Policija (05.11.19)
Lochkomyslnosć k njezbožu wjedła
Prěčecy. Na statnej dróze S 100 mjez Prěčecami a Lejnom je wčera wječor něhdźe w 21.30 hodź. lochkomyslnosće dla k njezbožu dóšło. Jako do směra na Kamjenc jěducy šofer Seata transporter a tež hišće Lkw přesćahny, zrazy wón w křiwicy do napřećo přijěduceho awta. Jeho šoferka so při zražce ćežko zrani, a dyrbjachu ju do chorownje dowjezć. Dokelž chcyše so zawinowar njezboža awtu žony hišće wuwinyć, prasny wón ze swojim Seatom tež hišće zboka do Lkw-ja. Statna dróha S 100 bě hač do połnocy dospołnje zawrjena.
Awto so dospołnje wupaliło
Ohorn. Wčera připołdnju je so na awtodróze A 4 mjez Połčnicu a Ohornom wosobowe awto paliło. Šofer móžeše je hišće na pobóčnu čaru wodźić a wulězć. Byrnjež wohnjowa wobora spěšnje na městnje była a hašała, je so jězdźidło dospołnje wupaliło.
„Serbski rekwiem“
Ketlicy. Za předstajenje „Serbskeho rekwiema“ Korle Awgusta Kocora njedźelu, 10. nowembra, w 16 hodź. w Ketlicach móža sej zajimcy zastupne lisćiki kupić. Dóstanu je na Keltličanskej kaž tež na Lubijskej ewangelskej farje, w Lubijskej měšćanskej informaciji a w tamnišim fachowym wobchodźe Kessner.
Seminar wo złu w bibliji
Smochćicy. Smochčanski Dom biskopa Bena přeproša na seminar pod hesłom „Biblija a ... zło“. Tón wotměje so wot pjatka do njedźele, 8. do 10. nowembra. Hłownje póńdźe pod nawodom referenta Ansgara Hoffmanna wo to, što Swjate pismo wo djabole, Luciferu a satanje podawa a zwotkel Boži přećiwnicy pochadźeja. Předznajomosće za seminar njejsu trěbne.
Kartki za schadźowanku
Budyšin. Wot dźensnišeho su zastupne lisćiki za lětušu schadźowanku na předań. Kupić móžeće sej je jeničce při kasy Němsko-Serbskeho ludoweho dźiwadła w Budyšinje. Jenož tam přiwozmu tež skazanki za blida za zabawu po programje. Schadźowanka budźe 23. nowembra znowa w NSLDź, lětsa pak tam telko městnow za blidami kaž loni njezměja. K rejam budźe nowa projektowa kapała piskać.
Nazymske wožiwjenje
W Hornjej Łužicy bě w oktobrje 16 078 ludźi bjez dźěła. To je 210 mjenje hač minjeny měsac a 1 784 mjenje hač loni w samsnym času. Šef Budyskeje agentury za dźěło Thomas Berndt rěčeše wo nazymskim wožiwjenju na dźěłowych wikach, kotrež je tež hišće „zlochka přećiwo trendej“ w aktualnym konjunkturnym woprašowanju.
Budyšin (CK/SN). Při kwoće bjezdźěłnosće třoch procentow w Kamjenskim regionje móža samo wo połnodźěle rěčeć. To zaleži na bliskosći k Drježdźanam a na nowozasydlenju firmow kaž Deutsche Accumotive z 1 800 dźěłaćerjemi. We Wojerecach wučinja kwota 6,6 a w Běłej Wodźe 7,0 procentow. Jenož w Zhorjelcu leži wona z 10,3 procentami w dwucyfrowym wobłuku. Při čimž su tež tam małe pomjeńšenje ličby bjezdźěłnych zregistrowali. Město drje je atraktiwne, tak zo wobydlerjo wokolnych gmejnow přićahuja, njeje pak dosć dźěłowych městnow, rjekny Thomas Berndt.
Adwentna přehladka hižo wabi
Krótkopowěsće (05.11.19)
Wo žiwjenju z industriju
Düren. Jürgen Maćij je z cyklusom wo wotbagrowanju serbskeje wsy Liškowka we wobłuku fotoweje wustajeńcy „Wo žiwjenju w industrijnych krajinach“ zastupjeny. Přehladka je hač do 16. februara 2020 w Leopolda Hoeschowym muzeju sewjerorynsko-westfalskeho města Düren widźeć. Hoeschowy muzej kooperuje z Braniborskim krajnym muzejom za moderne wuměłstwo w Choćebuzu.
