Budyšin (SN/bn). Towarstwo Ekumeniski tachantski wobchod Budyšin chce k dźesatemu wobstaću swoje aktiwity rozšěrić. Wotnětka njeje předawanišćo wjace regularna knihownja, ale ma so ze zetkanišćom a zarjadowanišćom stać. „Nowowusměrjenje nima financne přičiny. Chcemy so prosće na naš zakładny nadawk koncentrować a ekumenisku wuměnu mjez křesćanami a tež z njekřesćanami spěchować. Wobchod ma přichodnje być předewšěm wukładne wokno cyrkwinskeho žiwjenja w Budyšinje a zdobom móst do města. Knihi změjemy dale w poskitku, při čimž pak so na regionalne publikacije, na přikład Ludoweho nakładnistwa Domowina abo křesćanskeho nakładnistwa Benno, wobmjezujemy“, rozłoži předsyda towarstwa dr. Peter-Paul Straube na nowinskej konferency minjeny štwórtk we wobchodźe na dróze Při Mjasowych jětkach.
Na kongresu Europasion byli
Budaörs. Skupina zastupnikow Chróšćanskeho pasionskeho towarstwa a Towarstwa Cyrila a Metoda je so wčera ze 34. mjezynarodneho kongresa Europasion w madźarskim Budaörsu nawróćiła. Tam zetkachu so cyłki europskeho zjednoćenstwa towarstwow, kotrež pasion předstajeja. Styki nawjazał bě předsyda TCM Jurij Špitank. W lěće 2025 chcedźa kongres w Chrósćicach přewjesć.
36. europske myto přepodali
Mišno. „Mysli – na čo twari Europa?“ bě tema lětušeho wubědźowanja wo 36. europske myto. Sakski krajny zwjazk Europa-unija Němska z.t. je šulerku Budyskeje wyšeje šule Maju-Fabienne Bluhm sobotu w Mišnjanskim gymnaziju Franziskaneum z jězbu do Brüssela wuznamjenił. Mjez dobyćerjemi běchu tež šulerjo Zakładneje šule při Boršći a Lessingoweho gymnazija Kamjenc.
Čěsko-němski fonds 20 lět
Spěšnosć měrili
Nowe Błohašecy. Na statnej dróze S 111 w Nowych Błohašecach je policija zawčerawšim spěšnosć měriła. Dowolenych je tam 50 km/h. Wot 2 600 kontrolowanych jězdźidłow bě 137 přespěšnje. Potrjecheni dyrbja w 111 padach warnowanski pjenjez zapłaćić, w 26 padach jedna so wo pokutu. Najspěšniši bě Ford ze 97 km/h. Šofer dyrbi nětko pokutu 200 eurow płaćić, dóstanje dwaj dypkaj w Flensburgu a dyrbi měsac nóžkować.
Budyšin. Na prěnje žonjace čaporowe wiki přeprošuja sobotu, 2. junija, do Budyskeje Montessoriskeje zakładneje šule na Tzschirnerowej. Wot 14 do 17 hodź. změja na Benowej žurli kubłanišća šěroki poskitk trjebanych wěcow wot žonow za žony. Wo ćělne derjeměće postaraja so z kofejom a tykancom.
W měsće zaso twarja
Budyšin. Hłuboko- a dróhotwarskich dźěłow na Dróze Clary Zetkin dla dóńdźe wot přichodneje srjedy w Budyšinje k poćežowanju nadróžneho wobchada při Mosće měra. Wobchad do města powjedźe hač do kónca julija přez Móst swjateho ducha. Z města won wjedźe puć nimo twarnišća. W prěnim tydźenju awgusta budźe dróha mjez Mostom měra a Leibnitzowej asfaltowanja dla dospołnje zawrjena. Šoferojo dyrbja potom po zapadnej tangenće jězdźić.
Wojerecy (AK/SN). 120 młodostnych je so tele dny na 24. sakskich mišterstwach młodźinskich wuchowanskich płuwarjow we Wojerowskej Łužiskej kupjeli a zwonka njeje wobdźěliło. Wubědźowanja wuhotowała je Wojerowska skupina wodoweje straže. Wobdźělnicy mějachu dohromady dźesać stacijow zmištrować. Při tym testowachu swoju teoretisku wědu wo prěnjej pomocy, nałožowachu ju praktisce a mějachu nimo toho wšelake płuwanske stafle zmištrować.
Budyšin (CK/SN). Kwota bjezdźěłnych ležeše po wšej Hornjej Łužicy w meji pola 6,7 procentow. Po wuprajenju šefa Budyskeje agentury za dźěło Thomasa Berndta je to najniša ličba, kotruž su w regionje hdy zwěsćili. Wokoło Kamjenca wučinja wona samo jenož 3,7 procentow. Z tak mjenowaneho „tučneho pasma“ wokoło Drježdźan profituja samo hač do Biskopic a Budyšina, dokelž je tam potrjeba za fachowcami wulka. Tež wobchadne zwiski su dobre. Při kwoće 11,6 pak bjezdźěłnosć w Zhorjelskej kónčinje porno tomu wjele pomałšo woteběra.
Tuchwilu je we wuchodnej Sakskej 19 300 žonow a muži jako bjezdźěłni přizjewjenych. To je 784 mjenje hač před měsacom a 1 551 mjenje hač před lětom. Přičina tohole wuwića je po měnjenju Thomasa Berndta typiske nalětnje wožiwjenje, hačrunjež zyma scyła tak kruta njebě. Nimo toho su po jeho měnjenju twarske firmy nawuknyli, zo je lěpje, sobudźěłaćerjow tež w zymje zdźeržeć. „W twarskej branši mjeztym płaći: štóž je jónu pušćeny, je preč“, rjekny Berndt.
Njeswačidło (JK/SN). Na wurjadnym posedźenju Njeswačanskeje gmejnskeje rady wobzamknychu tele dny z wjetšinu přitomnych radźićelow lětuši hospodarski plan. Po tym, zo běchu jón kaž je předpisane zjawnje wupołožili, njeběchu žane dodatki abo změny trěbne. Tak móža jón nětko Budyskemu krajnoradnemu zarjadej k pruwowanju zapodać. Zo budźe plan schwaleny, na tym wjesnjanosta Gerd Schuster (CDU) njedwěluje, hačrunjež je z horcej jehłu šity a njeskića rum za njewočakowane wudawki. Spokojom su radźićeljo, zo njebě trjeba za wurunany plan zwyšić dawki abo zarjadniske popłatki.
Do klěšćowych rizikowych kónčin słuša wot njedawna tež Budyski wokrjes. Po wšěm kraju je ličba tychle kónčin wo dźesać na 156 rozrostła. Tejele přičiny dla wyša lěkarka Steffi Duschinger z Hornjołužiskich klinikow tele dny na zjawnym forumje rozłoži, što to za wobydlerjow woznamjenja.