Krótkopowěsće (08.07.19)
Dalše kulturne namrěwstwo
Drježdźany/Baku. W Sakskej mamy dalše swětowe kulturne namrěwstwo. UNESCO je serbsko-čěsku historisku hórnisku kónčinu Rudne horiny-Krušnohoří na sobotnym posedźenju w azerbajdźanskej stolicy Bakuwje do lisćiny škitahódneho namrěwstwa swěta přiwzała. Region běštej wobaj krajej namjetowałoj. Delegaća mjenowachu jón „mištersku twórbu čłowjeskeje kreatiwity“.
Putaca wustajeńca wotewrjena
Dobri Ług. Přichodne lěta ma wosebita wustajeńca w muzeju na hrodźe Dobri Ług (Doberlug) zajimcow přiwabić. Pórclin z Berlinskich zběrkow swědči wo srjedźoeuropskich kulturnych stawiznach. Braniborska kulturna statna sekretarka Ulrike Gutheil (SPD) je ekspoziciju wčera we wobłuku lětnjeho braniborsko-sakskeho zetkanja pod hesłom „Kryjemy taflu“ wotewrěła.
Lětanišćo za južnu Čěsku
Policija (05.07.19)
Woheń na polu zapalili?
Čelchow. Z wohenjom na žitnišću pola Čelchowa (Zschillichau) zaběra so nětko kriminalna policija. Woheń, kiž je so wutoru na płoninu 500 króć 150 metrow rozpřestrěł, bě po wšěm zdaću něchtó zamiškrił. Tohodla pytaja nětko za pokiwami z wobydlerstwa. Komuž je něšto podhladne napadnyło abo štóž je podhladne wosoby wobkedźbował, njech přizjewi so pod telefonowym čisłom 03591/ 35 60.
W prózdninach do muzeja
Budyšin. „Wobrazy krajiny“ rěka prózdninski program, kotryž Budyski Serbski muzeju přichodne tydźenje wjacekróć poskića. Wobdźělnicy zbliža sej wosebitu wustajeńcu a zhonja, čehodla je so naša domizna změniła, što je brunica a za čo so wužiwa. Skónčnje budu sami z wuhlom wobraz rysować. Prěni termin je wutoru, 9. julija, wot 13 do 14.30 hodź. Muzej prosy wo přizjewjenje pod telefonowym čisłom 03591/ 270 87 00.
Z wyšim měšćanostu rěčeć
Mały Wjelkow. Wobydlerski forum za Wulki Wjelkow, Mały Wjelkow, Zajdow, Ćemjercy a Lubochow wotměje so wutoru, 9. julija, w 19 hodź. w Małowjelkowskej hladarni Dora Schmitt. Wyši měšćanosta Budyšina Alexander Ahrens a zastupjerjo policije a mobilneho młodźinskeho dźěła budu na prašenja wotmołwjeć.
Stare awta k jubilejej přijěli
Chcedźa wuspěch wospjetować
Lětuša bičwolejbulowa tura Radija Satkula je so minjenu póndźelu zahajiła. Hač do kónca awgusta so mustwa na dohromady dźewjeć stacijach wubědźuja. W małej seriji tule jednotliwe hrajnišća předstajamy.
Njebjelčicy (SN/pdź). Njebjelčanski młodźinski klub je w prěnim rjedźe za to znaty, zo gmejnske a wosadne swjedźenje we wsy sobu wuhotuje. Wot lońšeho wobohaćeja młodostni přidatnje hišće bičwolejbulowu turu Radija Satkula. „Do toho njebě to nažel móžno“, powěda čłon młodźinskeho kluba Paul Deleńk. „Naše bičwolejbulnišćo běše w tak hubjenym stawje, zo njemóžachmy sej žane mustwa přeprosyć.“ Z tajkimi wuměnjenjemi pak nochcychu so młodostni dołhodobnje wotnamakać. Tohodla su zhromadnje z gmejnu a ze Sportowej jednotku Njebjelčicy wo tym wuradźowali, kak móhli stare hrajnišćo atraktiwniše sčinić.
