B 96 znowa zawru
Holešow. Přichodny tydźeń budźe zwjazkowa dróha B 96 mjez wotbóčkomaj do Holešowa a Šešowa wjacore dny dospołnje zawrjena. Kaž Budyski krajnoradny zarjad zdźěli, chcedźa na wjace hač kilometraj dołhim wotrězku wot póndźele, 15., hač do pjatka, 19. junija, jězdnju z nowej asfaltowej worštu pokryć. Wokołopuć powjedźe w tym času přez Njeswačidło, Šešow a Nižu Wjes do Rakec.
Zarjadaj zaso přistupnej
Budyšin. Při-, pře- a wotzjewjenja móža wobydlerjo města Budyšina po terminowym dorěčenju nětko zaso direktnje we wobydlerskej přizjewjerni resp. na stawnistwje wobstarać. We wobłuku sukelnicy na Nutřkownej Lawskej stej wobaj zarjadaj přećahnyłoj, a to na 2. poschod. Wopytowarjo móža lift wužiwać. Štóž ma w sukelnicy něšto wobstarać, njech wobkedźbuje, zo maš tam škit za hubu a nós nosyć. Najebać terminowe dorěčenje proša wobydlerjow wo zrozumjenje, dyrbja-li w přizjewjerni abo na stawnistwje raz čakać.
Wopyt nachwataja
Policija (11.06.20)
Znata moped spóznała
Rakecy. Mało wjesela nad pokradnjenym mopedom měještaj předwčerawšim skućićelej w starobje 17 a 39 lět w Rakecach. Po tym zo je wobsedźer popołdnju policiji přizjewił, zo bě něchtó jeho moped pokradnył, wuhlada jeho znata jězdźidło wječor w Psowjach. Přiwołanym zastojnikam spytaštaj skućićelej napowědać, zo běštaj moped online kupiłoj. Kaž so wukopa, bě 39lětny z S 51 jěł, njeměješe pak scyła žanu jězbnu dowolnosć, dokelž běchu ju jemu hižo dawno sćazali. Nimo toho steještaj wón kaž tež młodostna pod wliwom drogow. Policija wobsedźerjej moped zaso wróći. Paduchaj změjetaj so nětko hnydom wjacorych deliktow dla sudnisce zamołwić.
Poskitk swójbam
Nowy traktor nuznje trěbny
Gmejnscy radźićeljo wo wužiwanju spěchowanskich srědkow rěčeli
Trjebin (AK/SN). Dźěl pawšale Swobodneho stata Sakskeje k zesylnjenju wjesneje kónčiny chce gmejna Trjebin za wuhotowanje tamnišeje pěstowarnje „Lutki“ a za nowu techniku gmejnskeho dźěłaćerja wužiwać. To su Trjebinscy gmejnscy radźićeljo na swojim wutornym posedźenju wobzamknyli.
Po poručenju biskopstwow a dekana za serbske katolske wosady Wita ...
W septembrje meble zarumuja
Na zjawnej zhromadźiznje zarjadniskeho zwjazka Při Klóšterskej wodźe su jeho čłonow wo stawje saněrowanja twarjenja zarjadniskeho zwjazka informowali. Wšitko po planje běži.
Njebjelčicy (SN/mwe). Zetkali běchu so předwčerawšim wječor wjesnjanosća a zastupjerjo pjeć serbskich sobustawskich gmejnow zarjadniskeho zwjazka Při Klóšterskej wodźe a dalši we wuradźowanskej rumnosći Njebjelčanskeje gmejny při sportnišću. Po serbskim witanju předsydy zwjazka Měrka Domaški wobhonichu so přitomni wo stawje změny ležownostneho plana zarjadniskeho zwjazka a su wupołoženju 6. změny plana w gmejnach jednohłósnje přihłosowali. Wažne to za tych, kotřiž chcedźa sej nowy dom twarić.
Krótkopowěsće (11.06.20)
SPTWS-akcija zakónčena
Budyšin. Akcija Serbskeho poskitka tydźenja w syći (SPTWS), kotruž bě Załožba za serbski lud za čas koronakrizy iniciěrowała, je zakónčena, zdźěli jury w dźensa wozjewjenym wideju na kanalu Youtube. Sydom internetnych poskitkow su w minjenych tydźenjach mytowali, žanych nowych pak njeje k tomu přišło. Jury sej přiwšěm přeje, digitalne serbskorěčne poskitki dale šěrić.
