Ryby za dobry zaměr předawali
Wažne dźěło wujednanja
Ludowy zwjazk staraćelstwa wo němske wójnske rowy wobsteji 100 lět
Wojerecy (AK/SN). „Ludowy zwjazk staraćelstwa wo němske wójnske rowy wukonja intensiwne wobstajne dźěło za wopominanje, měr a dorozumjenje ludow.“ To wuzběhny Wojerowski wyši měšćanosta Stefan Skora (CDU) tydźenja na jubilejnym zarjadowanju w tamnišim hrodźe. Na swjatočnosći hódnoćachu stotu róčnicu wobstaća organizacije, kotraž ma mjeztym 20 lět regionalny zwjazk we Wojerecach a w Halštrowskej Holi.
Lěta 2014 běchu we Wojerecach mjezynarodnu młodźinsku dźěłarničku organizowali, rjekny Stefan Skora k aktiwitam zwjazka. Kóžde lěto wopominaja wopory wójny we Wojerowskim čestnym hajku a na wojerskim pohrjebnišću w Narću. Składnostnje 750. jubileja města Wojerec poskićachu přednoški k stawiznam. Kóžde lěto přewjeduja domowu a nadróžnu zběrku.
Hižo nětko na lěto 2028 myslić (16)
Štó a što tči za serbskimi projektami, kotrež buchu we wobłuku wubědźowanja Sakskeho fondsa „Čiń sobu!“ mytowane? W lětušim serialu Serbskich Nowin je předstajamy.
17 hólcow a tři holcy přebywaja wot póndźele hač do jutřišeho w serbskorěčnym koparskim campje Serbskeho Sokoła. Dojěli su sej serbscy šulerjo w starobje dźewjeć do dwanaće lět na přebytk do Janskich Láznjow w čěskich Kyrkonošach. Su to koparjo/koparki Sokoła Ralbicy/Hórki, Sportoweju jednotkow Chrósćicy a Njebjelčicy, Sportoweju towarstwow Marijina hwězda a 1922 Radwor kaž tež Budissy Budyšin.
Krótkopowěsće (23.10.19)
Lětsa mjenje mjedu
Podstupim. Braniborscy pčołarjo maja so lětsa ze žnjemi pod přerězkom wotnamakać. Po informacijach Krajneho zwjazka braniborskich pčołarjow su jenož 20 kilogramow mjedu na lud nažnjeli. Hewak je to 30 do 50 kg. Wobćežowała bě pčolace ludy lětsa wosebje w južnej Braniborskej epidemija ameriski hniłc (Faulbrut).
Wobrazy přećahnu na Morawu
Praha/Moravský Krumlov. Swětoznaty cyklus 20 wulkoformatowych wobrazow „Słowjanska epopeja“ molerja Alfonsa Muchi přeměstnja na pjeć lět z Prahi na hród w městačku Moravský Krumlov. Jedna so wo požčonku čěskeje stolicy, kotrejž je Mucha wobrazy darił. Praska radnica pak njebě dotal kmana spjelnić jeho próstwu, za „Epopeju“ wosebity wustajenski twar přihotować.
Hórku poražku poćerpjeli
Policija (22.10.19)
Dźěćo lochko zranjene
Nowoslicy. Při njezbožu w Nowoslicach je so njedźelu připołdnju mały hólc zranił. Kaž policija zdźěla, bě wón ze swojim kolesom ze statoka na hłownu dróhu wujěł a chcyše do směra na Jurasec młyn dale jěć. 68lětny wodźer wosoboweho awta, kiž bě na statnej dróze S 101 do směra na Chrósćicy po puću pak njemóžeše zražce zadźěwać, byrnjež spěšnje a sylnje borzdźił. Kaž w zdźělence policije rěka, je so hólčk na zbožo jenož lochko zranił. Wěcna škoda na awće 68lětneho muža wučinja po trochowanjach zastojnikow něhdźe 400 eurow.