Přeje sej sensibelnosć
Berlin. Spěwarka skupiny Silbermond Stefanie Kloß z Budyšina přeje sej 30 lět po přewróće sensibelny wobchad ze začućemi wobydlerjow na wuchodźe Němskeje. „To je błuzna, kotruž dyrbiš hladać, zas a zaso“, rjekny Kloß powěsćerni dpa. Biografije ludźi a swójbow su so změnili. Mnohim so po přewróće lěpje dźe, někotrym pak tež nic.
Wozydła pola Hentschke so palili
Policija (04.11.19)
Do twarjenja firmy so zadobyli
Njeswačidło. W nocy na njedźelu su so njeznaći na wobhrodźenu płoninu a do twarjenja firmy při Njeswačanskej tankowni namócnje zadobyli. Kaž policija zdźěla, běchu skućićeljo w běrowach firmy wšitko za móžnej rubiznu přepytali a přeborkali kaž tež wšitke kasy a špinty zwočinjeli. Při tym načinichu škodu něhdźe tysac eurow. Spakosćili pak su po zdźělenju zastojnikow jenož dotal hišće njeznate mnóstwo cigaretow. Kriminalna policija pad přepytuje.
Najzašo za štyri lěta započnu
Wojerecy (AK/SN). Město Wojerecy wojuje dale wo bjezbarjerny přistup za zbrašenych na tamniše dwórnišćo. To potwjerdźi Wojerowski wyši měšćanosta Stefan Skora (CDU) tele dny měšćanskej radźe. „Němska železnica je mjeztym předplanowanje za polěpšenje poměrow za zbrašenych na dwórnišću we Wojerowskim starym měsće do nadawka dała“, rozłoži wón radźićelam w aktualnej informaciji. „Ze stron železnicy su hižo srjedźodobnje 3,5 milionow eurow za to zaplanowali.“
Błóta wuměłču inspiruja
Nakupowanska nóc w Budyšinje tež ze serbskimi poskitkami
Budyšin (CS/SN). Nakupowanska nóc Romantica je lětsa znowa tysacy zajimcow pod hesłom „błyšć w bajkowym lěsu“ do sprjewineho města zwabiła. Tež serbske institucije su so wobdźělili. Serbski ludowy ansambl přeprošowaše z čitanjom Olafa Haisa wo worakawstwach Maksa a Morica, Budyski Serbski muzej poskići wodźeni po wustajeńcy „Sorbian Street Style“.
Z nimale hodźinskim programom předstaji so na žurli Serbskeho domu delnjołužiski chór Łužyca z Choćebuza na nazymskim koncerće něhdźe 50 zajimcam. Pod nawodom Lubiny Žurec-Pukačoweje zaklinčachu hornjo- a delnjoserbske kaž tež pěsnje našich słowjanskich susodow mjez druhim z Pólskeje, Čěskeje, Ukrainy a Chorwatskeje. Spěwali su samo w starosłowjanšćinje.
Benedikt Dyrlich w rozmołwje
Stróža. Serbski spisowaćel a publicist Benedikt Dyrlich předstaji zajutřišim, srjedu, 6. nowembra, w 19 hodź. w Stróžanskim (Wartha) Domje tysac hatow prěni dźěl swojeje němskorěčneje knihi „Doma we wućekach“. W njej wopisuje swój njelochki žiwjenski puć a swoje skutkowanje w NDR. Po tym maja wšitcy składnosć z awtorom so rozmołwjeć.
Dalši žarowanski kruh
Chrósćicy. Žarowanskaj přewodźerjej Regina Krawcowa ze Smječkec a Tomaš Pěčka ze Sernjan poskićataj zhromadnje z dr. Ludmilu Lajderowej z Drježdźan po lońšim zazběhu dalši serbski žarowanski kruh. Prěnje zetkanje budźe štwórtk, 7. nowembra, w 17 hodź. w Chróšćanskej putniskej hospodźe. Dalši termin je tři njedźele pozdźišo. Předwidźane je, zo so žarowanski kruh hač do spočatka apryla wosom króć zetka. Zajimcy měli so pod telefonowym čisłom 01 74 / 7 01 94 87 přizjewić.
