Bórze zahaja nowu sezonu

wutora, 26. měrca 2019
artikl hódnoćić
(0 )
W Klětnjanskim přistawje Bjerwałdskeho jězora trjebaja tuchwilu tójšto tonow šotra za přistawnišćo pasažěrskeje łódźe, kotraž ma tam přichodnje mjez Hamorom, Klětnom  a Delnim Wujězdom jězdźić.  Foto: Joachim Rjela W Klětnjanskim přistawje Bjerwałdskeho jězora trjebaja tuchwilu tójšto tonow šotra za přistawnišćo pasažěrskeje łódźe, kotraž ma tam přichodnje mjez Hamorom, Klětnom a Delnim Wujězdom jězdźić. Foto: Joachim Rjela

Při Bjerwałdskim jězoru jako naj­wjetšim Sakskeje zahaja přichodnu póndźelu lětušu wodosportowu sezonu­. Lubowarjo tajkich aktiwitow na to hižo dawno čakaja.

Hamor (AK/SN). Wodosportowu sezonu 2019 při Bjerwałdskim jězoru tuchwilu z połnej paru přihotuja. To podšmórny Hamorski wjesnjanosta Achim Junker (CDU) na zašłym posedźenju tamnišeje gmejnskeje rady. „Přichodne dny a tydźenje naša infrastrukturna skupina wšitke připrawy za turizm přihotuje. To nastupa jednotliwe wotrězki přibrjohow, syć kolesowanskich šćežkow, zjawne płuwace pontony, zjawne nuzniki a turistiski informaciski centrum“, Junker rozłoži. Póndźelu, 1. apryla, nowu wodosportowu sezonu oficialnje zahaja.

Hižo nazajtra wotměje so přichodne zetkanje turistiskeho stajneho blida Hamorskeje gmejny, a to w 17 hodź. w tu­ristiskim informaciskim centrumje při jězoru. Tam chcedźa „Turistiski koncept Bjerwałdski jězor 2025“ předstajić. Jednaćelka turistiskeho zwjazka Łužiska jězorina Kathrin Winkler porěči wo wuwiću łužiskeje jězoriny a jeje strategiskim wusměrjenju. Stephan ­Rohde ze sakskeje statneje kenclije informuje samsny dźeń wo planowanym wuwiću Łužicy za wjace rozrosta a dźěła.

Kaž wjesnjanosta Hamora Achim Junker­ dale informowaše, je wichor „Eberhard“ w nocy na 11. měrc płuwanske pontony w Klětnjanskim přistawje zdźěla wobškodźił. Najnuzniše repara­tury drje su hižo přewjedli, dalše pak su hišće trěbne. Kak měli je financować, wo tym chcedźa so na přichodnym pose­dźenju gmejnskeje rady dojednać.

Po zahajenju wodosportoweje sezony chcedźa při Bjerwałdskim jězoru 15. meje lětušu kupansku sezonu zahajić. Přichodnej wjerškaj budźetej 27. apryla. Tón dźeń dopołdnja chcedźa w Klětnjanskim přistawje sportowe čołmy z pomocu krana do wody pušćić. Samsny dźeń wotměje so wot 10 do 17 hodź. dźeń wotewrjenych duri we wódnej wuchowanskej straži. Wobaj terminaj wotmějetej so we wobłuku jězorinoweju dnjow, na kotrejž přeproša 27. a 28. apryla. Při tej składnosći změja w Klětnom dźeń wotewrjeneho přistawa, we Wochožanskim parku błudźenkow pak poskića wosebite wodźenja.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND