Za modernu 5G-techniku

pjatk, 06. decembera 2019
artikl hódnoćić
(0 )

Za modelowy projekt chcedźa slědźenske pola zarjadować

Wojerecy (AK/SN). W přichodnych tydźenjach maja we Wojerecach a wokolinje nastać tři slědźenske pola za modernu digitalnu techniku 5G. To je město nad Čornym Halštrowom njedawno zdźěliło, wšako su Wojerecy modelowy region za test 5G we wobłuku strukturneje změny.

Techniska uniwersita Drježdźany přepytowanja wědomostnje přewodźa. „Na slědźenskich polach dźěłamy zhromadnje z firmami, kaž su to Nokia, Claas, Liebherr a dalše. Wone nastawaja we wobłukach kaž ratarstwo, twarstwo a bydlenje“, podšmórny prof. Frank Fitzek z katedry Němska telekom profesura za komunikaciske syće. Radźićelam wón njedawno rozłoži, zo chcedźa tak wužitnosć 5G-tech­niki, jeje wliw na čłowjeka kaž tež při­cho­dakmanosć přeslědźić. „5G-technika podpěruje mo­bilitu w awće a ćahu, komunikaciju, wužiwanje energije a dalše wobłuki. Wona ma předewšěm srjedźostawskim a mjeńšim pře­dewzaćam słužić.“ Dale profesor wujasni: We wobłuku płaćiwych hraničnych hódnotow za mobilne připrawy a při dodźerženju w ramiku produkto­weje wěstoty za mobilne telefony před­pisanych wuměnjenjow njeje dotal žanych wobkrućenych dopokazow za to, zo mobilne škričkowanje čłowjekej škodźi. „Bjez 5G-techniki njebudźe přichodnje tež žana digitalizacija, žana industrija wjac we Łužicy“, wón znazorni. 5G-technika wužaduje sej dale a wjac bazowych stacijow. Prudźenje mjeztym jasnje woteběra w přirunanju k 2G, 3G a 4G-technice. „W Němskej je lětnje wjac hač 70 000 mortwych alkohola dla a wjac hač 3 000 mortwych we wobchadźe. Hdźe je tam wukřik?“, chcyše Fitzek wědźeć, wabjo za akceptancu a za to, so z nowej 5G-techniku rozestajeć. Štóž so tomu spje­ćuje, skomdźi po wšěm swěće zwisk.

Wobydlerjo kaž tež zastupnicy wo­bydlerskeje iniciatiwy „Žiwjenje město smjerće“ dwěluja na njestrašnosći prudźenjow 5G-techniki a prašachu so za strowotnymi rizikami kaž tež za zawěsćenjom před móžnymi škodami. Zdobom žada­chu sej konkretne a transparentne wujasnjenje slědźenskich polow. Što dokład­nje chcedźa testować? Štó přewo­zmje zamołwitosć za pospyty we Wo­jerecach? A štó informuje wo wu­slědkach slědźenjow? To běchu jenož ně­ko­tre prašenja přitomnych. Měšćanski radźićel Detlef Degner (AfD) skedźbni na slě­dźenja lěkarja, wědomostnika a awtora prof. Karla Hechta. Fyziologa a swět­nišćowy medicinar zaběra so tohorunja z mobilnoškričkowanskej techniku. Jeho dopóznaća měli wobkedźbować. Frank Fitzek je přilubił so z jeho argu­mentami rozestajeć.

„Tema 5G-technika budźe nas dale zabě­rać. Tež my so z njej rozestajamy“, měnješe Wojerowski wyši měšćanosta Stefan Skora (CDU), kiž přilubi zjawnosć sčasom a prawidłownje informować.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND