Šěrši wid trěbny
Žiwu dwurěčnosć podpěrać
Budyski wokrjesny sejmik serbsku rozprawu krajneho rady rozjimał
Budyšin (SN/at). Rozprawa krajneho rady za lěto 2017 wo zwoprawdźenju wustawkow k zachowanju, spěchowanju a wuwiću serbskeje rěče a kultury w Budyskim wokrjesu bě wčera tema na posedźenju wokrjesneho sejmika. Kaž krajny rada Michael Harig (CDU) našemu wječornikej rjekny, su „při zestajenju předłohi z toho wuchadźeli, za čož smy zamołwići. Su to zarjadnišća wot Serbskeho šulskeho a zetkawanskeho centruma hač k Serbskemu muzejej.“
Krótkopowěsće (26.06.18)
Strach wohenjow woteběrał
Drježdźany. Strach lěsnych wohenjow su zamołwići statneho zawoda Sachsenforst w Hornjej Łužicy na schodźenk dwaj dele stopnjowali, wokoło Wojerec na schodźenk jedyn. To wuchadźa z karty na internetnej stronje zawoda. Za přičinu mjenuja chłódne a włóžne wjedro. Přichodne dny pak wočakuja woćoplenja a sucheho wjedra dla, zo strach wohenjow zaso přiběra.
Nowaj wokrjesnaj radźićelej
Budyšin. W Budyskim wokrjesnym sejmiku staj nowaj wokrjesnaj radźićelej, kotrejuž je krajny rada Michael Harig (CDU) na wčerawšim posedźenju spřisahał. W frakciji SPD/Zeleni naslěduje Günther Jahnel Uwe Blaszejczyka, kiž bě chorosće dla wo wuwjazanje z mandata prosył. Nowy čłon frakcije BMM je Jörg Anders, wón přewozmje městno chłostanskeho zasudźenja dla wotstupjeneho Martina Schwarza.
Serbske stawniske wěrowanja
Sławny barokny klóšter Nowa Cala wopytali
Před 750 lětami załoži Mišnjanski markhrabja Heinrich z domu Wettinow w delnjołužiskim sydlišću, kotrež so „słowinciske“ mjenowaše, klóšter Nowa Cala. Mniša přińdźechu ze Stareje Cale blisko Nossena. Zaměr bě, zdobyć tam sydlacy słowjanski kmjen za křesćanstwo. Tónle stawizniski pozadk kaž tež informacije wo skutkowanju Nowocalskich mnichow cistercienskeho rjadu při putniskej cyrkwi w Róžeńće zhonichu serbscy seniorojo Budyskeje tachantskeje wosady na njedawnej ekskursiji hižo w busu ducy do najwuznamnišeho barokneho srjedźišća w Braniborskej.
K jubilejej města koncertowali
Z wjesołym a zrudnym wóčkom
K róčnicy wohnjoweje wobory nowe hašenske jězdźidło předstajili
Ralbicy (aha/SN). Móhłrjec na dwójny jubilej zhladowachu kameradojo Ralbičanskeje wohnjoweje wobory wčera popołdnju z wjele zajimowanymi hosćimi. We wobłuku swjedźenja k 75. róčnicy wobory zhladowaše jeje nawoda Achim Měrćink na stawizny. Po tym zo bě 1878 zahubny woheń nimale poł Ralbic zničił, wutworichu tam wohnjowu woboru. Wo jeje dźěławosći w prěnich lětach přewjele znate njeje. Před 75 lětami, za čas Druheje swětoweje wójny 1943, bu na nastork tehdyšeho wjesnjanosty Jurja Zarjeńka dobrowólna Ralbičanska wohnjowa wobora oficialnje załožena. Prěni nawoda bě tehdy dlěši čas Michał Koplanski. Wulke zasłužby za wuwiće a wukony Ralbičanskeje wobory ma mjeztym 86lětny wyši wohnjowy wobornik Teodor Lepiorc. Hač do 2003 měješe Klaws Debik zamołwitosć za stajnu hotowosć Ralbičanskich kameradow a wot toho časa Achim Měrćink. Jeho mandźelska Antje so mjeztym dźesać lět wo dorost stara a dwutydźensce z 22 dźěćimi a młodostnymi trenuje. Woni wčera pokazachu, kak ma so zranjenemu po njezbožu spěšnje a prawje pomhać.
Policija (25.06.18)
Kupcej z nožom hrozył
Rakecy. Policiju wołali su sobotu připołdnju do Rakečanskeje kupnicy, dokelž sej tam 40lětny muž worjechi a aprikozy słodźeć daše, kotrež scyła zapłaćił njebě. Nimo toho nadawaše wón přistajenym a kupcam wudma. Po tym zo bě jeho jedyn z kupcow won přewodźał, jemu 40lětny samo z nožom hrožeše. Kaž policajska direkcija zdźěli, je muž policiji hižo dlěje znaty.
Přepodadźa nowu připrawu
Wojerecy. Za kamele, lamy a wósliki we Wojerowskim zwěrjencu přepodadźa jutře, wutoru, w 10 hodź. nowu připrawu. Wulkomyslny teren wupřestrěwa so wot tuchwilneho městna za lamy hač k bywšemu domej za lawy. Připrawa je dohromady 2 300 kwadratnych metrow wulka a skići zwěrjatam samo wosebite městno za kupanje.
Čitataj z politiskeho krimija
Budyšin. Awtoraj Gerlinde a Harald Niederreiter čitataj jutře, wutoru, w 19 hodź. w Budyskej měšćanskej bibliotece ze swojeho politiskeho krimija „Schwarzer Halbmond“. W nim tematizujetaj ćmowy kapitl młódšich stawiznow, jako je Francoska w lěće 2015 pod terorom ćerpjeła. W swojej knize zapřijimataj swójske dožiwjenja a wobkedźbowanja. Wědomostnik a zastojnica UNO staj mjez druhim w USA, Jamaice, Singapurje a Sawdi-Arabskej dźěłałoj a bydliłoj.
Zaběraja so z truskalcu
Klanki jako swójbny projekt
Lubowarjo klankow najwšelakorišeho razu měli sej na jednym z přichodnych kóncow tydźenja do Noweho Města nad Sprjewju dojěć. Štož tam wuhladaš, je zawěrno njewšědne.
Nowe Město (Jos/SN). Wot europskeho zetkanja Nowych Městow lěta 2009 zwostachu nimo fotow jenož hišće wosobinske dopomnjenki. Tehdy běchu wobydlerjo namołwjeni, z kreatiwnymi ideje swjedźeń wobohaćić. Mnozy swój statok wočinichu a poskićichu pražene swinjo, pokazachu narodnu drastu abo hudźachu. Wšo to je nimo. Ale nic pola Nicole Peto na Wjesnej 29. W lěće 2009 je wona ideju zrodźiła swoju zběrku klankow raz zjawnje pokazać. Z toho nasta nětko bjez přetorhnjenja kóždolětna atrakcija w lěću jako zhromadny swójbny projekt. Za nju horja so mali runje tak kaž wulcy lubowarjo klankow.
Mjeztym zo bě na zetkanju Nowych Městow něhdźe 1 500 klankow widźeć, budźe jich lětsa wjace hač 3 000. Cyłkowna zběrka młodeje žony je mjeztym na něhdźe 4 500 klankow rozrostła. Wo tónle wobjim staraja so zwjetša wopytowarjo sami, kotřiž swoje klanki přewostajeja abo je do Noweho Města sćelu.
