Rakecy (SN). Strowotniski centrum w Rakecach wobsteji mjeztym lěto a přeproša jutře, 28. septembra, wot 10 hodź. na dźeń wotewrjenych duri. Předstajić chcedźa so wudźeržowarjo praksow ze swojimi poskitkami.

Dźěłarnička k modźe

Budyšin (SN). Pod hesłom „Sorbian street style live“ wotměje so sobotu 5. winowca, dźěłarnička za młodostnych w Serbskim muzeju na Budyskim hrodźe kaž tež w rumnosćach Dźiwadła na hrodźe. Wot 10.30 do 13 hodź a wot 14 do 16.30 hodź. poskića tam zajimawe akcije kaž fotoshooting, styling, bodypainting, graffiti, urban dance, 3D-modelěrowanje při kompjuteru, zhotowjenje parličkowych accessoirow a upcycling. Zajimcy měli so hač do 1. oktobra přizjewić. Informacije k tomu dóstanu na stronje www.sorbisches-museum.de.

Rostlinska bursa w parku

„Jeli njechwatamy, da móžemy hnydom zběhanku swjećić.“ A woprawdźe: Rakečanska wuchowanska straža je hižo cyły čwak rostła, štož hewak při połoženju zakładneho kamjenja z wašnjom njeje.

Rakecy (UM/SN). Udo Wićaz (CDU), 1. přirjadnik Budyskeho krajneho rady, je wčera runje k tej přiležnosći přeprosył. Twarić přiwšěm hišće tójšto dyrbja, klětu kónc lěta je přepodaće straže předwidźane. „Tuchwilnu wuchowansku stražu běchu srjedź 90tych lět na ležownosći starownje natwarili, tohodla wona dźensnišim žadanjam hižo njewotpowěduje“, Wićaz wuzběhny.

Pódlanske twarjenje so paliło

Budyšin. Na kromje Budyskeje Stieberoweje a Dr. Jordanoweje je so wčera wječor pódlanske twarjenje bydlenskeho domu paliło. Kaž policija zdźěli, bu woheń po wšěm zdaću zamiškrjeny. Šěsć wobydlerjow dyrbjachu ewakuować. Woni a třo přiwołani policisća dyrbjachu na přepytowanje do chorownje, dokelž wobsteješe strach zajědojćenja kura dla. Wohnjowi wobornicy płomjenja zhašachu, wěcna škoda wučinja něhdźe 5 000 eurow.

Wulku sumu pjenjez pokradnyli

Malešecy. W nocy na srjedu su paduši w Malešecach z běrowa bydlenskeho domu při Lubijskej wodźe 3 500 eurow, bankowu kartu a kožanu tobołu z dokumentami spakosćili.

Njebjelčanska gmejnska rada wuhibki za rjadowane twarjenje stajiła

Njebjelčicy (JK/SN). Wobydlerjo Pěskec, Wěteńcy a Serbskich Pazlic dóstanu přichodne dny póštu wot gmejny. Woni su namołwjeni, naćisk za wujasnjenske wustawki k swojim wsam pruwować a jim přihłosować abo trěbne dodawki podać. W mjenowanych wustawkach dźe wo to rjadować, kak a hdźe hodźi so na wsach twarić, kak daloko saha nutřkowny wob­twarjenski wobłuk a što wonkowny wopřijima. K tomu poda twarski fachowc gmejny Gilles Buitel na wčerawšim posedźenju Njebjelčanskich gmejnskich radźićelow dosć nazorne rozjasnjenja ke kóždej jednotliwej wsy. Radźićeljo na to jednohłósnje wobzamknychu, do tohole za gmejnu a wjesne dźěle wažneho rozsuda zapřijeć bjezposrědnje potrjechenych wobydlerjow. Najpozdźišo na decemberskim posedźenju chcedźa potom wujasnjenske wustawki wobzamknyć a tak za rjadowane twarjenje na wsach puć runać.