Worklecy (SN). Nimale 60 małkich a wjetšich ptačkow Worklečanskeje pěstowarnje „K wódnemu mužej“ wuhotowa minjeny pjatk w ponowjenej sportowni swój kwasny dźeń. Za to přeprosychu sej nimale 200 hosći zbliska a zdaloka, kotrymž předstajichu w najrjeńšej pyše swoje pěsnički, basnički a reje kołowokoło ptačeho kwasa. Program běchu w tydźenjomaj do wulkeho dnja ze swojimi kubłarkami pilnje nazwučowali. Tež pěstowarska skupina, kotraž běše z Großnaundorfa přijěła, měješe wulke wjeselo na wotměnjawym a lóštnym předstajenju Worklečanskich dźěći. Dobra nalada mjez nimi přenjese so bórze na wšitkich hosći, kotřiž dachu sej po programje słódnu šalku kwasneho kofeja a tykanca zesłodźeć. Wočiwidnje spokojom dźakowaše so wjesnjanosta Franc Brusk (CDU) kubłarkam a wšitkim pomocnikam za woprawdźe poradźeny swjedźeń.
Wojerecy (AK/SN). Swoje 750lětne wobstaće chce město Wojerecy hódnje woswjećić. Tole podšmórny wyši měšćanosta Stefan Skora (CDU) na wčerawšim posedźenju měšćanskeje rady. „Posłužbowe zrěčenje mjez městom a Zwěrjencowej kulturnej tzwr jako wuhotowarjom je podpisany. Kooperaciske zrěčenja za 75 wuběranych zarjadowanjow su zdźěłane a móža so tohorunja podpisać“, praji Skora k aktualnemu stawej přihotow. „Programowy zešiwk z nakładom 30 000 eksemplarow předleži. Minjeny kónc tydźenja su jón domjacnosće dóstali.“
Budyšin. Za wobdźělenje na rěčnym kursu čěšćiny w Praze wot 27. julija do 24. awgusta 2018 abo w Českich Budějovicach wot 20. awgusta do 7. septembra 2018 su stipendije k dispoziciji. Rěčny centrum WITAJ je posrědkuje. Zajimcy njech hač do 15. měrca w RCW swoje přizjewjenske podłožki wotedadźa (Póstowe naměsto 2, 02625 Budyšin, e-mail: ). Dokładne informacije su na internetnej stronje www.witaj-sprachzentrum.de přistupne.
Srjedź februara započnu twarić
Němcy. Ponowjenje statneje dróhi S 95 w Němcach započnje so 15. februara. Tole je twarska firma Strabag tele dny na prěnim wuradźowanju ze zastupjerjemi wuchowanskeje słužby, wohnjoweje wobory, nadróžneho wobchadneho zarjada a dalšich wobdźělenych firmow zdźěliła. Hladajo na póstniske zarjadowanja w Kulowje a zymske prózdniny su so na mjenowany termin dojednali. Tón dźeń započnu mjez Vincencowej hrjebju a Při Kummelec młynje štomy pušćeć, za čož statnu dróhu dospołnje zawru. Tohorunja 15. februara w 17 hodź. přewjedu za wobydlerjow informaciske zarjadowanje.
Budyšin (SN). Za přichodnu hamtsku dobu wot lěta 2019 do 2023 pyta Budyski wokrjes čestnohamtskich sudnikow za Drježdźanske zarjadniske sudnistwo. Štóž chce so jako wobydler/ka Budyskeho wokrjesa za tele čestnohamtske skutkowanje požadać, měł/a swoje podłožki hač do 6. apryla 2018 krajnoradnemu zarjadej připósłać, rěka w nowinskej zdźělence wokrjesa. Podłožki nadeńdu zajimcy pod internetnej adresu www.landkreis-bautzen.de/63-22293.html. Wućišćane předłohi su tohorunja we wobydlerskich běrowach krajnoradneho zarjada w Budyšinje, Kamjencu a Wojerecach wupołožene a hodźa so tam pod jednotnym telefonowym čisłom 03591/ 5251 15 107 skazać. Pod samsnym čisłom je móžno so nadrobnišo wobhonić.
Čestnohamtscy sudnicy wobdźěleja so na ertnych sudniskich jednanjach a sudźa sobu ze samsnymi prawami kaž powołanski sudnik. Zajimcy za tele zastojnstwo maja němscy staćenjo być, 25. žiwjenske lěto dokónčene měć a maja we wobłuku sudniskeho wobwoda bydlić.
Wojerecy (AK/SN). Komuny měli so na nowy digitalny dźěłowy a powołanski swět lěpje nastajić. „Wone dyrbjeli akterojo a zdobom pohonjerjo być. Njeměli wuwiće zaspać.“ To je Jens Leschner, sobudźěłaćer koordinowanišća za kubłanje města Wojerec a regionalneho dźěłanišća za kubłanje, demokratiju a žiwjenske perspektiwy tele dny w kompjuterowym muzeju Konrada Zusy we Wojerecach zwuraznił. Na dwudnjowskej fachowej dźěłarničce su so tam z temu „Kubłanje za digitalny dźěłowy a žiwjenski swět“ dokładnje zaběrali.
Bjezdźěłnosć postupiła
Budyšin. We wuchodnej Sakskej bě w januaru 22 010 bjezdźěłnych, 1 954 wjace hač loni w decembrje (+ 9,7 procentow) a 3 248 mjenje hač před lětom (- 12,9 procentow). Wuwiće wotbłyšćuje sezonalne efekty, wosebje we wot wjedra wotwisnych powołanjach. Nimo toho wuběžachu wobmjezowane dźěłowe městna kónc lěta, rjekny Thomas Bernd, předsyda jednaćelstwa Budyskeje agentury za dźěło.
Žadaja sej dale wutwar A4
Budyšin/Drježdźany. Wobchad na awtodróze A4 mjez Drježdźanami a Zhorjelcom je zašłej lěće wo dźesać procentow přiběrał a dale stupa. To wujewja statistika posudźowarja, kotruž je Alianca hornjołužiskich politikarjow tele dny w Drježdźanach předstajiła. Loni bě čaru cyłkownje 45 000 jězdźidłow wob dźeń wužiwało. Politikarjo wokoło zapósłanca Sakskeho krajneho sejma Marka Šimana (CDU) žadaja sej tuž dale wutwar A4 na šěsć čarow.
Serbšćina njezastupjena
Wobydler zadobywanje njepytnył
Šěrachow. Nade wšo kruty spar měješe po wšěm zdaću w nocy na minjenu njedźelu wobydler wjaceswójbneho domu na Budyskej dróze w Šěrachowje. Hakle njedźelu dopołdnja wón zwěsći, zo běchu so njeznaći w nocy do toho do domu zadobyli, płót skóncowali, wjacore wokna a chěžne durje rozbili, jako so z nimi do twarjenja łamachu. Kaž přiwołani policisća pozdźišo zwěsćichu, běchu zadobywarjo w bydlenju w přizemju pobyli. Dokelž pak bě te runje njewobydlene, drje tam ničo pokradnyć njemóžachu. Wo wšěm tym wobydlerjo hornjeho poschoda ničo pytnyli njejsu. Načinjenu wěcnu škodu trochuje wobsedźer na něhdźe 2 000 eurow. Kriminalna policija so nětko z tymle padom bliže zaběra a spyta skućićelow wuslědźić.