Gmejna Pančicy-Kukow je wčera z nošerjom swojeje pěstowarnje, Křesćansko- socialnym kubłanskim skutkom (CSB), dočasnje nošerske zrěčenje za kubłanišćo podlěšiła. A to wo cyły lětdźesatk. To njeje runjewon samozrozumliwe. Štó dźě so rady tak dołho kruće wjaza? Tu pak mam to runja wjesnjanosće Markusej Kreuzej za wunošne. Podlěšenje zrěčenja je dobry přikład wuběrneho zhromadneho dźěła. Njemało wšak je CSB hižo do pěstowarnje inwestował, a kaž bě słyšeć, su plany za dalše inwesticije zdźěłane. Po­dlěšenje zrěčenja njeje tuž jenož gmejnje a CSB na dobro, ale zawěrno tež staršim. A to nic jenož tym, kotřiž swoje dźěći do Pančičansko-Kukowskeje pěstowarnje sćelu, ale tež tym, kotřiž chcedźa to přichodnje činić. Předewšěm jim tak zawěsća, zo tam dale pěstowarnju maja. A CSB a gmejna mó­žetej wěsće do přichoda planować. Nadźijam so, zo při tym tež na serbskosć w kubłanišću dźiwaja. Janek Wowčer

Sejmik wokrjesa Zhorjelc wobłukowy plan hač do lěta 2028 wobzamknył

Zhorjelc (AK/SN). Wokrjes Zhorjelc chce słužbu za nuzowe wuchowanje a za transport pacientow we wjesnych kónčinach polěpšić. To wuchadźa z noworjadowanja wotpowědneho wobłukoweho plana za lěta 2021 do 2028. Z 72 hłosami a jeničkim hłosawzdaćom je jón wo­krjesny sejmik wčera wobzamknył.

Plan předwidźi wažne změny. Lěta 2018 wukazane městnosće za wuchowanske straže w Jonsdorfje, Slepom a Rěčicach změja kóžda přidatne wuchowanske jězdźidło, a to wodnjo kaž w nocy. W Habrachćicach chcedźa přidatne jězdźidło dwanaće hodźin přewostajić. We wuchowanskej słužbje na Leschwitzowej w Zhorjelcu změja chorobne awto tohorunja wšědnje 24 hodźin k dispoziciji. Wobłuk zasadźenja wopřijima po potrjebje, wosebje w nócnych hodźinach, cyły wobłuk Zhorjelskeho wo­krjesa. „Tak mamy nimale stoprocentowsce zaručene, zo je wšón wokrjes hladajo na nuzowu słužbu zastarany“, pod­šmórny socialna decernentka Martina Weber we wokrjesnym sejmiku. „Bu­dźe-li trjeba, móžemy system dale roz­šěrić.“

Swěčki najwšelakorišeho razu pyša nětko na hornjołužiskich wsach a w městach chěže a štomy na mnohich priwatnych ležownosćach, wšako njejsu tydźenje do hód jenož w Rudnych horinach doba swěčkow. Wosebity adwentny postrow maja w Pan­či­cach-Kukowje. Z elektriskimi resp. LED-swěčkami wupyšeny traktor před arealom ratarskeho wikowarja BayWa zdawa drje so někotremužkuli nimo jěducemu žort być. Runje před pozadkom protestow ratarjow z traktorami wčera w Biskopicach pak móžemy to tež jako napominanje rozumić, sej dźěło ratarjow bóle wažić a zo politikarjo jich problemy woprawdźe chutnje bjeru. Foto: Bernhard Baier

Wyše twarske kóšty za nastawace dźěća­ce dnjowe přebywanišćo na Bu­dyskim Třělnišću su radźićelow wčera na poslednim lětušim posedźenju tudy­šeje měšćanskeje rady njesměrnje rozhorili. Wšako zhonichu wo cyłym rjedźe panow­ a njedostatkow.

Budyšin (CS/SN). Měšćanscy radźićeljo mějachu wotpohlad zarjadnistwa za skan­dalozny, přewostajić 1,45 milionow eurow přidatnje za nowe dźěćace zarjadnišćo na Budyskim Třělnišću. Dyrbjachu pak so wudawkej podwolić, kotryž bjeru nětko z likwiditneje rezerwy. Wšako běchu sej radźićeljo a zarjadnistwo přezjedni, zo maja twarske dźěła dale hić.