Druhi raz po lěće 2007 je Njebjelčanska gmejna minjenu sobotu na dźěłarničku přichoda přeprosyła. Kaž bě zhonić, chcedźa podłu pólnych pućow štomy a kerki nasadźeć.

Njebjelčicy (SN/at). Na docpěte zhladować a nowe zaměry gmejnskeho wuwića rozjimać, to bě zaměr dźěłarnički přichoda, kotruž je gmejna Njebjelčicy minjenu sobotu přewjedła. 25 wobdźěl­nikow poda so do dźěła, mjez nimi dr. Fabian Jacobs a dr. Robert Lorenc ze Serbskeho instituta a zastupjerjej hibanja „Wsy w zazběhu (Dörfer im Aufbruch)“ a Leibnizoweho instituta. Nimo Wěteńcy běchu wšitke wjesne dźěle zastupjene, čłonojo Serbskopazličanskeho młodźinskeho kluba runje tak kaž ze sportoweho zjednoćenstwa abo towarstwa Kamjenjak, a gmejnscy radźićeljo.

Wupisaja znowa myće

Budyšin. Maćica Serbska wupisa znowa dorostowe myto za Hornju kaž tež za Delnju Łužicu. To je předsydstwo towarstwa wčera wobzamknyło. Wopisanje mytow přichodne dny šulam a dalšim kubłanišćam rozesćelu a internetnje spřistupnja. Dale gremij wobžaruje, zo njejsu delegaća hłowneje zhromadźizny Domowiny kónc měrca namjet Maćicy přiwzali, zdźěłać analyzu a koncept wo přichodźe Budyskeho Serbskeho domu.

Pruwowanja zahajene

Budyšin/Drježdźany. Za nimale 11 000 maturantow w Sakskej je so wčera čas pruwowanjow zahajił. Jako prěnje běchu woni w předmjeće geografija wužadani. Na Budyskim Serbskim gymnaziju maja 74 maturantow. Pruwowanje w serbšćinje – w njej da so lětsa 13 dwanatkarjow pisomnje a 20 ertnje pruwować – budźe 30. apryla. Wot 7. do 27. meje budu po wšej Sakskej ertne pruwowanja.

Muzej čěsko-němskich poćahow

Do nakładneho awta zrazył

Trjebjeńca. Ćežke wobchadne njezbožo sta so dźensa rano na zwjazkowej dróze B 6 w Trjebjeńcy (Steindörfel) pola Bukec. Tam chcyše wodźer motorskeho před nim jěduce nakładne awto přesćahnyć, jako wón z dotal njeznateje přičiny wotzady do njeho zajědźe. Na to zrazy z połnym wotmachom do napřećo přijěduceho LKWja. Při zražce so motorske dospołnje skóncowa, jeho wodźer wosta z ćežkimi zranjenjemi na puću ležo. Přiwołany nuzowy lěkar jeho na městnje zastara, pozdźišo dowjezechu muža do chorownje. Zwjazkowa dróha bě wjacore hodźiny dospołnje zawrjena, tak zo dóńdźe w rańšim powołanskim wobchadźe k dołhim rynkam čakacych awtow.

Budyšin (SN). Z njeskutkomaj, kotrejž stej so loni srjedź lěta we Wojerecach stałoj, ma so wot jutřišeho Budyska wotnožka Zhorjelskeho krajneho sudnistwa zaběrać. Wobskorženemu wumjetuja ćežke rubježne wudrěwanje a pospytne wosebje ćežke rubježne wudrěwanje.

Kaž we wobskóržbym pismje statneho rěčnistwa rěka, bě muž 12. junija 2018 wokoło připołdnja zakukleny do předawanišća tankownje při zwjazkowej dróze B 97 we Wojerecach zastupił. Hrožo z pistolu sej wón tam pjenjezy žadaše. Hladajo na masiwne hroženje jemu přistajeny tankownje 450 eurow z dnjowych dochodow přepoda.

Dwaj dnjej pozdźišo poda so muž popoł­dnju z CD-playerom, kotryž kaž samopaslena bomba wupadaše, do wotnožki Wojerowskeje lutowarnje. Přitomnymaj přistajenymaj skućićel po zmysle rjekny: „Mataj połdra mjeńšiny chwile, potom tole jowle rozbuchnje.“ Sobudźěłaćerce pak mužej žane pjenjezy njepřepodaštej, ale so do zadnich rumnosćow lutowarnje wotsalištej.