Policija (24.02.20)
Małe njezbožo w kuchni
Běła Woda. Dokelž je pječa k rozpachnjenju dóšło, wołaše w rańšich hodźinach wčerawšeje njedźele wobydler Běłeje Wody wohnjowu woboru do zahrodnišća na Heinowej. Jako běchu kameradojo a policisća na městnje, woni spěšnje zwěsćichu, zo scyła tak zlě njebě. Paliło so tam mjenujcy njeje. 34lětna žona chcyše sej jeničce něšto k jědźi spřihotować a zwohrěwa sej začinjenu konserwu. Jako ju wočini, jej horca jědź mjezwoči pryskny a ju snadnje zrani. Žonu dowjezechu do chorownje.
Wobrazy pisane a originelne
Ze 103 skupinami na žonjacych póstnicach nowy rekord nastajili
Kulow (BŠ/SN). Wjacore tysacy ludźi su sej sobotu w Kulowje lětuši žonjacy póstniski ćah wobhladali. Hižo dopołdnja so skupiny w měsće a na wokolnych wsach zetkachu, zo bychu so přihotowali. Tónraz njemějachu jeno přijomne póstniske wjedro, ale tež najwjace wobdźělnikow. Loni bě jich sto skupin, lětsa tři wjace. Mjez nimi běchu „serbske Hanki“ – nowy cyłk Lipšćanskich studentkow a přećelkow. Wone ćehnjechu takrjec jako lutki wódneho muža, z čerwjenej čapku a lipowym łopješkom na njej po měsće. Wulki přiklesk žnějachu tež Koslowske žony „ze žabjaceho hata“ – kaž so mjenuja. Wotpohlad njebě najrjeńši być, ale originelny. Jako stari dźědojo z rolatorom pohibowachu so Koslowčanki po hasach Kulowa. Wosebje wuběrnje mějachu wone mjezwoča šminkowane, tójšto fałdow běchu sej namolowali.
Dokumentowane (24.02.20)
Radworski gmejnski radźićel Jovan Hrjehor je po wólbach wjesnjanosty w Radworju wjesnjanosće, nowej wjesnjanostce a gmejnskim radźićelam list posrědkował, kotryž je Serbskim Nowinam za wozjewjenje přewostajił:
Slědowace linki pisać je mi wšo druhe hač lochke, wšako běch šěsć lět z ćěłom a dušu z gmejnskim radźićelom.
Po tutym puću Was prošu, mje z funkcije jako gmejnski radźićel a wšěch z tym zwjazanych winowatosćow wuwjazać.
Najebać dešćik su wčera w Choćebuzu kóždolětny „ćah ...
Krótkopowěsće (24.02.20)
Tworja nowe rěčne rumy
Zły Komorow. Zajim za serbsku rěč a kulturu je minjene lěta w Złym Komorowje přiběrał. Nětko organizuje tamniša Domowinska skupina měsačne Serbske blido a zhromadne spěwanje. Prěnje Serbske blido su pjatk wotměli, zdźěli čłon skupiny Günter Pawliš. Tak chcedźa dalše serbske aktiwity wuwiwać, serbskorěčne rumy tworić a dwurěčnosć sylnić.
Lědma škody po wichoru
Lipsk. Wichorowa nižina „Yulia“ je w Němskej a w Hornjej Łužicy na zbožo mało škody zawostajiła. To wozjewi dźensa zasadźenski centrum nutřkowneho ministerstwa w Lipsku. Předewšěm w Vogtlandźe je wichor někotre štomy spowalał. Tež w Bolborcach dyrbješe wohnjowa wobora na milinowód padnjeny štom zrumować. Wosoby po informacijach centruma njebuchu žane zranjene.
