Pozabyte do pomjatka zwołałoj
Budyšin. Kak intensiwnje je mnoholětny jednaćel Domowiny Bjarnat Cyž před třiceći lětami za serbske naležnosće rozsudne wuhibki sobu stajał, wuwědomi wón minjenu wutoru w kruhu serbskich seniorow Budyskeje katolskeje tachantskeje wosady. Monika Cyžowa pak, mějićelka drastoweho fundusa, zaměstnjeneho na něhdyšej Róžeńčanskej šuli, je jara nazornje na wšelake warianty drasty katolskich Serbowkow pokazała.
Ličba wobydlerjow wostała
Runja mnohim druhim gmejnam tež Hodźijska stajnje spočatk lěta statistiku wuwića swojeho wobydlerstwa wozjewja. Tele dny je so tuž tamniša gmejnska rada z ličbami zaběrała.
Hodźij (CK/SN). Kónc lěta 2019 bydleše w gmejnje Hodźij 3 083 ludźi. 20 wukrajnikow mjez nimi woznamjenja podźěl snadnych 0,6 procentow. Lońše 32 porodow 32 zemrětych takrjec narunaja. A trochu kuriozne snano tež je, zo bě so 128 ludźi do druhich kónčin přesydliło, ale runje telko do Hodźijskeje gmejny přićahnyło. Ličba wobydlerjow wosta potajkim njezměnjena. Na zašłym posedźenju gmejnskeje rady předstaji wjesnjanosta Gerald Meyer (njestronjan) wobydlersku statistiku wot lěta 1992. W tychle 27 lětach je komuna dohromady 377 wobydlerjow zhubiła. Wona wobsteji z 32 wjesnych dźělow něhdyšich samostatnych gmejnow Hodźij, Prěčecy a Koblicy. Z 857 ma Hodźij najwjace, Mała Praha z 15 wobydlerjow najmjenje.
Krótkopowěsće (27.01.20)
W muzeju kwasowali
Drježdźany. Dźěći a starši towarstwa Stup dale z. t. w Drježdźanach swjećachu sobotu ptači kwas a pokazachu swój program něhdźe 200 ludźom w foyeru tamnišeho měšćanskeho muzeja. Při woblěkanju serbskeje katolskeje narodneje drasty je staršich towarstwa Kristin Belkotowa z Hózka podpěrała. Program nazwučowali běchu we wobłuku dźěłoweho zjednoćenstwa „Serbšćina“.
Brošurka přepodata
Worklecy. Brošurku „Moje wukubłanje“ su Marija-Tereza Krawžic, Marija Koklina, socialna dźěłaćerka za młodźinske socialne dźěło Rěčneho centruma WITAJ, a Pětr Brězan, referent za hospodarske a infrastrukturne naležnosće Domowiny, pjatk we Worklečanskej wyšej šuli přepodali. Domowina bě 124stronsku ediciju k powołanskej orientaciji loni w nakładźe 300 eksemplarow wudała.
Kobe Bryant mjez woporami
Policija (24.01.20)
Žadyn lóšt na šulu njeměłoj
Wojerecy. Swobodny dźeń bjez šulskeje wučby drje běštaj sej srjedu hólcaj w starobje wosom a jědnaće lět we Wojerecach wučiniłoj. Snano wonaj z toho wuchadźeštaj, zo to nichtó njepytnje. Staj pak so chětro myliłoj. Nawodnica šule informowaše mjenujcy po dorěčenju ze staršimi policiju, kotraž započa hnydom za hólcomaj pytać. Na zažnym popołdnju skónčnje wuhlada wobsadka policajskeho awta wobeju na parkowanišću nakupowanskeho centera na Łužiskim naměsće. Po chutnej rozmołwje přepodachu policisća hólcow jeju staršim. Po wšěm zdaću chcyštaj wonaj dźeń połny dyrdomdejow dožiwić a njeběštaj sej swojeho zmylka wědomaj, rěka w rozprawje policajskeje direkcije. Kaž dale rěka, pak hólcaj skónčnje dopóznaštaj, zo njeběštaj prawje jednałoj a zo bě so jeju dla tójšto ludźi starosćiło.
Přeprošeja na ptači kwas
Malešecy. Dźěći Malešanskeje Witaj-pěstowarnje „K wódnemu mužej“ přeprošeja wšitkich zajimcow na swój ptačokwasny program. Tón předstaja braška, kwasny por a wšitke dalše dźěći njedźelu, 26. januara, wot 15 hodź. w Malešanskim hosćencu „Wódny muž“, hdźež tohorunja kofej a tykanc poskića. W 14.30 hodź. poda so kwasny ćah z pěstowarnje do hosćenca.
Narodki hišće raz widźeć
Njeswačidło. Wulkeho wothłosa dla je so wjesne kulturne a domizniske towarstwo rozsudźiło wustajeńcu božich narodkow w Njeswačanskim domizniskim muzeju přidatnje hišće njedźelu, 26. januara, wot 13 do 17 hodź. wotewrěć. Potom móža zajimcy tež parnicy wobdźiwać, kak dźěłaja. Domizniski muzej změje wot 27. januara hač do 21. měrca zymsku přestawku. Jeli pak ma skupina zajim muzej wopytać, je telefoniske naprašowanje pod 035933/ 30 179 móžne.
