Přesydlenja Miłoraza dla gmejna Trjebin tójšto wobydlerjow zhubi
Trjebin (AK/SN). Za lěće 2021 a 2022 planuje gmejna Trjebin dwójny etat. To zdźěli komornica Carmen Petrick na zašłym posedźenju gmejnskeje rady. Přesydlenja wjetšiny Miłoražanow do Slepjanskeje gmejny dla Trjebinska tójšto wobydlerjow zhubi. Wjesnjanosta Waldemar Locke (CDU) z toho wuchadźa, zo změja na kóncu jenož hišće 600 wobydlerjow. Potom njewoteběraja jenož klučowe připokazanja, ale tež srědki z dochodoweho dawka, kotrež su za fungowacu gmejnu sobu najwažniše.
„Jeničce z přeličenjom zakładneho kapitala so gmejnje Trjebin radźi hospodarski plan wurunać“, Waldemar Locke praji, rěčo wo jasnje woteběracej substancy. Hladajo na to ma wón za trěbne a njewotwobarajomne swoju gmejnu do Slepjanskeje zagmejnować. Wjesnjanosta gmejnskich radźićelow prošeše, wo tymle kroku dokładnje rozmyslować. Na kóncu, tak wón podšmórny, změja potom wobydlerjo rozsudźić.
