Při horcych temperaturach pyta čłowjek za chłódnym městnom. Tajke namaka wjele ludźi zawčerawšim w Koporčanskim parku. W chłódku wulkich štomow njejsy jenož temperaturu derje znjesł, ale sy nimo toho hišće na hudźbu słuchać móhł.
Koporcy (SN/MWj). Něhdźe 150 wobydlerjow Koporc a wokolnych wsow dožiwi zawčerawšim popołdnju pisany koncert Bukečanskeje domizniskeje skupiny, tamnišeho pozawnoweho chóra a chóra Bukečanskeje zakładneje šule w Koporčanskim parku při tamnišim hrodźe. Z kulturnym podawkom wotzamknychu wobšěrne dźěła, kotrež běchu trěbne, zo bychu škody wulkeje wody z lěta 2013 wotstronili. Tehdy bě njewšědnje sylne njewjedro park dospołnje wobškodźiło.
Wojerecy (SN/at). Mjeztym 4. kurs serbšćiny zahaja jutře we Wojerowskim měšćanskim zarjadnistwje. Kaž bě z radnicy zhonić, je so za njón 20 wosobow přizjewiło. Nimo sobudźěłaćerjow zarjadnistwa samoho su to tež někotři z měšćanskich zarjadow a zawodow kaž z Hórnikečanskeje Energijoweje fabriki, z Kulturneje fabriki, ze zastarowanskich zawodow a bydlenskeho drustwa. Dalši dźěłaja w jězorinowym klinikumje abo w turistiskej informaciji Wojerec. Přizjewili su so tohorunja dwě kita-kubłarce, ewangelski farar a někotři wobydlerjo.
Kaž dotalne tři kursy budźe wučerka serbšćiny na wuměnku Brigita Šramina tež tón podawać, informuje Wojerowska społnomócnjena za serbske naležnosće Gabriela Linakowa. Kursisća maja dale wo serbskej kulturje a stawiznach w měsće nad Čornym Halštrowom zhonić, a społnomócnjena chce jim za Serbow wažne zakonje a postajenja rozłožić.
We Wojerecach z toho wuchadźeja, zo płaćiwe zakonje same serbšćinu njezachowaja. „Wona ma so wobstajnje nałožować, zo bychu ju tež w přichodnych lětach hišće rěčeli“, rěka z radnicy.
Jednanja wuspěšnje zakónčene
Choćebuz. Jednanja wo přesydlenskim zrěčenju za Miłoraz su minjeny tydźeń wuspěšnje zakónčili, kaž předewzaće LEAG wčera informowaše. Gmejnje Trjebin a Slepo stej w dalšim jednanskim kole z koncernom poslednje wotewrjene dypki konstruktiwnje rozrisali. Wobdźěleni maja wuslědk za měznik nastupajo přihoty na přesydlenje.
Třělc njeskutki přiznał
Biskopicy. Serija wutřělow na awta w Biskopičanskej kónčinje je wujasnjena. Njedźelu zajaty 42lětny je njeskutki „wobšěrnje přiznał“, statne rěčnistwo a policija zdźělatej. W bydlenju muža běchu płunowej pistoli a płunowu třělbu z dalokowidom a municiju našli. Wumjetuja zajatemu, zo je wjace hač 20 króć na nimo jěduce awta třělał. Prawdźepodobnje psychisce choreho su do psychiatrije zapokazali.
Wustajeńca wo zběžku
Drětwja (JoS/SN). Hdźež so Sprjewja krótko před Grodkom mjez wulkimi łukami wije, nastawa w Drětwi w gmejnje Sprjewiny Doł pódla tak mjenowaneho Kruwjaceho mosta nowy móst. Někotryžkuli kolesowar na Sprjewinym kolesowanskim puću tule pozastawa, zo by sej twarnišćo bliže wobhladał. Rozsudna lěpšina porno staremu mostej je, zo nowy hižo žane stołpy njezměje. Tak móže rěka tež w padźe wulkeje wody bjez zadźěwkow dale ćec. Wokomiknje wšak je w Sprjewi poměrnje mało wody. Wobydlerjo pak so hišće derje dopominaja, zo bě to na přikład w lětomaj 2010 a 2013 cyle hinak.
Drohej kolesy pokradnyli
Ochranow. Na Lubijskej dróze w Ochranowje wutorhnychu njeznaći w nocy na sobotu lěsycu před wukładnym woknom wobchoda za kolesa a zadobychu so na to do předawanišća. Tam pokradnychu najdróšej kolesy typa „Müsing Petrol“ w cyłkownej hódnoće něhdźe 7 000 eurow. Wěcna škoda, kotruž při zadobywanju načinichu, wučinja dalše 3 000 eurow. Policija nětko na to kedźbuje, štóž je z kolesom mjenowaneje marki po puću.
Kulow (AK/SN). Z wosebitym swjedźenjom je Kulowska ewangelska wosada wčera na fararja a wučerja Friedricha Forella (1888–1968) dopominała. „Chcemy diakoniske skutkowanje Friedricha Forella wuzběhnyć a zdobom zwisk mjez cyrkwju a diakoniju wuwědomić“, podšmórny předsydka Kulowskeho Forelloweho towarstwa Jana-Eva Scholz. Jako hóstneho prědarja witachu na swjedźenskej Božej słužbje rektora Drježdźanskeho diakoniskeho domu dr. Thila Daniela. Jeho dom přewostaji zdobom wustajeńcu wo zakładach diakonije a paramentiki. Tale akademiska disciplina praktiskeje teologije zaběra so z wuhotowanjom cyrkwinskich rumnosćow.
Składnostnje 50. róčnicy poswjećenja Zdźěrjanskeje cyrkwje swjećeše tam wčera nimale 500 ludźi Božu mšu ze starobiskopom Joachimom Reineltom. Po tym zo su jeho w Brěmjenju witali, přewodźeše jeho w kuči šěsć křižerjow, štož hódnoćeše Reinelt ze słowami „zo ma tajku česć jenož jendźelska kralowna“.
Zdźěr (aha/SN). Kemše z koncelebrantom, Radworskim wosadnym fararjom Benom Jakubašom, w połnje wobsadźenej cyrkwi – 250 wěriwych wonka městno zabra – su Wulkodubrawscy muzikanća z někotrymi dujerjemi z wosady a chór Meja pod wuměłstwowym nawodom Pětra Cyža dostojnje wobrubili.