Trilex-ćahi zaso do Čěskeje
Drježdźany. Ćahi Trilex maja wot přichodneje póndźele zaso z Drježdźan přez Žitawu do Libereca jězdźić. Wobmjezowany jězbny plan pak hišće dale płaći, kaž předewzaće Länderbahn zdźěli. Wot 4. julija poskića tež zaso woblubowany kónctydźenski zwisk do Doks. Ćahi do směra na Pólsku pak so hišće dale w Zhorjelcu kónča.
Přećiwo zwičnjenju nacizma
Policija (10.06.20)
Kofej radšo doma pić
Ptačecy. Kofejowy nopašk za „po puću“ je předwčerawšim rano na wokrjesnej dróze mjez Złym Komorowom a Ptačecami po wšěm zdaću wobchadne njezbožo zawinił. Horcy napoj steješe na pódlanskim sydle VW Tourana a so při jězbje powróći. To 56lětnu wodźerku drje bóle zaběraše, hač na puć dźiwać. Tak wona na prawy bok jězdnje zajědźe a do štoma zrazy. Zranjenu dowjezechu ju do chorownje. Awto so dospołnje skóncowa, škodu trochuja na něhdźe 22 000 eurow.
Spytaja minus pomjeńšić
Dwójny hospodarski plan Njeswačanskeje gmejny nadal njejasny
Njeswačidło (JK/SN). Zo posedźenje gmejnskeje rady tak dołho traje, sej jeje čłonojo kaž tež wjesnjanosta Gerd Schuster (CDU) wčera wječor w Njeswačidle zawěsće myslili njeběchu. Dnjowy porjad dźě bě poměrnje přehladny, ale diskusije k wšelakim dypkam běchu přiwšěm něšto dlěše a zdźěla tež woprawnjene. Wosebje dołho rěčachu radźićeljo wo tym, kak hodźi so hrožacy minus w naćisku dwójneho hospodarskeho plana na znjesliwu wulkosć pomjeńšić. Wuchadźejo z wuskutkow koronapandemije liči gmejna z mjenje dochodami, a tak hrozy minus w etaće. Komornica Liliane Wetzko radźićelam hišće raz móžne potenciale lutowanja a móžnych wyšich dochodow rozłoži, minus pak da so jeno snadnje pomjeńšić. Tak wjesnjanosta namjetowaše, zo porěči z prawniskim dohladowanskim zarjadom, hač naćisk etata w předležacej formje přiwozmje. Jeli tomu tak budźe, chcedźa jón na posedźenju w juliju za lětsa a klětu wobzamknyć.
Połoženje komuny dale napjate
Dźěwin (AK/SN). Lětsa chce Dźěwinska gmejna hłownje do pěstowarnjow, wohnjoweje wobory, do pohrjebnišćow a do wutwara šěrokopasmoweje syće inwestować. Tele ćežišća předwidźi etat, kotryž su gmejnscy radźićeljo na swojim zašłym posedźenju wobzamknyli.
Kaž komornica Carmen Petrick rozłoži, nochcedźa žane dawki zwyšić. Tuchwilu liča z cyłkownym deficitom wjace hač 300 000 eurow. Tohodla drje hinak njepóńdźe, hač zo dyrbja za wohnjowoborne wudawki kredit něhdźe 35 000 eurow wzać. Přiwšěm je gmejna Dźěwin z 202 euromaj na wobydlerja poměrnje snadnje zadołžena. Dokelž pak je hospodarske połoženje komuny dale napjate, komornica wočakuje, zo dyrbja nětko hospodarski konsolidowanski koncept nastajić.
Najwažniše lětuše předewzaća gmejny su, ponowić wohnjowobornu gratownju w Brězowce, kupić hašenske jězdźidło za tamnišich wobornikow, twarić kolesowanski puć z Dźěwina do Slepoho a přetwarić Dźěwinsku nawjes. Za něhdźe 70 000 eurow porjeńša pohrjebnišći w Brězowce a Dźěwinje.
