Krótkopowěsće (07.02.20)
Skazaja nowe nadróžne tafle
Pančicy-Kukow. Gmejna Pančicy-Kukow chce na swojim teritoriju wšitke nadróžne tafle ponowić dać. Nadawk za 10 000 eurow su gmejnscy radźićeljo wčera schwalili. Na dohromady 110 taflach budźe serbski a němski napis jenak wulki. Projekt financuja z lońšeje a lětušeje přiražki po 5 000 eurach, kotruž Swobodny stat Sakska komunam w dwurěčnym sydlenskim rumje za přidatne wudawki za serbsku rěč přewostaja.
Wuswědčenja přepodali
Drježdźany. Do zahajenja zymskich prózdnin je dźensa něhdźe 485 000 šulerkow a šulerjow w Sakskej wuswědčenja přijało. Něhdźe 34 000 holcam a hólcam 4. lětnika su zdobom poručenje za gymnazij přepodali. ADAC liči nětko w prózdninach ze zatykanymi awtodróhami a namołwja dowolnikow, časy najsylnišeho wobchada wobeńć.
Njetopyrje w bunkrach „wěste“
Policija (06.02.20)
W chorowni so wuspać chcył
Wojerecy. Nimoměry mučny drje bě wutoru popołdnju muž we Wojerecach. Po wšěm zdaću dyrbješe wón nuznje spać a nochcyše drje za to puć domoj hić. Tak wupyta sej Wojerowsku chorownju jako kmanu městnosć wotpočinka. Krótko do 14 hodź. su jeho sobudźěłaćerjo w jednym z łožow pacientow wuhladali a policiju zawołali. 38lětny tak kruće spaše, zo móžachu hakle policisća jeho wubudźić. Kaž zwěsćichu, pola muža žana přičina njepředležeše, zo by w chorowni wostać dyrbjał. Tohodla jeho přećelnje prošachu, klinikum wopušćić a so doma wuspać. Dale wšak w rozprawje Zhorjelskeje policajskeje direkcije rěka, zo 38lětny policiji runjewon njeznaty njeje.
Wotrjady přećahnu
Pančicy-Kukow. W twarjenju zarjadniskeho zwjazka w Pančicach-Kukowje wot jutřišeho hač do 14. februara přizjewjernja tam wobydlerjow, stawnistwo, přemysłowy zarjad a kasa do nowych rumnosćow přećahnu. Mjenowane wotrjady budu tuž w tym času zawrjene. Runočasnje móže k techniskim wobmjezowanjam w tamnych wotrjadach dóńć. Wot 18. februara wobydlerjow zaso witaja.
Za kurs so přizjewić
Smochćicy. Floristiski kurs kołowokoło nalěća přewjedźe Smochčanski Dom biskopa Bena sobotu, 14. měrca. Mjez druhim chcedźa w tym wobłuku nalětnje kwětki do wołtarneho wupyšenja tykać. Kurs nawjeduje floristka Silvia Jonas. Zajimcy njech přizjewja so hač jutřišeho w Domje biskopa Bena pod telefonowym čisłom 035935/ 22 310.
Na farmje so zabawjeć
Ludźi do gmejny wabić
Spěchowanske srědki chcedźa w Njeswačidle za bydlenja zasadźeć
Njeswačidło (JK/SN). Někotražkuli gmejna ma tučasnje problemy, wobchować konstantnu ličbu wobydlerjow abo ju snano powjetšić. Wšako je to sobu zakład za to, kelko klučowych připokazankow gmejna dóstanje abo kak wysoke spěchowanje w tym abo tamnym programje je. Na minjenym posedźenju Njeswačanskeje gmejnskeje rady dźěše mjez druhim wo to, předać poslednju gmejnje słušacu twarsku ležownosć, z čimž je gmejna wućežena. Tak nasta prašenje, kak móhli dalše ležownosće twarskim zajimcam poskićeć. Wěste rezerwy drje hišće maja, ale tučasnje njeje z hospodarskich přičin scyła na to myslić, ležownosće wuměrić a přihotować.
Zymska zelenina přeco zaso słódna
Na Wojerowskej dźěćacej a młodźinskej farmje Miłočanskeho Křesćanskosocialneho kubłanskeho skutka (CSB) su kulinariski slěd zahajili.
