Wot septembra stajnje srjedu
Nowe rjadowanje wo sirenowej signalnej probje ani tak nowe njeje
Budyšin (SN/MWj). Hdyž prěnju sobotu měsaca dypkownje připołdnju w dwanaćich sireny ruja, so čłowjek jenož krótki wokomik nastróži a je hnydom zaso změrowany. W tym času su minjene lěta mjenujcy signal sirenow wupruwowali. To pak so nětko změni. Sireny dyrbja tež přichodnje wupruwować. To pak nječinja hižo prěnju sobotu měsaca w 12 hodź., ale wot septembra kóždu srjedu w 15 hodź., dalokož to žadyn zakonski swjaty dźeń njeje.
Płuwace domy přepodali
Bjerwałdski jězor ma nětko nowy wulkoprojekt, kiž móhł turizmej tamnišeje kónčiny přewšo tyć a kiž přinjese zdobom nowy elan za strukturnu změnu we Łužicy.
Hamor (CK/SN). W přitomnosći sakskeho ministerskeho prezidenta Michaela Kretschmera (CDU) je Berlinska firma Floating house GmbH (FHG) předwčerawšim při Bjerwałdskim jězoru swoje prěnje płuwace domy poswjećiła. K dotalnym dźesać so w oktobru štyri a nalěto 2021 dalše přidruža. Dohromady ma potom při ekstra za to twarjenym mosćiku w Klětnjanskim přistawje 26 tajkich domow na wodźe stać. 35 firmow, zwjetša z blišeho regiona, je na tym wobdźělenych. Připrawa změje po dokónčenju 100 dowolowych łožow, prěnje su hižo přenajate. 20 ludźi budźe přichodnje w zarjadnistwje, za rjedźenje, reparatury a za turistiske zaměry přistajenych. Kaž jednaćel FHG Ulf Sybel rjekny, by so wón wjeselił, by-li w bliskosći hosćenc nastał. A tež pasažěrska łódź na jězoru by „jara wulkotna była“.
Tak mjenowana technika makramee steješe tele dny w srjedźišću ...
Spontanity so wzdać
Wohenje a škody zašo spóznać
Zhorjelski wokrjes nadźija so spěchowanja za projekt „lěsny stražnik“
Zhorjelc (AK/SN). Zhorjelski wokrjes chce jako akter lěsne wohenje a lěsne škódniki kaž na přikład skórnika zašo spóznać a tak skutkownišo jednać. Z modelowym projektom „lěsny stražnik“ měł wokrjes nowe dopóznaća dóstać. Za to wutwori hač do kónca awgusta zdźěłany koncept zakład za próstwu pola zwjazkoweho ministerstwa za wobchad a digitalnu infrastrukturu. Cyłkownje 4,2 milionaj eurow projektna suma wučinja a wokrjes nadźija so stoprocentneho spěchowanja Zwjazka. Na předewzaću wobdźěla so wšelacy partnerojo kaž Braniborska techniska uniwersita Choćebuz-Zły Komorow, Wysoka šula Žitawa/Zhorjelc, firma geotechnika, geoinformatika a serwis tzwr (GGS) ze Speyera, Exelonix tzwr, Němska telekom, Vodafone, TÜV Porynska a załožba Björna Steigera za polěpšenje nuzoweje pomocy. Wčera su Zhorjelski krajny rada Bernd Lange (CDU) a mjenowani partnerojo wotpowědne zrěčenje a dojednanja podpisali. Klětu chcedźa projekt zahajić. W lěće 2024 liča z dopóznaćemi.
W Dešnje kokota łapali
Wutworić 3D-leksikon ornamentiki(7)
Idejowe wubědźowanje sakskeho fondsa „Čiń sobu!“ je we wosebitej kategoriji „Žiwa dwurěčnosć“ znowa tworićelskosć na dobro našeje maćeršćiny pozbudźiło. W serialu Serbske Nowiny tule rjad drobnych a małych projektow předstajeja.
Krótkopowěsće (26.08.20)
Poziciju Łužicy skrućić
Podstupim/Choćebuz. Zo bychu Łužicu při skónčenju wudobywanja brunicy podpěrali, měli najprjedy projekty zahajić, kotrež skrućeja poziciju regiona we wubědźowanju. K tomu słuša zasydlenje a wuwiće předewzaćow runje tak kaž natwar a wutwar wědomostnych a slědźerskich zarjadnišćow. Ministerski prezident Dietmar Woidke (SPD) je wo tym dźensa w tamnišim krajnym sejmje knježerstwowe wozjewjenje podał.
Dwě nowej infekciji
Budyšin. Ličba wobkrućenych infekcijow z koronawirusom je so wčera w Budyskim wokrjesu wo dwě na tuchwilu šěsć zwyšiła. Kaž strowotniski zarjad zdźěli, jedna so wo kontaktnej wosobje póndźelnišeju padow. W karantenje je tu 45 ludźi (+ 8). W Zhorjelskim wokrjesu płaći dalša wosoba jako wuhojena. 144 karantenow je postajenych.
Po přestawce so schadźowali
Policija (25.08.20)
Paduch w stanje pobył
Bórk. Z woporom paducha stała je so swójba, kotraž w Bórku při Budyskim spjatym jězoru stanowaše. W nocy na njedźelu zadoby so cuzy do předstana. Jako mandźelskaj z wotdźěleneho spanskeho dźěla pohladnyštaj, bě njeznaty hižo preč. Sobu wzał bě handyjej kaž tež kluče. Te namakaštaj škodowanaj pozdźišo w swojim awće, kotrež bě paduch wotamknył a z njeho por sportowych črijow spakosćił. Dohromady nasta něhdźe 200 eurow škody. Nětko pytaja swědkow, kotřiž su snano něšto wobkedźbowali.
