Najwobšěrniši etat zašłych lět
Měšćanscy radźićeljo so prěni raz z hospodarskim planom 2019 zaběrali
Budyšin (SN/MWj). Zo so měšćanska rada hakle w januarskim posedźenju z hospodarskim planom tohole lěta zaběra a nic hižo w měsacu do toho kaž zašłe lěta, swědči wo tym, zo bywaja časy pjenježnje komplikowaniše. Tole rjekny financny měšćanosta Robert Böhmer na wčerawšim posedźenju radźićelow, jako jim etat 2019 w hrubym rozłoži. Po jeho měnjenju a tym hospodarskich fachowcow so časy wulkeje konjunktury nachileja. Lětuši etat drje je znowa na jara wysokim niwowje. Za přichodne lěta pak budu nowe směrnicy trěbne, dokelž njebudźe so kóždy projekt zwoprawdźić hodźeć.
Dalšu fyzioterapiju wotewrěł
W něhdyšim Hančkec modowym domje, wjele lět zaměstnjenym w twarjenju na Kulowskim torhošću, je Sebastian Kern 4. januara fyzioterapeutisku praksu wotewrěł.
Kulow (SN/mwe). Wot spočatka januara 2019 maja w Kulowje dwě fyzioterapiji, a to na Kolpingowym naměsće a na torhošću. Wobě rěkatej „praksa za cyłkownu fyzioterapiju Kern“. Mějićel je hakle 31lětny Sebastian Kern, bydlacy z mandźelskej a synkom w Běłym Chołmcu. Tam ma wón priwatnu praksu „Jězorina“ za osteopatiju, neuralterapiju a ultrazwuk. Nimo toho je sej statnje připóznaty fyzioterapeut a hojer lěta 2016 w Njedźichowje fyzioterapeutisku praksu natwarił.
Myće za měr a socialny angažement
Koncept prěni raz zjawnje
Čłonojo Budyskeje měšćanskeje rady běchu na swojim wčerawšim posedźenju prěni, kotrymž předstaji direktor Załožby za serbski lud Jan Budar koncept za nowy Serbski zetkawanski centrum na Lawskich hrjebjach.
Budyšin (SN/MWj). Po rozsudźe rady Załožby za serbski lud, zo ma w Budyšinje na arealu mjez Hošic hasu a Lawskimi hrjebjemi nowotwar za Serbski institut nastać a zo ma so tohorunja stara póštownja do njeho sobu zapřijeć, póčnu kontury za to dokładniše być. Koncept z tuchwilnym titulom „Serbski zetkawanski centrum“ je direktor załožby Jan Budar wčera Budyskim měšćanskim radźićelam předstajił. Byrnjež to jako samostatny dypk na dnjowym porjedźe njesteješe, je zjawnosć na te wašnje prěni raz wo wobsahach, zaměrje a financowanju projekta zhoniła.
Šansy ze strukturneje změny
Ministerski prezident w Zhorjelcu wabił z njej ofensiwnje wobchadźeć
Zhorjelc (AK/SN). Ze zawjazowacym zakonjom wo naprawach chce Sakska srědki we wysokosći 1,3 miliardow eurow zaměrnje wužiwać, kotrež chce Zwjazk lětnje hač do 2038 za strukturnu změnu we Łužicy přewostajić. Zdobom wabi kraj w Berlinje za dołhodobnje płaćiwe pospěšene planowanske prawo. „Zhromadnje z wokrjesomaj Budyšin a Zhorjelc chcemy so jako swobodny stat za to zasadźić. Dyrbimy zmištrować, zo docpěwamy za wažne twarske předewzaća po pjeć do dźesać lětach twarske prawo“, podšmórny sakski ministerski prezident Michael Kretschmer (CDU) wčera na posedźenju Zhorjelskeho wokrjesneho sejmika. Strukturna změna wotkryje Łužicy w dobje 20 lět wulke šansy, wón wuzběhny.
