Krótkopowěsće (29.10.19)
Nowy Lětopis wušoł
Budyšin. Druhe wudaće Lětopisa 2019 wopřijima přinoški sympozija „Kito Lorenc mjez basnistwom a literarnej wědomosću“ prof. dr. Waltera Schmitza, prof. dr. Christiana Prunitscha a dr. Franca Šěna. Dalše temy su wuznam lěta indigenych rěčow za Němcow a Serbow, geografiske mjena w Delnjej Łužicy, Arnošta Mukowa „Statistika łužiskich Serbow“, serbstwo w sakskim domizniskim škiće 1896–1941 kaž tež serbscy noworěčnicy.
Wopušći Andreas Pabst SLA?
Budyšin. Po internych informacijach njebudźe Andreas Pabst w přichodnej hrajnej dobje 2020/2021 hižo z chórowym nawodu Serbskeho ludoweho ansambla. SLA nochcyše powěsć dotal ani dementować ani wobkrućić. Pabst bě zastojnstwo 2016 přewzał a zahaji w tym lěće nowy rjad „Mišterske twórby chóroweje hudźby“.
Wodźerjo busow trěbni
Policija (28.10.19)
Woheń w jastwje
Budyšin. Wčera rano je so w celi Budyskeho jastwa z dotal njeznateje přičiny paliło. Wjacore wohnjowe wobory z wokoliny běchu zasadźene. Kaž bu znate, je so jedna wosoba zraniła, kotruž na městnje lěkowachu. Policija pad přepytuje.
Diesel z awta wotklumpali
Słona Boršć. Kónc tydźenja běchu zaso raz paduši diesela po puću. Tak su w Słonej Boršći do tanka na arealu agrarneho drustwa wotstajeneho Lkw-ja dźěru točili a z njeho něhdźe sto litrow ćěriwa wotklumpali. Škoda: Wjac hač 200 eurow.
Wjelk znowa diskusiju zbudźił
Chcedźa ćišć na wulku politiku dale zesylnić
Róžant (SN/JaW). Wjelk je minjeny štwórtk prěni dźěl wuradźowanja gmejnskeje rady Ralbicy-Róžant bytostnje postajał. Zdźěla chětro emocionalnje diskutowachu wjesnjanosta Hubertus Ryćer (CDU), gmejnscy radźićeljo a wobydlerjo wo ćežach z rubježnym zwěrjećom.
Aktualne rěčne temy
Budyšin. „Pisany kaleidoskop rěčow“ wočakuje wšitkich zajimcow na zetkanju Budyskich wuchowarjow rěče jutře, wutoru, we 18 hodź. w Budyskej Sprjewinej pensiji. Diskutować chcedźa tam bjez přednoška wo aktualnych rěčnych temach. Hosćo su witani, tónraz předewšěm kritikarjo wuchowarjow rěče.
Wopomnjenski koncert SLA
Budyšin. Składnostnje 75. narodnin a prěnich posmjertnin loni w meji zemrěteho Detlefa Kobjele wopominatej chór a orchester Serbskeho ludoweho ansambla hudźbutwórca z wosebitym koncertom. Wěnować chcedźa so wuměłcy předewšěm sinfoniskemu tworjenju Kobjele, kiž bě wot 1990 do 1995 intendant ansambla, kaž tež jeho wuměłskim a chórowym spěwam. Tak zaklinčitej mjez druhim jeho uwertira „Błótowskeje operety“ a „Thornberg-Suite“ z baletneje opery „Fantazija na Lubinje“. Koncert wotměje so srjedu, 30. oktobra, w 19.30 hodź. na žurli Budyskeho SLA. Dźeń pozdźišo, štwórtk, 31. oktobra, jón w 16 hodź. na Choćebuskim Komornym jewišću wospjetuja.
„A klětu w Jerusalemje ...“
Katolski teologa dr. Michael Kleiner je w Smochćicach wo židowskich nałožkach a symbolach přednošował.