Seniorojo škotuja
Lejno. Přichodny serbski seniorski škot budźe wutoru, 28. januara, wot 14 hodź. w Lejnjanskim Kubicec hosćencu. Wšitcy swěrni kartyplacarjo njech znowa přijědu. Tež nowačcy su lubje witani, zdźěli Měrćin Nowak, kiž nětko tele měsačne zetkanja organizuje.
Kubłanski koncept rozjimali
Předšulske kubłanje je wčerawše wuradźowanje gmejnskeje Ralbicy-Róžant bytostnje postajało. Radźićeljo běchu sej kubłanski koncept Ralbičanskeje pěstowarnje předstajić dali.
Róžant (SN/JaW). Nawodnica Ralbičanskeje pěstowarnje „Dr. Jurij Młynk“ Jadwiga Nukowa a jeje naměstnik René Bětnar žněještaj wčera na posedźenju gmejnskeje rady w Róžeńće tójšto připóznaća.
Wonaj předstajištaj koncept kubłanišća, kotrež je w nošerstwje Serbskeho šulskeho towarstwa. „Zakład koncepta su wodźacy wobraz SŠT kaž tež zakonske předpisy“, rjekny Jadwiga Nukowa. Kaž wona dale rozłoži statne zarjady, nošer pěstowarnje a tež gmejna koncept wobstajnje kontroluja. Najwažniši dypk je, zo pěstuja serbsku rěč, serbske nałožki kaž tež tradicije. Wšědny dźeń w pěstowarni je na rěč wusměrjeny. „Wšitcy přistajeni serbsce rěča.“ Wusměrjeny je koncept na to, zo činja dźěći we wšelakich wobłukach pěstowarnje to, štož so jim spodoba a kubłarki a kubłarjo je přewodźeja.
Pančičanski wosud w pozadku
Worklečansku wyšu šulu „Michał Hórnik“ dyrbja nuznje saněrować, štož by něhdźe 3,2 milionaj eurow płaćiło. Gmejna sama to njemóže. Nětko rozmysluja radźićeljo wo tym, nošerstwo kubłanišća wokrjesej přepodać.
Worklecy (SN/MWj). Wo přichodźe Worklečanskeje Serbskeje wyšeje šule „Michał Hórnik“ wosta po wčerawšim posedźenju gmejnskeje rady wjele prašenjow njewotmołwjenych, byrnjež dołho wo nich rěčeli. Wažniše bě, zo prašenja scyła na blido přińdu. Za to bě nawoda wokrjesneho šulskeho zarjada Georg Richter přijěł, zo by spytał na nje wotmołwić, štož pak so jemu jeno zdźěla poradźi.
Pozadk je, zo dyrbja kubłanišćo wobšěrnje saněrować, byrnjež gmejna Worklecy minjene lěta wobstajnje do njeho inwestowała. Přichodne twarske wužadanja pak njemóže sama zmištrować. Móžny wupuć móhł być, zo Budyski wokrjes nošerstwo přewozmje. Wón nima jenož lěpše pjenježne móžnosće hač gmejna, ale tež wotpowědne nazhonjenja.
Krótkopowěsće (24.01.20)
Měšćanske dwórnišćo přepodate
Budyšin. Modernizowane Budyske dwórnišćo staj inwestoraj Jörg Drews a Gerald Lucas w přitomnosći zastupjerjow krajneho zjawneho žiwjenja dźensa swjatočnje přepodałoj. Zaměstnjene su tam nowa wotnožka krajnoradneho zarjada ze socialnym a młodźinskim zarjadom, kofejownja, předawarnja jězdźenkow, wobchadny zwjazk ZVON a chorobna kasa Barmer. Ludnosć bě popołdnju na wotewrjenje přeprošena.
Gudrun Pausewang njeboh
Bamberg. Awtorka knihi „Die Wolke“ Gudrun Pausewang je wčera 91lětna zemrěła. W romanje „Mróčel“ (1987) wopisuje wona dóńt młodostneje po atomowej katastrofje w němskej milinarni. Pausewang je wjace hač 90 knihow wozjewiła a bu w 2017 z Němskim mytom za młodźinsku literaturu za swój žiwjenski skutk wuznamjenjena.
Srědki za Lessingowy gymnazij
Moped ze Sprjewje wućahnyli
Policija (23.01.20)
Dźěłodawar jastwu zadźěwał
Hórnikecy. Zo njeje předwčerawšim, wutoru, do jastwa dyrbjał, ma so 44lětny muž w Hórnikecach swojemu dźěłodawarjej dźakować. Dokelž njebě wón nabrěmjenjenu pokutu zapłaćił, předležeše nětko wukaz zajeća, čehoždla policisća při jeho bydlenju klinkachu. Muž njeměješe štyricyfrowu sumu k rukomaj a zastojnicy jeho tuž sobu na rewěr wzachu. Tam zazwoni wón swojeho dźěłodawarja, kiž bě zwólniwy sumu sudniskej kasy přepokazać. Tale pomoc 44lětnemu jastwo zalutowa, a wón smědźeše rewěr jako swobodny muž wopušćić.
Holcu zranił a dale jěł
