Cyle po morawskim přikładźe
Pěskecy (JSm/SN). Kóžde lěćo a kóždu nazymu podawa so horstka Serbow wšěch starobow na Morawu, zo bychu tam winowy swjedźeń z cymbalowej hudźbu sobu dožiwili. Wjesołeje nalady a dobreho wina dla, kotrejž staj sej tež Křesćan Bejmak a Beno Buk z Pěskec na Morawje zas a zaso lubić dałoj, zrodźištaj wonaj ideju, tajki podobny podawk tež we Łužicy swjećić. To pak nic na někajkej winicy, ale na Pěskečanskim sportnišću. Tak přeprošeja młodaj iniciatoraj a jeju sobuwojowarjo jutře za tydźeń, 31. žnjenca, wot 18 hodź. na 1. serbski winowy swjedźeń do Pěskec. Po hudźbje dujerskeje kapały Horjany móža wopytowarjo cyły wječor rejwać, spěwać a hejsować.
Trójce Emil na jednym dnju
Kamjenc. Na porodnej staciji Kamjenskeje chorownje maltezow swj. Jana su so minjenu njedźelu třo hólcy narodźili, kotrymž dachu jich starši mjeno Emil. Staršej jednoho z nich bydlitaj w Nowoslicach, tamni w Steinje a Dürrröhrsdorfje. Zo na jednym dnju hnydom tři narodźene dźěći samsne předmjeno dóstanu, so w Kamjenskej chorowni hišće ženje stało njeje. Hižo štwórtk do toho bě so dalši mały Emil narodźił. Kaž chorownja zdźěli, mějachu tam lětsa hižo šěsć Emilow. Tak drje je wotwidźeć, zo budźe tele předmjeno lětsa w Kamjenskej chorowni mjez hólcami najwoblubowaniše.
Na dźeń wotewrjenych duri
Njebjelčicy. Wot měrca 2018 přetwarja předewzaće Suburban Seafood jedyn z chlěwow Njebjelčanskeje plahowarnje rancow na plahowarnju garnelow. Jutře přeproša tam na dźeń wotewrjenych duri. Wot 10 do 16 hodź. móža sej zajimcy wobhladać, kak chcedźa w bywšim chlěwje přichodnje garnele plahować.
Hodźijska rada skonstituowana
Zastupowaceho wjesnjanostu hakle w druhich wólbach wuzwolili
Hodźij (CK/SN). Ze slubom, stajnje na dobro gmejny dźěłać, spřisaha wjesnjanosta Gerald Meyer (njestronjan) wčera nowu Hodźijsku gmejnsku radu. Wón dźakowaše so jeje čłonam za zwólniwosć, čestnohamtsce skutkować. Nětko maja woni „pokazać, zo so dowěry wobydlerjow hódni wopokazaja a zo su sej zamołwitosće za gmejnu wědomi“. Wjesnjanosta přeješe sej fairne a wěcowne mjezsobne wobchadźenje, zo wo problemach bjez stronskopolitiskich pozadkow diskutuja a zhromadnje za rozrisanjemi pytaja.
Hodźijska gmejnska rada wobsteji ze 16 žonow a muži. Swobodni wolerjo maja wosom městnow, CDU tři, Lěwica jedne a AfD štyri. Nichtó z nich njeměješe někajku přičinu, zo njemóhł mandat přiwzać. Za wobsadźenje třoch wuběrkow běchu Swobodni wolerjo, CDU a AfD namjety předpołožili. Po snadnych změnach je jednohłósnje schwalichu. Přezjedni sej běchu, zo třoch wěcywustojnych wobydlerjow do twarskeho a wobswětoweho wuběrka wuzwola. W nim běchu woni hižo do toho skutkowali.
15. serbski swjedźeń we Wuježku
Wuježk (KrM/SN). Serbske ewangelske towarstwo a Krygarjec swójba z Wuježka (Wuischke) přeprošatej wšěch Serbow a dalšich zajimcow sobotu, 7. septembra, na lětnje pućowanje a serbski swjedźeń do Wuježka pod Čornobohom. Wobdźělnicy zetkaja so w 13 hodź. pola Krygarjec (Wuježk čo. 31A). Wottam pućuja na Koporsku horu. Njech njezabudu sobupućowarjo na krute črije a dołhe cholowy! Po puću so kóždy sam ze swojeho nachribjetnika zastara. Po zwučenym wašnju přizamknje so po pućowanju a kofeju w 17 hodź. serbska nutrnosć na Pawlikec statoku.
Chrósćicy su nětko wo zajimawostku bohatše. Na fasadźe Kralec ...
Wjesela so na wulke finale
Lětuša bičwolejbulowa tura Radija Satkula je so 2. julija zahajiła. Hač do kónca awgusta hišće so mustwa na potom dohromady dźewjeć stacijach wubědźuja. W małej seriji tu jednotliwe hrajnišća předstajamy.