Miłoćicy (SN/mwe). „Klewernje a kreatiwnje warić“, takle rěkaja tež lětsa prawidłowne wječorki, kotrež CSB organizuje. Hač na Wojerowskej dźěćacej a młodźinskej farmje abo w klóšterskej zahrodźe w Pančicach-Kukowje, kulinariske zarjadowanja su mjez mnohimi hižo lěta jara woblubowane. Městna druhdy samo njedosahaja, tak zo je radźomne so sčasom přizjewić. Wšako su terminy w interneće abo druhich medijach wozjewjene.
Wjeselić móžachu so wobdźělnicy njedawneho warjenskeho kursa na rafinowany meni z čerstwej zymskej zeleninu kaž pupkatym a krjózkatym kałom. „Prěnje zarjadowanje noweho lěta bě zaso derje přiwzate, samo z Pančic-Kukowa su do Wojerec přijěli“, zežiwjenska wědomostnica Elžbjeta Hojerjowa wuswětla. „Nimo žonow nowe recepty tež někotrehožkuliž muža wabja.“ Hojerjowa zajimcam tež rady pokiwy za nakup, přihot a składowanje zymskeje zeleniny posrědkuje.
Mystiske wječorne swětło wobdawa Čornochołmčanski Krabatowy ...
W Braniborskim apotekowym muzeju w Choćebuzu je wot spočatka lěta ...
Krótkopowěsće (06.02.20)
Zakonske namjety předstajili
Brüssel. Zakonske namjety, złožowace so na dźewjeć dypkow europskeje wobydlerskeje iniciatiwy Minority Safepack (MSPI), su wčera w Brüsselu Europskej komisiji předstajili. Zastupjerjo MSPI zetkachu so tam z Věru Jourovej, wiceprezidentku komisije EU a komisarku za hódnoty a transparencu, a dalšimi. Z Němskeje bě čłonka wobydlerskeho komiteja Anke Spoorendonk (SSW) pódla.
Zhromadna digitalna agentura
Lipsk. MDR a ZDF budźetej přichodnje při wuwiću digitalnych poskitkow hromadźe dźěłać. Za to wutworjena Inowaciska a digitalna agentura ma 1. apryla w Lipsku z 15 sobudźěłaćerjemi dźěłać započeć. Tam chcedźa projekty kaž storytelling a datowy žurnalizm dale wuwić, kaž staj intendantaj Karola Wille a Thomas Bellut wčera připowědźiłoj.
„Zymske jewišćo na hrodźe“
Radźićeljo so zetkaja
Pančicy-Kukow. Dalše twarske dźěła za šulski dom w Pančicach-Kukowje budu jedna z temow posedźenja tamnišich gmejnskich radźićelow jutře, štwórtk, w 19 hodź. na Wotrowskej starej šuli. Tam chcedźa tež wo nowych nadróžnych taflach rěčeć.
Tohorunja jutře, ale w 19.30 hodź. zetka so Chróšćanska gmejnska rada w gmejnskim a kulturnym centrumje. Tam póńdźe mjez druhim wo popłatki za wužiwanje gmejnskich objektow.
Pokiwy čestnohamtskim
Chrósćicy. Domowina a Rěčny centrum WITAJ přeprošatej čestnohamtskich jednotliwcow resp. cyłki a towarstwa na informaciski wječork 7. februara we 18 hodź. do sydarnje Chróšćanskeho gmejnskeho zarjada. Na zjawnym zarjadowanju porěči zamołwita za čestnohamtske dźěło w Budyskim krajnoradnym zarjedźe Dunja Reichelt wo temje „Spěchowanja za čestnohamtskich“.
Na prózdninske dny
Nowa wodarnja klětu hotowa
Běła Woda (AK/SN). Nowa wodarnja Hamor ma zastaranje z pitnej wodu we wulkim wokrjesnym měsće Běłej Wodźe kaž tež w Slepom a wokolinje dołhodobnje zaručić. To podšmórny jednaćel Běłowodźanskich měšćanskich zawodow Stefan Przymosinski w swojej rozprawje na zašłym posedźenju měšćanskeje rady. „Loni běchu nadawki po wšej Europje wupisane. Zaměr je, kónc apryla 2020 twarić započeć. W juniju 2021 ma probowy běh slědować“, wón rozłoži. Zakład nowotwara je 40lětne zrěčenje mjez wodowym zaměrowym zwjazkom srjedźna Nysa-Šepc, městom a měšćanskimi zawodami. Běłowodźanski wyši měšćanosta Torsten Pötzsch (Klartext) rěčeše wo procesu, kotryž hižo dźesać lět traje. Cil je spušćomne a zapłaćomne zastaranje z pitnej wodu. Nowa wodarnja ma na kromje Bjerwałdskeho jězora nastać.
