Policija (10.11.16)
Tójšto pjenjez zhubiła
Wjelećin. 88lětnej žonje we Wjelećinje su njeznaći štyricyfrowu sumu pjenjez pokradnyli. Kaž wona zawčerawšim policiji zdźěli, dóstachu so paduši pod wumyslenej přičinu do bydlenja rentnarki a su wottam blachowu tyzu z něšto stami eurow, lutowanskimaj knižkomaj a pjenježnej kartu sobu wzali. Jako žona pozdźišo swoje konto přepruwowa, dyrbješe zwěsćić, zo bě něchtó z njeho wjacore razy pjenjezy wotzběhnył.
Na reje do „Meje“
Na schwaleny plan dołho čakali
Wulke wudawki za zwuporjedźenje wjesneho wobswětlenja na dwěmaj městnomaj načinjeja zamołwitym w Njeswačanskej gmejnje tuchwilu šwarne hłowybolenje.
Njeswačidło (JK/SN). Hakle nětko, poslednjej měsacaj lěta, móže Njeswačanska gmejna ze schwalenym hospodarskim planom dźěłać, kaž zdźěli to zawčerawšim wjesnjanosta Gerd Schuster (CDU) radźićelam na jich posedźenju. Tak dołho hišće ženje čakali njejsu, zo by Budyski krajnoradny zarjad etat gmejny za běžne lěto schwalił. Mnohim dalšim komunam je so lětsa podobnje zešło. Najebać to pak su wuspěšnje dźěłali.
Wotličenje bjez porokowanja
Njewotwisni fachowcy su přepruwowali, hač je zaměrowy zwjazk za wopłóčki Při Klóšterskej wodźe loni porjadnje hospodarił. Wuslědk nětko předleži. K tomu su tež kritiske přispomnjenja.
Porchow (AK/SN). Zaměrowy zwjazk za wopłóčki Při Klóšterskej wodźe (AZV) je ponowjenje Jědličanskeje wodočisćernje nětko doskónčnje wotzamknył. Tole rjekny jednaćel Hans-Jochen Schöne na wčerawšim posedźenju zaměroweho zwjazka. „Rostlinska čisćernja Jědlica hižo njewobsteji. Smy ju wotstronili a z nowej techniskej připrawu narunali“, Hans-Jochen Schöne rozłoži.
Za mjenowanu naprawu planowachu spočatnje 190 000 eurow, kotrež su jako spěchowanske srědke přizwolene dóstali. Přetrjebali pak su na kóncu 209 000 eurow. „Hłowna přičina bě, zo je so do zymskeje přestawki woda na twarnišćo zadobyła“, rjekny jednaćel AZV. Přidatne wudawki je Sakska natwarna banka mjeztym připóznała, a radźićeljo jim wčera tohorunja přihłosowachu.
Krótkopowěsće (09.11.16)
Čestnu Lubinu spožčili
Choćebuz. Na wčerawšim swjatočnym wotewrjenju 26. Choćebuskeho filmoweho festiwala w tamnišim statnym dźiwadle su jednaćelku filmoweho spěchowanja Medienboard Berlin-Brandenburg Kirsten Niehus z čestnej Lubinu wuznamjenili, a to za jeje zasłužby wo wuwiće srjedźo- a wuchodoeuropskeho filma. Niehus je štwórta lawreatka tohole myta.
Gauck pogrom wopominał
Choćebuz. Zwjazkowy prezident Joachim Gauck je dźensa w Choćebuzu wopory nacistiskeho pogroma wopominał. Zhromadnje z braniborskim ministerskim prezidentom Dietmarom Woidku (SPD) wón při wopomnišću na městnje zničeneje synagogi wěnc połoži. 9. nowembra 1938 běchu nacionalsocialisća po wšej Němskej židowske synagogi, wobchody a bydlenja nadběhowali.
Němska wosada w čěskej stolicy
Harig so wuprajił
Budyšin (UM/SN). Budyski krajny rada Michael Harig (CDU) je so prěni raz zjawnje wobšěrnje k podawkam mjez njepřewodźenymi małolětnymi požadarjemi azyla a kritikarjemi azyloweje politiki wuprajił, kotrež stachu so minjene tydźenje w Budyšinje. Rozłoženje wobhospodarjenskeho koncepta za internat na Drježdźanskej zawčerawšim na posedźenju wuběrka za młodźinsku pomoc wokrjesneho sejmika bě jemu składnosć za to.
„Diskusija dyrbi wěcowniša być“, Harig mjez druhim rjekny. Nastupajo podawk w nocy wot 1. na 2. nowember wón praješe, „zo njeby w Berlinje w tajkim padźe ani policija přišła. Stejimy w fokusu nadregionalneho nowinarstwa, honjaceho za sensacijemi ... Do kotreje měry ma so kóžda demo dowolić, hdyž su ćěło, žiwjenje a wěcne hódnoty prawidłownje wohrožene?“ Rozmołwu Budyskeho wyšeho měšćanosty Alexandera Ahrensa (njestronjan) ze zastupjerjemi prawicarskich skupin ma Harig za prawu, „wšako maš z tymi rěčeć, kotřiž su k tomu hišće zwólniwi. ... Mamy zaso docpěć, zo čłowjeskosć, toleranca, swětawotewrjenosć a sćerpnosć hłowne nadpisma dominuja.“
Dźensa rano so bróžeń paliła
Policija (09.11.16)
Rentnarka so zatepiła
Minakał. Na tragiske wašnje žiwjenje přisadźiła je starša žona w Minakale. Pěšcy wuhladachu zawčerawšim připołdnju jeje ćěło we wjetšej hrjebi při hrodowym parku a wućahnychu je z wody. Přiwołany nuzowy lěkar móžeše jenož hišće smjerć 76lětneje zwěsćić. Po wšěm zdaću bě wona strowotniskeho problema dla do hrjebje padnyła a so zatepiła. Nadrobniše wobstejnosće jeje smjerće kriminalna policija přepytuje.
Wuradźuja wurjadnje
Ležownosće klětu přizamknu
Předewzaća wopłóčkoweho zaměroweho zwjazka Při Klóšterskej wodźe
Wudwor (AK/SN). Wotedawk sobustawskich gmejnow zaměroweho zwjazka za wopłóčki Při Klóšterskej wodźe (AZV) ma klětu wot 35 000 na 25 000 eurow spadnyć. Tole je najwažniše wuprajenje w naćisku hospodarskeho plana 2017. Hač do dźensnišeho bě wón zjawnje wupołoženy. Znapřećiwjenja móža wobydlerjo hišće hač do 21. nowembra zapodać. Po wšěm zdaću w januaru chcedźa plan wobzamknyć.
Zo wotedawk spadnje, ma wjacore přičiny. Kóšty za planowanje wjetšich inwesticijow kaž w minjenych lětach hižo njenastanu. Tež wudawki za prawniske poradźowanje woteběraja. Lětsa su za to 16 000 eurow wudali, klětu je jenož połojca toho předwidźana. Tež wudawkow za twarsku kontrolu je tójšto mjenje. Loni wučinješe to 40 000, lětsa 14 000 a klětu jenož hišće 3 600 eurow. AZV liči potom z dobytkom nimale 28 000 eurow. Z tejle sumu chce swoje rezerwy zaso trochu napjelnić. Předewšěm w lětomaj 2010 a 2011 je zaměrowy zwjazk deficit nadźěłał. To móže nětko wurunać.