Nimale tonu njerjada zrumowali
Chór dźěći prašany
500. dźěćo so narodźiło
Wojerecy (SN). We Wojerowskim jězorinowym klinikumje je so minjeny tydźeń 500. dźěćo lěta 2019 narodźiło. Kaž klinikum zdźěla, jedna so wo holčku Valentinu Wolski. Staršej Nicole Wolski a Michael Schädlich-Wolski wjeselitaj so jara nad swojej 3 140 gramow ćežkej a 52 centimetrow wulkej dźowčičku.
Porodna pomoc we Wojerowskim klinikumje je jara na swójby wusměrjena. „Žiwjenje w njej bórzomni starši a tam dźěłace baby aktiwnje sobu wuhotuja“, rozłožuje nowinski rěčnik Gernot Schweitzer. Wuskeho zhromadneho dźěła z dźěćacej a młodźinskej kliniku dla móža tež rizikowe samodruhosće a zažne porody derje a wěsće zastarować. „Prócujemy so tak mało kaž móžno do přirodnych wotběhow zasahować, a zapřimnjemy jenož, hdyž je nuznje trjeba“, wopisuje šeflěkar gynekologije a porodneje pomocy dr. Aiman Bachouri.
Stajnje druhu póndźelu w měsacu poskićeja we Wojerecach zajimcam informaciske wječorki. Přichodny infowječork budźe 11. nowembra w 19 hodź.
Za pjeć lět ma łódź jězdźić
Gmejna Hamor chce projekt najebać stupace kóšty zwoprawdźić
Hamor (AK/SN). Gmejna Hamor runa puć za přichodne łódźnistwo na Bjerwałdskim jězorje. K tomu wuznachu so radźićeljo na swojej njedawnej zhromadźiznje. Z wjetšinu hłosow wuprajichu so woni za zakónčace financowanje a přihłosowachu tež wotpowědnemu dojednanju wo přewzaću z Łužiskej a srjedźoněmskej towaršnosću hórnistwoweho zarjadnistwa (LMBV). Předewzaće wopřijima planowanje, zwoprawdźenje a inženjersko-techniski přewod za tak mjenowanu helling (při tym jedna so wo zepěranski twar), tři přistawne rampy, najwšelakoriše přizamki k zastaranju z milinu a pitnej wodu, wotwodźenje wopłóčkow kaž tež swěcu. „Poprawom měła cyłkowna naprawa hižo lětsa wotzamknjena być. Za nowy cil je nětko lěto 2024 postajene“, rozłoži projektowy koordinator Hamorskeje gmejny při Bjerwałdskim jězorje Roman Krautz, kiž zastojnstwo wot lěta 2010 wukonja.
Dajće zmijam lětać ... abo tež nic
Čorny Chołmc (SiR/SN). Stara powěsć trjechi na čerstwe, načasne, nowe ideje, bjeztoho zo by wid na historiske wažnosće a detaile spušćiła. Dieter Klimek jako Čorny Młynk wjedźeše naležnosć předwčerawšim popołdnju na arealu Čornochołmčanskeho Krabatoweho młyna spěšnje na dypk: „Krabatowy młyn trjeba młodych ludźi z modernymi myslemi. Jedyn z wuslědkow tejele wuspěšneje kombinacije je na nazymskim swjedźenju widźeć.“
Chwalba słušeše předewšěm Magdalenje Schaffer. Młoda žona podpěruje wot lětušeho lěća dźěćace a młodźinske dźěło na Krabatowym młynje a je sej ze swojimi kolegami něšto cyle wosebite wumysliła, štož tam hišće njemějachu: Jězbnu dowolnosć dźěćom za pušćenje zmijow. Jeničce za to su kwis wuwili. Zhromadnje ze staršimi dyrbjachu dźěći njedźelu prawe wotmołwy na tam stajene prašenja namakać. Strašne milinowody, njewjedra, přirodo- kaž tež ptakoškitne pasma hrajachu při tym runje tak wažnu rólu kaž prawy material a přisłušk za twar zmijow, štož móže při wopačnym wužiwanju k zranjenjam wjesć.