Smochćicy (CRM/SN). „Židowstwo přežiwi ze swěrnym swjećenjom sabata“, tak zjima farar dr. Michael Kleiner fenomen eksistency tak mjenowaneho „wuzwoleneho ludu Božeho“ hač do našeho časa. „Z krutej wěru a dodźerženjom swojich tradicijow dźě je lud wuhnanstwo do eksila, mnohe wulke přesćěhanja w běhu lěttysacow kaž tež genocid přežiwił.“ Dobry znajer Stareho zakonja přednošowaše tydźenja w Smochčanskim Domje biskopa Bena wo temje „Nałožki a zwoprawdźenje duchowneho žiwjenja w židowstwje“. Jeho přednošk kaž tež mnohe wot njeho předstajene eksponaty k židowskim wašnjam a ritualam nańdźechu tohorunja mjez serbskimi připosłucharjemi čiły wothłós.
Nazyma je čas kermušow, a tajku swjećachu wčera mjez druhim w ...
Nuzowe zwučowanje su wuchowarjo policije a wohnjoweje wobory sobotu w ...
Krótkopowěsće (28.10.19)
Wodźerjo po jězorinje prašani
Zły Komorow. Turistiski zwjazk Łužiska jězorina namołwja zajimcow, přizjewić so hač do 31. oktobra za kubłanje wodźerjow. Hišće su za to někotre městna. Wukubłanje wotměje so klětu wot januara do apryla stajnje pjatk popołdnju a sobotu. Tež ludźo, kotřiž čěšćinu abo serbšćinu rěča, móža so rady přizjewić. Nimo teoretiskich zakładow kołowokoło jězoriny su dźěłarnički předwidźane.
Dalše solarne připrawy LEAG
Choćebuz. Hórnistwowe a energijowe předewzaće LEAG wutwari swoje solarne připrawy za zdobywanje miliny. Přidatnje k dźesaćmegawattowemu solarnemu parkej Wjelcej III, kotryž chcedźa hišće lětsa syći připinyć, instaluje LEAG tři dalše fotowoltaikowe připrawy na třěchach swojich imobilijow w Choćebuzu a Lubnjowje, kaž koncern zdźěla.
Móst budu zběhać móc
Policija (25.10.19)
Zadobywanja do awtow so kopja
Pančicy-Kukow. Zo kriminelni serbske wsy njewobeńdu, wo tym swědči tónle pad z Pančic-Kukowa. Tam su njeznaći srjedu wječor na Hasy Ćišinskeho škleńcu Mercedesa rozbili a z njeho handy a móšnju spakosćili. Kaž policija zdźěli, bě šofer swoje awto jenož poł hodźiny wotstajił. Kriminalna policija je wšelake slědy skućićelow zawěsćić móhła a je tuchwilu hišće wuhódnoća. W tym zwisku wona na to skedźbni, zo w dalšich podobnych padach přepytuje. W minjenymaj tydźenjomaj su na Kamjenskim policajskim rewěrje hnydom dźesać zadobywanjow do awtow registrowali.
Wo mjeńšinach w Europje
Smochćicy. „Narod a mjeńšiny w Europje w 19. a 20. lětstotku“ je hesło wustajeńcy, kotruž wotewru wutoru, 29. oktobra, w 19 hodź. w Smochčanskim Domje biskopa Bena. Zajimcy su přeprošeni sej přehladku zhromadnje ze społnomócnjenym Swobodneho stata Sakskeje za naležnosće wuhnatych a přesydlencow dr. Jensom Baumannom wobhladać a jeho wuwjedźenja sćěhować.
Literarny dorost so předstaja
Budyšin. Na dźeń wotewrjenych duri su zajimcy jutře, 26. oktobra, wot 13 hodź. do Budyskeje dźěćaceje a młodźinskeje biblioteki přeprošeni. Nimo pokazki na to, kak móža dźěći bjez nowych medijow přežiwić, předstaja tam dorostowi awtorojo swoje prěnje literarne wupłody.
Rozpominanski wječor
Budyšin. Rozpominanski wječor z filmom přewjedu póndźelu, 28. oktobra, w 19 hodź. w Budyskim ekumeniskim tachantskim wobchodźe. Tón wječor pokazaja pask „blueprint“. Po tym maja wšitcy składnosć, wo feministiskej dramje so rozmołwjeć.
Na seminar FUEN