Miłoćicy (SN/pdź). W Budyskej Sprjewinej kupjeli wubědźowaše so minjenu póndźelu zaso 16 mustwow w bičwolejbulu. Běše to poslednja stacija Satkula-bičtury do wulkeho finala w Miłoćicach. Přesadźił je so na kóncu cyłk Škit Budyšin, bjezdwěla jedyn z faworitow na cyłkowne dobyće. Dołhož so bičwolejbulowa tura Radija Satkula po Łužicy wotměwa, zarjaduja jeje finalne wubědźowanje w Miłočanskej Bobkec jěchanskej hali. Tam wubědźuje so stajnje 20 mustwow na dwěmaj hrajnišćom wo pokal młodeje žołmy Satkula.
Krótkopowěsće (23.08.19)
Wudospołnjenje trěbne
Drježdźany. Sakscy Zeleni sej žadaja, zo maja so srědki za strukturnu změnu nastupajo kónc wudobywanja brunicy krok po kroku wupłaćeć. Woni kritizuja, zo maja so w prěnjej spěchowanskej dobje hač do lěta 2026 miliardy eurow wudać, bjez toho zo su woprawdźite postupy při rozžohnowanju z brunicu nuzne wuměnjenje. To je hakle wot lěta 2027 předwidźane.
Wjace kursow pólšćiny
Frankfurt nad Wódru. Wjace kursow pólšćiny chcedźa w Frankfurće nad Wódru poskićeć. W šulach měli dalše poskitki nastać, kaž stej braniborske kubłanske ministerstwo a město wčera wozjewiłoj. Dobre susodstwo je po słowach kubłanskeje ministerki Britty Ernst (SPD) wutrobna naležnosć krajneje politiki. Pólsku rěč sej přiswojić k tomu jara přinošuje.
Techniski unikat spřistupnjeny
Policija (22.08.19)
Muža z Nysy wućahnyli
Krušwica. Policiju a wohnjowu woboru wołachu předwčerawšim k namjeznemu mostej w Krušwicy. Tam dyrbjachu wochłódnjeneho muža bjez wědomja z Nysy wućahnyć. Sanitetarjo dowjezechu jeho do chorownje. Na pólskej stronje rěki namakachu policisća drastu muža, ale žane dokumenty wo jeho identiće. W chorowni so pozdźišo wukopa, zo jedna so při wuchowanym wo 85lětneho pólskeho staćana, za kotrymž policija hižo pytaše.
Přepodadźa nasćěnowy wobraz
Chrósćicy (SN). Štóž ze Zejic do Chrósćic jědźe, je minjene dny zawěsće hižo nowu atrakciju wsy widźał, mjenujcy wulki nasćěnowy wobraz na Kralec statoku. Nimale tři tydźenje je Berlinski grafikar Šćěpan Hanuš na kromje Chrósćic dźěłał a wobraz „Serbske potajnosće“ stworił. Je to dobyćerski projekt krajneho wjesneho kuratorija we wobłuku wubědźowanja sakskeho ministerstwa za wobswět a ratarstwo „Ideje za wjesnu kónčinu“. Nastata twórba njewabi jenož wóčko, ale pohnuwa zdobom k rozmyslowanju wo hódnotach, žiwjenskim nastajenju a socialnych poćahach. Wobraz chcedźa jutře w 13 hodź. přepodać. Přitomni budu nimo Šćěpana Hanuša statny sekretar dr. Frank Pfeil, Chróšćanski wjesnjanosta Marko Kliman (CDU), jednaćel krajneho wjesneho kuratorija Peter Neunert a dalši hosćo. Tež zajimcy su wutrobnje witani.
Na čitanje a wodźenje
Napjatosć dale wostanje
W nowej legislaturje budu w Rakecach horco diskutować
Rakecy (JK/SN). Nimale tři měsacy po komunalnych wólbach je so tež Rakečanska nowa gmejnska rada k swojemu konstituowacemu posedźenju zešła. Wčera móžeše wjesnjanosta Swen Nowotny (CDU) přitomnych dwanaće čłonow rady spřisahać. Třo zamołwjeni čłonojo złoža spřisahu na přichodnym posedźenju. Komunalne wólby w meji njejsu so na politiske poměry w gmejnskim parlamenće bytostnje wuskutkowali. Wutworiłoj stej so w radźe dwě frakciji, a to Zjednoćenstwo swobodnych wolerjow a frakcija CDU. Nimo toho budźetaj dwaj čłonaj rady jako jednotliwcaj w gmejnskej radźe skutkować, jedyn z njeju je zastupjer AfD. Tale strona móhła po wólbnym wuslědku samo dwě městnje w gmejnskim parlamenće wobsadźić, k wólbam pak bě jenož jednoho kandidata nastajiła.
