Krótkopowěsće (02.11.18)
Nóžkuja za klimu po Łužicy
Wojerecy. Ekumeniski putniski puć za klimowu sprawnosć přeprěči łužiski brunicowy rewěr póndźelu, 5. nowembra, wot Wojerec do Gubina. Zwjazkowy předsyda wobswětoweho zwjazka Zelena liga Renej Šuster z Choćebuza wot Wojerec do Rownoho sobu nóžkuje. K centralnym žadanjam putniskeho puća słuša wudobywanje brunicy sčasom skónčić, zo by ke klimowej sprawnosći po cyłym swěće dóšło.
Hłosy po wólbach zjawnje wuliča
Njebjelčicy. Registrowani wolerjo za wólby Serbskeho sejma móža hišće hač do jutřišeho, 3. nowembra, w 10 hodź. swoje wólbne listy w běrowje wólbneho wuběrka na Hłownej 9 w Njebjelčicach wosobinsce wotedać. Potom započnu čłonojo wólbneho wuběrka hłosy wuličeć. Zjawne wuličenje móža zajimcy na městnje sćěhować.
Za moderny bliskowobchad
Namjety za nowy móst za pěškow mytowali
Budyšin (SN). Nowemu mostej za pěškow nad sprjewinym dołom je město Budyšin nětko wulki krok bliže přišło. Po tym zo běchu so studenća Techniskeje uniwersity Drježdźany z projektom zaběrali a wšelake namjety zapodali, su spočatk tydźenja w Budyskej radnicy najlěpše namjety mytowali. Wupytała bě je do toho jury fachowcow, kotrejž přisłušachu tež zastupjerjo města.
Z pjeć zapodatych namjetow přesadźištej so dwaj, kotrejž złožujetej so na wisaty móst na napjatych powjazach (Spannbandbrücke). Wonej matej najwjetše šansy so na kóncu zwoprawdźeć hodźeć. K woběmaj pak wobsteja dale prašenja. Tohodla njeje jury žane prěnje městno, ale dwójce druhe městno spožčiła. Jedna warianta je wuslědk diplomoweho dźěła Antona Meiniga. Wón njeje móst jenož technisce wobličił, ale je zdobom na to dźiwał, kak móhli jón najlěpje do wokoliny zarjadować, bjez toho zo by přejara napadnył. Tamna warianta je zhromadne dźěło třoch studentow.
Čita wo Krabaće
Wučbne srědki nětko čapor
Do přetwara Chróšćanskeje šule wšitko z łubje wurumowali
Chrósćicy (SN/MWj). Kaž wulět do blišich stawiznow běchu čaporowe wiki, kotrež su wčera dopołdnja tójšto ludźi do bywšeje Chróšćanskeje srjedźneje šule přiwabili. Tam organizowachu druhi raz čaporowe wiki, na kotrež běchu najwšelakoriše wučbne srědki za cyle tuni pjenjez na předań. Mjez wopytowarjemi běchu bywši šulerjo a wučerjo runje tak kaž zajimcy z druhich kónčin.
Hižo w prěnjej rumnosći bě wjele widźeć, předewšěm technika, mjeztym runjewon historiska. Tam stejachu mnohim znate polyluxy, jich předchadnik pentascop, projektory za swětłowobrazy, měrjenske nastroje z wučby fyziki, wutykane ptaki a samo mechaniski kopěrowak z dawnych časow NDR. Dale poskićachu cyłe rjadowniske sadźby knihow „Mokrowčenjo“, „Rebel Jan Cuška“, „Hronow“ a dalše. W přichodnej rumnosći ležachu njeličomne nasćěnowe karty, mjez druhim jedna wo demokratiskich krajach Europy něhdźe ze 1970tych lět. W třećej rumnosći běchu zběrki bručkow, słowniki, tafle a dalše wučbne srědki widźeć. Samo blida a stólcy běchu w poskitku.
Policija (01.11.18)
Po zražce ćeknyć chcył
Běła Woda. Trochu jara blisko přišłoj běštej sej zawčerawšim na Heinricha Heinowej w Běłej Wodźe wosobowej awće typa VW Polo a Renault, tak zo so jedne tamneho wotboka šmórny. 66lětny wodźer Renaulta jědźeše prosće dale. 29lětnemu šoferej VWja pak so poradźi jeho k zastaću nuzować. 66lětny změje so nětko njedowoleneho wotsalenja z městna njezboža dla zamołwić. Na jězdźidłomaj nasta něhdźe 2 000 eurow škody.
Wopity kolesowar padnył
Njedźichow. Kedźbliwa wobydlerka informowaše zawčerawšim policiju wo tym, zo w Njedźichowje muž z kolesom při puću leži. Zastojnicy zwěsćichu, zo drje bě alkohol na tym wina, wšako naměrichu pola 41lětneho 1,88 promilow.
