Z njewšědnej namakanku farska zahroda wo zajimawostku bohatša
Slepo (CK/SN). Na terenje Slepjanskeje fary su minjenu njedźelu historisku studnju oficialnje poswjećili. Fararka Jadwiga Malinkowa mjenowaše ju „městno zetkawanja, hdźež móžeš so wo Bohu a cyłym swěće rozmołwjeć“.
Namakali běchu studnju cyle připadnje. Loni su na farskej zahrodźe archu Noacha twarili. Tam mějachu pólne kamjenje jako wotmjezowanje skłasć. Jako za to trěbna twarska mašina wróćo jědźeše, wona ze zadnim lěwym kolesom nadobo zapadny. Zornowcowa plata bě so złamała. Pod njej wuhladachu twarscy dźěłaćerjo znajmjeńša dwaj metraj hłuboku dźěru, kaž čłon wosadneje cyrkwinskeje rady Edgar Pawel zwěsći. Zornowcowu platu połožichu nabok, a tak wujewi so studnja, pochadźaca po trochowanju něhdźe z 15. lětstotka. Dokładnu starobu archeologojo hižo zwěsćić njemóžachu. Za to bě dubowe drjewo studnje přejara přetłate.