Z ombudnikom njespokojom
„Ach mój swěće, domizna?!“
Chrósćicy. Takle mjenuje rodźeny Konječan Markus Bjeńš – bydlacy mjeztym sydom lět w Južnej Africe, hdźež za socialny projekt dźěła – swój přednošk jutře, sobotu, w 19.45 hodź. w Chróšćanskej putniskej hospodźe. Sam wón hosći takle na wječork wabi: „Zhromadnje z Wami chcu zhladować na swoje dožiwjenja a wučby zašłych sydom lět. Tak podajmy so přemyslujo, prašejo a rozmołwjejo so, spěwajo a přednošujo na zabawnu a dyrdomdejsku jězbu do swěta. Wotewrjena mysl a wutroba stej jako pućowanski prowiant lubje witanej.“ Hižo w 16 hodź. baje ćeta Monika dźěćom bajku „Njebojazny Jan“.
Njedźelu dźiwadło wupadnje
Budyšin. Předstajenje NSLDź „Dołhož fenki běža“, kotrež bě za njedźelu 23. februar, w 17 hodź. na hłownym jewišću jako hrabnjenčko planowane, chorosće dla wupadnje. Přichodne předstajenje budźe sobotu, 14. měrca, w 19.30 hodź. Poskića je tohorunja jako hrabnjenčko. Hižo kupjene zastupne lisćiki su za sobotu, 14. měrc, na samsnych městnach płaćiwe. Wone pak hodźa so runje tak za dalše předstajenja zaměnić.
Na knižnu premjeru
Policija (21.02.20)
Znowa so awto paliło
Budyšin. Na parkowanišću Budyskeho mebloweho domu Roller je so dźensa w nocy wosobowe awto wupaliło. Jako wobornicy přijědźechu, njemóžachu woni Seat Arosa hižo wuchować. Tež žiwy płót w susodstwje hižo w płomjenjach steješe. Wobornicy drje móžachu je spěšnje podusyć, awto pak je dospołnje skóncowane. Hakle minjenu njedźelu bě so cyle w bliskosći VW Polo palił.
Jězdźidła zhromadnje skazaja
Worklecy (SN/MWj). Něhdźe w meji 2021 dóstanje Smječkečanska wohnjowa wobora nowe hašenske awto. Worklečanska gmejnska rada je wčera wobzamknyła, zo kupja tak mjenowany MLF, potajkim srjedźne hašenske jězdźidło. To pak nječinja sami, ale w formje zhromadneje skazanki z Wojerecami, Njedźichowom a Halštrowskej Holu. Za to su štyri komuny zjawnoprawniske dojednanje wobzamknyli. Lěpšina je, zo dóstanu nimo normalneho spěchowanja hišće raz přidatne 20 procentow přiražki, rozłoži Volker Sanderhoff z Wojerowskeje powołanskeje wohnjoweje wobory. Ta ma za tónle projekt kłobuk na hłowje.
Sanderhoff wčera wuzběhny, zo su štyri komuny derje hromadźe dźěłali a zo njeje k někajkim njedorozumjenjam dóšło, wšako jedna so wo wěste standardne jězdźidła. Wone su samsneho typa a so lědma rozeznawaja, chiba snadnje w nutřkownym wuhotowanju. Cyłkowna inwesticiska suma za wšitke štyri jězdźidła wučinja něhdźe milion eurow. Dobra połojca toho budźe spěchowana.
Serbšćina na kubłanišću wažna
W juniju chcedźa w Čornym Chołmcu nowu pěstowarnju twarić započeć
Čorny Chołmc (AK/SN). Za zažne dźěćace kubłanje na wsy maja so wuměnjenja w Čornym Chołmcu přichodnje wo tójšto polěpšić. To rjekny přirjadnica Budyskeho krajneho rady Birgit Weber tam wčera na městnje, jako přepoda přizwolenje spěchowanskich srědkow za tamnišu nowu pěstowarnju „Krabat“. Projekt płaći 1,9 milionow eurow. Z toho přewozmjetej Dźěłaćerske dobroćelstwo (AWO) jako nošer a město Wojerecy něhdźe poł miliona eurow. 1,4 miliony eurow dóstanu ze sakskeho spěchowanskeho programa za witalne wjesne srjedźišća. Spočatk junija chcedźa twarić započeć, zdźěli nawoda twarskeho wotrjada města Wojerec Dietmar Wolf. Wón liči z tym, zo móhli nazymu 2021 zaćahnyć.
