Narć (SN/JaW). Cyłkownje 24 nowych wohnjowobornych a zasadźenskich jězdźidłow za katastrofowy škit su minjeny štwórtk w Narćanskej Krajnej wohnjowobornej šuli wokrjesam a bjezwokrjesnym městam přepodali. Hłownje jedna so při tym wo hašenske kaž tež gratowe awta. Flota ma hódnotu cyłkownje 7,6 milionow eurow, zdźěli sakske nutřkowne ministerstwo w nowinskej informaciji.
Z nowymi awtami narunaja stare a dodźeržane wozy wohnjowych woborow a katastrofoweho škita w swobodnym staće. Tak dóstanu mjez druhim wohnjowe wobory w Čornym Chołmcu, Ptačecach, Kulowje, Rěčicach a Slepom stajnje po jednym tankowym hašenskim jězdźidle TLF 4 000. Je to specialne jězdźidło, zasadźomne předewšěm při lěsnych wohenjach. Wšako ma wone tank za cyłkownje 4 500 litrow wody za hašenje a dalše přidatne wuhotowanje z hašenskimi hadźicami a wjacorymi pryskawami.