K jubilejomaj poćehnje swjedźenski ćah po wsy
Wulka Dubrawa (HN/SN). Dwaj jubilejej stej přičina, zo přichodny kónc tydźenja we Wulkej Dubrawje wulce swjeća. Tam spominaja na 675. róčnicu prěnjeho pisomneho naspomnjenja wsy a na 20lětne wobstaće partnerstwa z pólskej gmejnu Nowogrodziec. W jednotliwych wsach Wulkodubrawskeje gmejny běchu w zašłosći časćišo wjetše swjedźenje organizowali, kaž na přikład Holanski swjedźeń w Komorowje. Nětko je potajkim hłowna wjes sama na rjedźe. A tam su sej wjele předewzali.
Přichodna sobota steji cyle w znamjenju sporta. Program wopřijima kehelersku dypkowu hru prěnjeho mustwa muži, koparske hry młodźiny a muži, pjasćobul a blidotenis. Nimo toho poskića najwšelakoriše zaběry za dźěći. W 13 hodź. wotewru we wodowej wěži wustajeńcu wo stawiznach Wulkeje Dubrawy, kotruž je spěchowanske towarstwo Margarećineje hěty zestajiło. Cyły dźeń předstaja so wjesne towarstwa kaž tež hosćo z pólskeje partnerskeje gmejny. Wječor přizamknje so swjedźenske zarjadowanje z rejemi w stanje.
Z rukami widźeć
Budyšin. Składnostnje dnja špatnje widźacych poskići Muzej Budyšin zajutřišim, srjedu, wosebite dožiwjenje. Špatnje widźacy a slepi změja we wobłuku wosebiteju wodźenjow składnosć, wubrane objekty přimnyć a je na te wašnje spóznać. Wodźeni započnjetej so w 10 a 13 hodź. Zastupny lisćik do muzeja płaći regularnje 3,50 eurow. Wšitcy špatnje widźacy zajimcy móža so za potuńšeny zastup 2,50 eurow na wodźenju wobdźělić. Wobmjezowaneje kapacity dla chcedźa špatnje widźacym prěnjorjadnje wobdźělenje zmóžnić.
Zabyte znowa wotkryć
Policija (04.06.18)
Kolesowar smjertnje znjezbožił
Zhorjelc. Tragiske wobchadne njezbožo sta so sobotu wječor při Bartonjanskim jězoru pola Zhorjelca. Kaž policajska direkcija zdźěli, jědźechu tam třo kolesowarjo na puću horu dele. Při tym so dwaj z nich wotboka dótknyštaj, na čož wobaj padnyštaj. Mjeztym zo so 57lětny muž jenož tróšku wobodrě, so jeho 51lětny přewodźer ćežko zrani. Byrnjež jeho wožiwić spytali, je wón hišće na městnje njezboža wudychał.
Wobornicy puć rjedźić dyrbjeli
Strukturny koncept wotpokazali
Město Běła Woda dotal žadyn schwaleny hospodarski plan za lěto 2018 nima. Za to dyrbja najprjedy hospodarski strukturny koncept wobzamknyć. Wo tym pak hižo poł lěta diskutuja.
Běła Woda (AK/SN). Hospodarske połoženje Běłeje Wody wostanje dale přewšo napjate. To podšmórny wyši měšćanosta Torsten Pötzsch (Klartext) na zašłym posedźenju měšćanskeje rady. Wjetšina jeje čłonow je po kontrowersnej diskusiji předpołoženy hospodarski strukturny koncept za čas wot 2018 do 2020 wotpokazała. Mjeztym zo chcyše wyši měšćanosta wo kóždej jednotliwej lutowanskej naprawje wothłosować dać, přesadźi so namjet, wo strukturnym koncepće jako cyłku wothłosować.
Nowowusměrjenje w tachantskim wobchodźe
Budyšin (SN/bn). Towarstwo Ekumeniski tachantski wobchod Budyšin chce k dźesatemu wobstaću swoje aktiwity rozšěrić. Wotnětka njeje předawanišćo wjace regularna knihownja, ale ma so ze zetkanišćom a zarjadowanišćom stać. „Nowowusměrjenje nima financne přičiny. Chcemy so prosće na naš zakładny nadawk koncentrować a ekumenisku wuměnu mjez křesćanami a tež z njekřesćanami spěchować. Wobchod ma přichodnje być předewšěm wukładne wokno cyrkwinskeho žiwjenja w Budyšinje a zdobom móst do města. Knihi změjemy dale w poskitku, při čimž pak so na regionalne publikacije, na přikład Ludoweho nakładnistwa Domowina abo křesćanskeho nakładnistwa Benno, wobmjezujemy“, rozłoži předsyda towarstwa dr. Peter-Paul Straube na nowinskej konferency minjeny štwórtk we wobchodźe na dróze Při Mjasowych jětkach.
Porjedźenka
Krótkopowěsće (04.06.18)
Na kongresu Europasion byli
Budaörs. Skupina zastupnikow Chróšćanskeho pasionskeho towarstwa a Towarstwa Cyrila a Metoda je so wčera ze 34. mjezynarodneho kongresa Europasion w madźarskim Budaörsu nawróćiła. Tam zetkachu so cyłki europskeho zjednoćenstwa towarstwow, kotrež pasion předstajeja. Styki nawjazał bě předsyda TCM Jurij Špitank. W lěće 2025 chcedźa kongres w Chrósćicach přewjesć.
36. europske myto přepodali
Mišno. „Mysli – na čo twari Europa?“ bě tema lětušeho wubědźowanja wo 36. europske myto. Sakski krajny zwjazk Europa-unija Němska z.t. je šulerku Budyskeje wyšeje šule Maju-Fabienne Bluhm sobotu w Mišnjanskim gymnaziju Franziskaneum z jězbu do Brüssela wuznamjenił. Mjez dobyćerjemi běchu tež šulerjo Zakładneje šule při Boršći a Lessingoweho gymnazija Kamjenc.
Čěsko-němski fonds 20 lět
Policija (01.06.18)
Spěšnosć měrili
Nowe Błohašecy. Na statnej dróze S 111 w Nowych Błohašecach je policija zawčerawšim spěšnosć měriła. Dowolenych je tam 50 km/h. Wot 2 600 kontrolowanych jězdźidłow bě 137 přespěšnje. Potrjecheni dyrbja w 111 padach warnowanski pjenjez zapłaćić, w 26 padach jedna so wo pokutu. Najspěšniši bě Ford ze 97 km/h. Šofer dyrbi nětko pokutu 200 eurow płaćić, dóstanje dwaj dypkaj w Flensburgu a dyrbi měsac nóžkować.