Dźakowano zhromadnemu dźěłu wšěch cyłkow su wolejbulowe hrajnišćo loni ponowili. Připrawichu nowe saki, stare hrajnišćo su porjadnje wurjedźili a w naročnej dźěłowej akciji z nowym pěskom wuhotowali.
Hdyž je hnězdźenski čas ptačkow nimo, nětko rybarjo w swojich ...
Budyski wokrjes we Wojerecach dale prezentny
Wojerecy (AK/SN). Budyski wokrjes wostanje ze zarjadami we Wojerecach prezentny. Kaž wyši měšćanosta Stefan Skora (CDU) njedawno měšćansku radu informowaše, budźe wot lěta 2020 w měsće 175 sobudźěłaćerjow wokrjesa. To je nimale dźesać procentow jadroweho wokrjesneho zarjadnistwa inkluziwnje job-centera. Tuchwilu dźěła w Zusowym měsće 88 wokrjesnych přistajenych z wobłuka młodźina a socialne na Hrodowym naměsće, pjeć w přizwolerni wozydłow na Dillingenskej a 110 w job-centeru na Einsteinowej. Wokrjes steji za tele stejnišća a planuje z nimi dlěšodobnje tež po lěće 2025.
To wšo wuchadźa z kónčneje rozprawy nachwilneho poradźowaceho wuběrka k wokrjesnej reformje, kotryž měješe na dźesać lět wusměrjene dojednanje wokrjesa Budyšin a z Wojerecami z lěta 2008 pruwować a znowa posudźować.
Krótkopowěsće (05.07.19)
Załožba z nowym direktorom
Drježdźany. Dr. Manuel Frey budźe wot 1. septembra jako nowy direktor sakskeje Kulturneje załožby skutkować. Jeje kuratorij je 55lětneho, kiž dźěła wot lěta 2008 jako zastupowacy załožbowy direktor, wčera do zastojnstwa powołał. Do toho bě pozicija po cyłym Zwjazku wupisana.
Kretschmer najwoblubowaniši
Lipsk. Ministerski prezident Michael Kretschmer (CDU) je najwoblubowaniši načolny politikar Sakskeje. Kaž z aktualneho Sakskeho trenda sćelaka MDR wuchadźa, je 66 procentow naprašowanych podało, zo su z jeho politiskim dźěłom spokojom. Načolny kandidat SPD Martin Dulig docpě 47 proc., Holger Zastrow (FDP) 21 proc., Jörg Urban (AfD) 16 proc., Rico Gebhardt (Lěwica) pjatnaće a Katja Meier (Zeleni) wosom procentow.
Zeńdźenje slepych a widźacych
Policija (04.07.19)
Zadobywar so nawróćił
Biskopicy. Dokelž bě so něchtó do jich bungalowa zadobył, wołachu wobsedźerjo zawčerawšim policiju a přepodachu zastojnikam wobrazy wo skućićelu z wobstražowanskeje kamery. Runje w tym wokomiku so podhladny bližeše, dokelž chcyše so znowa do lawby zadobyć. Jako jeho kontrolowachu, poča wón do policistow bić a kopać. Skónčnje pak so zastojnikam poradźi 36lětneho čěskeho staćana přewinyć.
Busowe dwórnišćo zawrjene
Budyšin. Spočatk lětnich prózdnin Budyske busowe dwórnišćo na tři tydźenje dróhotwarskich dźěłow dla zawru. W tym času zarjaduja prowizoriske zastanišća na Mukowej kaž tež mjez Walskej a Bebelowym naměstom. Wot 29. julija budźe busowe dwórnišćo zaso wužiwajomne. Potom wotrězk mjez Mukowej a Liebknechtowej dospołnje zawru.
Na štomy kedźbować
Budyšin. Měšćanske zarjadnistwo Budyšin skedźbnja na to, zo móhli so při tuchwilnej suchoće wot wonkownje strowych štomow nadobo hałzy wotłamać. Přičina je, zo po lońšim suchim lěću deficit wody dawno hišće narunany njeje. Zo bychu njetrjebawšim rizikam zadźěwali, njeměli ludźo dlěši čas pod štomami w parkach abo druhdźe přebywać. Štóž potajkim chłódkojte městno pyta, měł stajnje sobu na štomy kedźbować. Za to nastajeja nětko tež wotpowědne taflički.
