba přewodźachu młodostni a dalši wandrowscy na kromu wsy, hdźež měješe po tradiciji wjesnu taflu přelězć. Tři lěta njesmě so wón nětko mjenje hač 50 km swojej ródnej wsy bližić. Tež Serbske Nowiny přeja Bosćijej Wenclej wšitko najlěpše, krutu strowotu, wulkotne dožiwjenja a mnohich přećelow. Foto: Tobias Wencl

RAA Wojerecy mytowane

srjeda, 08. nowembera 2017 spisane wot:

Drježdźany/Wojerecy (SN/MiR). Regionalne dźěłanišćo za kubłanje, demokratiju a žiwjenske perspektiwy (RAA) Wojerecy/wuchodna Sakska z.t. a RAA Sakska stej lětušej hłownej dobyćerjej Sakskeho spěchowanskeho myta za demokratiju 2017, kotrež je z 5 000 eurami dotěrowane. Nimo njeju bu komunje Meerane njedotěrowane myto přepodate, dalše štyri projekty wuznamjenichu z 1 000 eurami mytowanskeho pjenjeza. Myto hódnoći inowatiwne projektowe přikłady z ciwilneje towaršnosće a zmužity angažement komunow. Załožba Amadeu Antonio zhromadnje z dalšimi wot lěta 2007 mjenowane myto spožča.

Anetta Kahane, nawodnica předsydstwa załožby, je myta póndźelu na swjedźenskim zarjadowanju w Drježdźanskej Statnej opereće přepodała. Přitomny bě tež sakski statny minister za hospodarstwo a wobchad Martin Dulig (SPD), patron zarjadowanja.

Serbska debata

nowostki LND