Krótkopowěsće (31.01.19)
Za Europeadu so přizjewić
Flensburg. Wotnětka su přizjewjenja za 4. koparske europske mišterstwa awtochtonych narodnych mjeńšin Europeadu móžne, kaž Federacija europskich narodnych mjeńšin (FUEN) zdźěla. Korutanscy Słowjency wubědźowanje wot 20. do 28. junija wuhotuja. Startować smědźa mustwa z njeprofesionalnymi hrajerjemi a hrajerkami.
Komisija za anticyganizm
Berlin. Zwjazkowe knježerstwo je wčera čłonow njewotwisneje komisije ekspertow anticyganizm powołało. Wutworjenje gremija je w koaliciskim zrěčenju unije a SPD zapisane. Centralna rada němskich Sintow a Romow po słowach jeho předsydy Romanija Rose krok wita a zdobom wočakuje, zo so Němski zwjazkowy sejm wobšěrnje z bojom přećiwo anticyganizmej zaběra.
Na rozmołwu přeprosyć
Serbscy susodźa swěrni hosćo
Čłonojo Kamjenskeje cityjoweje iniciatiwy z wopytowarstwom spokojom
Kamjenc (SN/mwe). Kamjenc ma 16 845 wobydlerjow, wyši měšćanosta je wot lěta 2011 Roland Dantz (njestronjan). „Njemóžemy so wopytowarskich frekwencow dla hóršić. Kamjenc je kótwicowa městnosć za wokolinu, čehoždla wjele ludźi do města přijědźe. Tež serbscy susodźa su swěrni hosćo.“ To praji Anne Hasselbach ze cityjoweje iniciatiwy Lessingoweho města. Wona je předewzaćelka a ma swoje „Hasselbachske studijo“ na Hasy Rosy Luxemburg.
Policija (30.01.19)
Spěšnosć měrili
Njebjelčicy. Na statnej dróze S 94 je policija póndźelu při wotbóčce do Njebjelčic spěšnosć měriła. W běhu třoch hodźin kontrolowachu 1 730 wozydłow. W 51 padach wosta při warnowanju. Wosom šoferow změje pokutu płaćić. Rekord docpě awto z Budyskim čisłom, kotrež při dowolenych 70 km/h ze 118 km/h nimo smaleše. Šofer změje nětko 160 eurow pokuty płaćić, dóstanje dypkaj w Flensburgu a dyrbi měsac nóžkować.
W nowym hotelu so paliło
Stipendije za kurs čěšćiny
Budyšin. Čěske knježerstwo přewostaja tež lětsa zajimowanym Serbam stipendije za wobdźělenje na intensiwnym rěčnym kursu čěšćiny w Praze wot 26. julija do 23. awgusta abo w Českich Budějovicach wot 18. awgusta do 9. septembra. Stipendije posrědkuje Rěčny centrum WITAJ (tel. 03591/ 550 400, e-mail: ). Zajimcy njech tam hač do 15. měrca swoje podłožki wotedadźa. Nadrobniše informacije a přizjewjenske formulary nadeńdu w interneće pod www.witaj-sprachzentrum.de.
Štó přewostaji kachle?
Budyšin. Za swoju přichodnu hornjoserbsku inscenaciju „Wopušćeny dom“ pyta Němsko-Serbske ludowe dźiwadło stare elektriske kuchinske kachle ze štyrjomi platami (tež skóncowane). Sobudźěłaćerjo sej kachle darmotnje wotewzaja. Zajimcy njech přizjewja so pod telefonowym čisłom 0 35 91 / 59 84 51 10.
Stajne blido jěcharjow
Kulow. Přichodne Kulowske stajne blido jěcharjow wotměje so pjatk, 1. februara, w 19 hodź. w kofejowni „Schwupp“. Nadine Schneider porěči wo konjacym treningu, Anke Meyer wěnuje so konjacej terapiji. Wšitcy su wutrobnje witani.