Ponowjene pomniki poswjećili
Něhdyša wjes Hronow mjez Kamjenej a Wulkej Dubrawu je hač do dźensnišeho zwjazana z potajnosćemi a njewotmołwjenymi prašenjemi. Wčera su wěriwi Radworskeje wosady Hronow wopominali.
Radwor (SN/MkWj). Tójšto ludźi je so wčera popołdnju na kromje Kamjeneje zešło. We wobłuku nyšpora poswjeći tam wosadny farar Beno Jakubaš dwaj wopominanskej kamjenjej a dwaj swjatej křižej. Wšitke štyri objekty běchu minjeny čas na iniciatiwu Radworčana Jana Nuka ponowili. Takrjec nošerstwo předewzaća přewzał je Radworski chór Meja, kiž nyšpor na třoch stacijach hudźbnje wobrubi.
Jana Nuka bě stawizna Hronowa hižo jako młodostneho hnuła, kaž sam rjekny. Jurij Winger bě ju w swojej knižce wopisał a dóńt ležownosće do Třicećilětneje wójny zapołožił, byrnjež wjes prawdźepodobnje hižo do toho wot rubježnikow zničena była. Wobydlerjo susodnych wsow skedźbnjachu z wopominskimi kamjenjemi a swjatymi křižemi na dóńt młyna, dweju statokow a jeho wobydlerjow. W běhu lět pak buchu pomniki a křiže zanjechane a zdźěla zabyte.
Dopomnjenki wožiwili
Krótkopowěsće (01.11.18)
Prěni roman Zwahra wušoł
Lipsk. Hartmut Zwahr wuda swój roman „Božemje dać“. W nim powěda stawiznu hólčeca, kiž na nawrót swojeho nana z wójny čaka, a rysuje wobraz Łužicy kołowokoło kónca Druheje swětoweje wójny. Prěnja ryzy literarna kniha emeritowaneho profesora za socialne a towaršnostne stawizny Uniwersity Lipsk je w nakładnistwje Sax wušła. Klětu ma tam tež druhi zwjazk „Lipsk – Studentski roman“ wuńć.
Najlěpše kniharnje mytowane
Kassel. Zwjazkowa ministerka za medije a kulturu Monika Grütters (CDU) je wčera dohromady 118 njewotwisne a wot mějićelow wobhospodarjene kniharnje wuznamjeniła. Mjez wobchodami třećeje, ze 7 000 eurami dotěrowaneje kategorije „wurjadne předawanišćo“ stej tež kniharnja a pisanski běrow Angeliki Heinrich w Biskopicach.
Podpěruja sadowcowy projekt
Policija (30.10.18)
Přez kružny wobchad jěła
Prěčecy. Alkoholizowana rentnarka je zawčerawšim wječor něhdźe we 18 hodź. přez kružny wobchad na statnej dróze S 100 pola Prěčec zajěła. Při tym zrazy VW Golf 70lětneje do wobchadneho znamjenja. Wěcna škoda wučinja po prěnim trochowanju něhdźe 5 500 eurow. Při wobdźěłanju njezboža žona policiji powědaše, zo bě wot swětłomjetakow druheho jězdźidła slepjena. Zastojnicy Budyskeho policajskeho rewěra pak tohorunja zwěsćichu, zo wona hižo cyle strózba njebě. Z alkoholowym testom woni zwěsćichu, zo měješe jedyn promil alkohola w kreji. Tuž jej dalšu jězbu wězo zakazachu a přewodźachu ju na wotewzaće kreje do Budyskeje chorownje.
Kak ma wjes wupadać?
Na wobydlerskim dialogu plany za nowy Miłoraz předstajili
Miłoraz (CK/SN). Wona přeje sej ručež móžno přesydlenje, praji Liesbeth Fabian. To měješe so hižo před pjeć lětami stać. 74lětna chce „skónčnje wědźeć, kak dale póńdźe.“ Tuchwilne połoženje je ćežke dosć. Rodźena Miłoražanka a jeje syn André, kiž w swojim staršiskim domje bydli, běštaj dwaj z wjace hač 80 zajimcow tele dny na wobydlerskim dialogu w Miłorazu. Slepjanska gmejna bě k tomu na žurlu Miłoraskeho hosćenca „K wočerstwjenju“ přeprosyła. Tam móžachu so ze zastupjerjemi gmejny, zarjadnistwow, LEAG a z planowarjemi rozmołwjeć, sej naćisk twarskeho plana za nowy Miłoraz wobhladać a so wo znowanatwarje towarstwoweho domu, kupjele a wo wjele dalšim wobhonić. Wužiwali su to mnozy Miłoraženjo, ale tež wobydlerjo Slepoho, kotřiž mějachu wjele prašenjow wo přichodnym susodstwje, zwěsći Sten Kowalick z přirady za přesydlenje.
