Na festiwal dujerskeje hudźby
Wot jutřišeho hač do njedźele wotměje so w Budyšinje 12. mjezynarodny dujerski festiwal. Kmótřistwo je runja zašłym lětam přewzał krajny rada Michael Harig (CDU).
Budyšin (SN). Sprjewine město hotuje so na wulki swjedźeń dujerskeje hudźby. Wot jutřišeho hač do njedźele dožiwja lubowarjo w měsće a zwonka njeho wjacore koncerty, hudźbne kemše a swjedźenski ćah. W běrowje spěchowanskeho kruha Budyskeho młodźinskeho dujerskeho orchestra su podawk minjene tydźenje z połnej paru přihotowali. „Smy dobreje nadźije, zo budźe festiwal wulki wuspěch“, praji předsyda spěchowanskeho towarstwa Thomas Gollmer.
Subotnik na sportnišću
Serbske Pazlicy (bl/SN). Na twarnišću noweho sportnišća w Serbskich Pazlicach su minjenu sobotu subotnik přewjedli. Wjac hač dwaceći dobrowólnikow kóždeje staroby je z łopaču a rodawu do Serbskich Pazlic přichwatało. Při najkrasnišim wjedrje babylěća kidachu tam fundamenty a připrawichu nimale wšitke pola płota. Dale kopachu njerodź a zrunachu zemju.
W Serbskich Pazlicach twarja hižo něšto tydźenjow nowe sportnišćo. W swójskej iniciatiwje Njebjelčanskeho sportoweho towarstwa ma tam nowe kopanišćo z wobswětlenjom nastać. Kóždu sobotu čłonojo towarstwa tuž bjezpłatnje dźěłaja, zo bychu tam prawje bórze zaso za bulom honić móhli. Dotal njeje wot praweho sportnišća hišće wjele spóznać. Wulka betonowa sćěna pak hižo steji. Wjesnjenjo so njemało dźiwachu, jako zhonichu, zo smědźa dźěći při treningu na nju kopać, zo bychu swoje kmanosće we wobchadźenju z kulowatej kožu polěpšili. Tež sćežor za swěcu su natwarili a elektriku instalowali.
Čas so prawje škitać
Šćěpjenje traje sekundy, gripa tři tydźenje
Budyšin (SN/MWj). Kaž kóžde lěto spočatk nazymy namołwja strowotniski zarjad Budyskeho wokrjesa wobydlerjow, pře gripu so šćěpić dać. Wotpowědny srědk domjacy a fachowi lěkarjo hižo maja. Wirusowa gripa je najčasćiše schorjenje dychanskich organow a so jara spěšnje přenjese. Hinak hač jednore nazymnjenje, kotrež je za něšto dnjow zaso zabyte, wirusowa gripa wjele dlěje traje. Symptomy su, zo dóstanje pacient wysoku zymicu, hłowybolenje, suchi kašel a zo so poći. Žiwjenjastrašne móže być, hdyž wuskutkuje gripa wjetše komplikacije, kaž zahorjenje płucow abo samo wutroby. Předewšěm staršim ludźom a chronisce chorym fachowcy radźa so šćěpić dać. To traje jeno sekundy, prawa gripa pak tři tydźenje.
K přećelam prěni raz zhromadnje
Krótkopowěsće (24.09.15)
Mjeńšinowa rada dźesać lět
Berlin. Dźesaćlětne wobstaće swjeći dźensa w Berlinje mjeńšinowa rada. W srjedźišću rozmołwow zastupjerjow štyrjoch awtochtonych narodnych mjeńšin Němskeje, Frizow, Danow, Sintow a Romow kaž tež Serbow, z politikarjemi a ze społnomócnjenym knježerstwa za mjeńšiny Hartmutom Koschykom (CDU) steješe politiske sobupostajowanje mjeńšin na zwjazkowej runinje.
Přihotuja „hłownu wólbnu“
Chrósćicy. Župa „Michał Hórnik“ Kamjenc hotuje so na hłownu wólbnu zhromadźiznu, 13. nowembra we Wotrowje, kaž župne předsydstwo wčera w Chrósćicach rozsudźi. Na „hłownej“ chcedźa tři nowe towarstwa z něhdźe sto čłonami přiwzać. Přichodne zarjadowanje župy budźe 27. oktobra zetkanje wjesnych chronistow w Chrósćicach.
„Čěski přistaw“ přećehnje
Policija (24.09.15)
Lěska. Njewobkedźbowanje předjězby bě přičina wobchadneho njezboža wčera pola Lěski blisko Wóslinka. 38lětny bě z Toyotu na wokrjesnej dróze do směra na Wóslink po puću. Při statnej dróze S 92 pak njewobkedźbowaše wón předjězbu wotprawa přijěduceho Dacije a zrazy do njeho. Dacia zjědźe na to z dróhi. Jeho 67lětny wodźer bu w awće tak zatłusnjeny, zo móžachu jeho hakle wohnjowi wobornicy z ćežkej techniku wuswobodźić. Ćežko zranjeneho rentnarja dowjezechu do chorownje. Wodźer Toyoty so jeno snadnje zrani. Wobě jězdźidle pak stej dospołnje skóncowanej.
Wot njedawna móža šulerjo a wučerjo Kulowskeje wyšeje šule ...
Nowa domizna karpam, linam a čerwjenym pjerkam
Łaz (AK/SN). Planowanska a krajinotwarska towaršnosć z Łaza stara so tuchwilu wo renaturěrowanje tamnišeho Matušoweho hata. Z kamjentnymi walcami, matami a wodowymi twarskimi kamjenjemi dźěłaćerjo pobrjóh skrućeja. „Chcemy šulerjam, zbrašenym, wudźerjam a wočerstwjenje pytacym hat spřistupnić. Wosebje dźěło z dźěćimi a młodostnymi ma so tu wuwiwać“, podšmórnje René Häse, nawoda Drježdźanskeho zwjazka wudźerjow (AVE) a nošerja projekta.
Jubilej z dopomnjenku
450. róčnica Jeńšec za wjesnu zhromadnosć kaž nowozapočatk był
Jeńšecy (SN/MWj). Hdyž přez Jeńšecy w Rakečanskej gmejnje jenož po hłownej dróze po wsy njesmališ, ale tež raz do wsy wotbočiš, jón hižo wotdaloka wuhladaš: wulki kamjeń, kotryž su minjenu sobotu składnostnje 450lětneho wobstaća wsy wotkryli. Zo móžachu tónle jubilej scyła woswjećić, maja so dźakować žonje, kotraž bě wo tym w Hornjołužiskej domjacej protyce čitała a Wernera Sporku na to skedźbniła. „Haj, to trjechi. Sami wo jubileju ani wědźeli njebychmy“, rjekny molerski mišter, kiž na to wjesnu zhromadźiznu zwoła. Před lětom so dojednachu, sej k jubilejej swjedźeń wuhotować. To a tamne organizujo zrodźichu ideju, postajić na nawsy wopomjatny kamjeń, dopominacy nětko na róčnicu.
