Krótkopowěsće (01.11.18)
Prěni roman Zwahra wušoł
Lipsk. Hartmut Zwahr wuda swój roman „Božemje dać“. W nim powěda stawiznu hólčeca, kiž na nawrót swojeho nana z wójny čaka, a rysuje wobraz Łužicy kołowokoło kónca Druheje swětoweje wójny. Prěnja ryzy literarna kniha emeritowaneho profesora za socialne a towaršnostne stawizny Uniwersity Lipsk je w nakładnistwje Sax wušła. Klětu ma tam tež druhi zwjazk „Lipsk – Studentski roman“ wuńć.
Najlěpše kniharnje mytowane
Kassel. Zwjazkowa ministerka za medije a kulturu Monika Grütters (CDU) je wčera dohromady 118 njewotwisne a wot mějićelow wobhospodarjene kniharnje wuznamjeniła. Mjez wobchodami třećeje, ze 7 000 eurami dotěrowaneje kategorije „wurjadne předawanišćo“ stej tež kniharnja a pisanski běrow Angeliki Heinrich w Biskopicach.
Podpěruja sadowcowy projekt
Policija (30.10.18)
Přez kružny wobchad jěła
Prěčecy. Alkoholizowana rentnarka je zawčerawšim wječor něhdźe we 18 hodź. přez kružny wobchad na statnej dróze S 100 pola Prěčec zajěła. Při tym zrazy VW Golf 70lětneje do wobchadneho znamjenja. Wěcna škoda wučinja po prěnim trochowanju něhdźe 5 500 eurow. Při wobdźěłanju njezboža žona policiji powědaše, zo bě wot swětłomjetakow druheho jězdźidła slepjena. Zastojnicy Budyskeho policajskeho rewěra pak tohorunja zwěsćichu, zo wona hižo cyle strózba njebě. Z alkoholowym testom woni zwěsćichu, zo měješe jedyn promil alkohola w kreji. Tuž jej dalšu jězbu wězo zakazachu a přewodźachu ju na wotewzaće kreje do Budyskeje chorownje.
Kak ma wjes wupadać?
Na wobydlerskim dialogu plany za nowy Miłoraz předstajili
Miłoraz (CK/SN). Wona přeje sej ručež móžno přesydlenje, praji Liesbeth Fabian. To měješe so hižo před pjeć lětami stać. 74lětna chce „skónčnje wědźeć, kak dale póńdźe.“ Tuchwilne połoženje je ćežke dosć. Rodźena Miłoražanka a jeje syn André, kiž w swojim staršiskim domje bydli, běštaj dwaj z wjace hač 80 zajimcow tele dny na wobydlerskim dialogu w Miłorazu. Slepjanska gmejna bě k tomu na žurlu Miłoraskeho hosćenca „K wočerstwjenju“ přeprosyła. Tam móžachu so ze zastupjerjemi gmejny, zarjadnistwow, LEAG a z planowarjemi rozmołwjeć, sej naćisk twarskeho plana za nowy Miłoraz wobhladać a so wo znowanatwarje towarstwoweho domu, kupjele a wo wjele dalšim wobhonić. Wužiwali su to mnozy Miłoraženjo, ale tež wobydlerjo Slepoho, kotřiž mějachu wjele prašenjow wo přichodnym susodstwje, zwěsći Sten Kowalick z přirady za přesydlenje.
Předstajenje SLA wupředate
Budyšin. Přidatne předstajenje Serbskeho ludoweho ansambla „Naša Hanka w’ wěncu steji“ jutře, srjedu, w 17 hodź. na žurli SLA je wupředate. Wšitkim přećelam baleta poskića z dwudźělnym baletnym kruchom „Wobliča lubosće – Le sacre du printemps“ štwórtk, 8. nowembra, w 19.30 hodź. dalšu móžnosć, balet SLA dožiwić.
Poswjeća Hronowske pomniki
Kamjenej. Swjatočne poswjećenje pomnikow blisko Kamjeneje, kotrež na zhubjenu wjes Hronow dopominaja, budźe jutře, srjedu, w 14 hodź. Nyšpor zahaji so pola Haja při wopomnjenskimaj kamjenjomaj při pućowanskej šćežce z Kamjeneje do Chrósta. Přizamknje so procesion k třećemu a štwórtemu pomnikej, kotrejž stejitej při hłownej dróze z Kamjeneje do Wulkeje Dubrawy kaž tež w bliskim lěsku. Chór Meja nyšpor wobrubi. Wšitcy su wutrobnje přeprošeni.
Nowa gratownja nastawa
Delnja Kina (UM/SN). Dołho dyrbjachu kameradojo Delnjokinjanskeje dobrowólneje wohnjoweje wobory na swoju nowu gratownju čakać, nětko pak su jeje kontury hižo jasnje spóznajomne. Minjeny pjatk swjećachu na twarnišću zběhanku. „Do toho smy projekt tři lěta planowali a w tym času tež někotružkuli rozrěč měli“, dopominaše so nawoda wobory Hagen Teichert. Hnydom pak wón doda: „Do planowanja pak běchmy stajnje wusko zapřijeći.“
Štož na Budyšanow a jich hosći přichodnu sobotu čaka, dožiwichu ...
Sobu najlěpša chorownja kraja
Klinikum łužiskeje jězoriny 120. jubilej wobstaća swjećił
Wojerecy (SiR/SN). Dlěje hač 120 lět maja we Wojerecach mjeztym chorownju. W oktobru 1898 započachu w dźensnišim bydlenskim a wikowanskim domje mjez Frenclowej a Liebknechtowej medicinske zastaranje centralizować. Tehdy započachu tam z dwaceći łožemi, operaciskej žurlu, lěkarjom, dwěmaj hladarjomaj a wulkim problemom. Hladajo na ličbu wobydlerjow bě chorownja wot wšeho spočatka přemała, zo móhli lěkarske zastaranje za wšitkich pacientow dołhodobnje zaručić. 1964 połožichu tuž zakładny kamjeń za dźensniši Klinikum łužiskeje jězoriny na Hasy dr. Marje Grólmusec 10, kotryž 1968 jako tajki wotewrěchu.
Dźensa ma stacionarny wobłuk klinikuma w nošerstwje Sana AG 650 łožow, hdźež kóžde lěto wjace hač 64 000 pacientow lěkarsce zastaruja. Něhdźe 800 sobudźěłaćerjow stara so w 14 wotrjadach a třoch institutach wo profesionalne a moderne hladanje.
Krótkopowěsće (30.10.18)
Pozitiwny trend traje
Budyšin. We wuchodnej Sakskej je nětko kónc oktobra 17 862 bjezdźěłnych, 401 wosoba mjenje hač w septembrje a 1 509 mjenje hač před lětom. „Zwólniwosć předewzaćow, ludźi přistajić, je wulka a wužadanja, zo bychu městna wobsadźili, přiběraja“, rjekny nowinarjam dźensa Thomas Berndt, předsyda jednaćelstwa Budyskeje agentury za dźěło.
Z Gorbačowom festiwal zahajili
Lipsk. Podawki lěta 1968, kaž Praske nalěćo, protesty přećiwo wójnje we Vietnamje a studentske zběžki su ćežišćo lětušeho 61. filmoweho festiwala DOK Lipsk. Prěni raz nałožowana kwota zaruča, zo je 40 procentow přinoškow pod režiju žonow nastał. Na wčerawšim wotewrjenju pokazachu jako zazběh dokumentaciju Wernera Herzoga „Zetkanje z Gorbačowom“.
Nowaj sobudźěłaćerjej w SI
Pjenjezy za nowu připrawu leopardow hišće nimaja
Wojerecy (SN). Zajutřišim, srjedu, skónči so crowdfundingowa akcija Wojerowskeho zwěrjenca za financowanje noweje připrawy leopardow. Naročny zaměr, na te wašnje 13 000 eurow zezběrać, pak hrozy zwrěšćić. Krótko do skónčenja kampanje je jeno dźesaćina planowaneje sumy dóšła. Při tym běchu so nadźijeli, zo předewšěm přez ekskluziwne premije, kaž přenocować w zwěrjencu abo při zwěrjencowym haće romantisce wječerjeć, wulku podpěru dóstanu.
