Marko Grojlich w Zarěču čitał
Schadźowanku lětsa hinak swjećić
Kelko zarjadowanjow je so lětsa hižo w Hornjej Łužicy z woporom korony stało, drje žadyn čłowjek zličić njemóže. Najebać přiběrace ličby infekcijow pak lětušu schadźowanku dale planuja.
Budyšin (SN/MWj). „146. schadźowanka budźe, a to 21. nowembra 2020 w Budyskej Krónje!“ Z tejle namołwu wobroćeja so režiseraj Katka Pöpelec a Syman Hejduška kaž tež Jana Pětrowa ze Załožby za serbski lud na serbskich studentow a šulerjow Serbskeho gymnazija Budyšin, zo bychu swoje přinoški za kulturny program zapodali.
Schadźowanka budźe po słowach organizatorow „naročna, dokelž jednore ničo njebudźe“. Přiwšěm chcedźa znowa zajimawy program zestajeć, za čož měli so zajimcy hač do 9. oktobra přizjewić a zdźělić, kelko sobuskutkowacych wěsty přinošk změje a kotrej temje jón wěnuja. Tak w namołwje rěka, zo měli studenća a šulerjo na dołhosć přinoška dźiwać. Nazhonjenja dźě wuča, zo krótke a jadriwe sceny najwjace přikleska wuwabjeja.
Zahrodniske wudźěłki z Koćiny waža sej mjeztym hižo dlěje hač ...
Njerealistiske a překrótkodobne
Z krajnej zahrodnej wustajeńcu 2025 měješe město Wojerecy wulki cil. Samo areal kołowokoło Łužiskeje kupjele a gondloweho hata bě hižo wupytany. Nětko je so projekt kaž mydliznowy pucher rozpušćił.
Wojerecy (AK/SN). Požadanje za Krajnu zahrodnu přehladku Sakskeje w lěće 2025 město Wojerecy cofnje, kaž je tamniša měšćanska rada wčera jednohłósnje wobzamknyła. „Njejsmy cyły proces prawje posudźowali. Doba wobdźělenja wobydlerjow bě překrótka. Jednanja wo cyłkownym projekće njeběchu optimalne“, posudźowaše wyši měšćanosta Stefan Skora (CDU) a přizna při tym zmylki. „Bychmy wobydlerjow bóle zapřijeć dyrbjeli.“
Zelena swěca za wobzamknjenje
Lubin (SN/at). Předewzaće wokrjesa Dubja-Błóta, Domowinje jako spěchowacy čłon přistupić, je krok dale. Wuběrk za kubłanje, sport a kulturu tamnišeho wokrjesneho sejmika je na swojim posedźenju předwčerawšim w Lubinje wot wokrjesneje społnomócnjeneje za naležnosće Serbow Sabriny Kuschy předpołoženemu naćiskej za wobzamknjenje z jednym hłosawzdaćom přihłosował. Wokrjesni radźićeljo z kónčiny mjez Łukowom, Lubinom a Königs Wusterhausenom w Braniborskej su za sadu „Wokrjes Dubja-Sprjewja wobzamknje próstwu wo spěchowace čłonstwo w Domowinje Zwjazku Łužiskich Serbow z.t. zapodać.“ zelenu swěcu dali, tak zo móže wokrjesny sejmik na posedźenju 28. oktobra nastupajo próstwu doskónčnje rozsudźić. Zarjadnistwo by so potom na Domowinu w Budyšinje wobroćiło, zo by přistupnu proceduru zahajiła.
Nimo toho je mjenowany wuběrk aktualizowane Směrnicy k spěchowanju serbskeho ludu we wokrjesu Dubja-Błóta schwalił, kotrež maja po wobzamknjenju přez sejmik 28. oktobra płaćiwosće nabyć a tak dotalne z lěta 2016 narunać.
Po horach a dołach pućować(12)
Idejowe wubědźowanje sakskeho fondsa „Čiń sobu!“ je we wosebitej kategoriji „Žiwa dwurěčnosć“ tworićelskosć na dobro našeje maćeršćiny znowa pozbudźiło. Serbske Nowiny tule w serialu rjad drobnych a małych projektow předstajeja.
Nahłe skalizny, wuske wudrjeńcy a rjane wuhlady na krajinu – Sakska Šwica ma tójšto dožiwjenjowpołnych potajnstwow, kotrež móžeš sej wotkryć. Tež Syman Pöpel z Chrósćic je tam zas a zaso po puću. Krosnowar sej kónčinu jara waži a je tam mjez druhim tež ze serbskimi jenakozmyslenymi tón abo tamny dyrdomdej přežiwił. Nětko chce wón z dalekubłanskej jězbu pod hesłom „Witaj, přiroda“ we wobłuku biologije, zemjepisa a sporta Saksku Šwicu zajimcam spřistupnić. Ze spěchowanskimi srědkami fondsa „Čiń sobu“ přihotuje wón jězbu, za kotruž móža so młodostni wot 16 lět přizjewić. „Dwaj přewodźerjej z narodneho parka Sakska Šwica, kotrajž so tam jara derje wuznawataj, budźetaj nam poboku“, Chróšćan rozkładuje.
Krótkopowěsće (30.09.20)
Polěpšenje na dźěłowych wikach
Budyšin. We wuchodnej Sakskej bě w septembrje 18 299 bjezdźěłnych, 496 mjenje (-2,6 procentow) hač w awgusće. Kaž Budyska agentura za dźěło dźensa zdźěli, přizjewichu předewzaća regiona tónle měsac zaso jasnje wjace dźěłowych městnow. Nimo toho su młodźi ludźo wukubłanje započeli a zawody dalšich dźěłopřijimarjow přistajili. Bjezdźěłnostna kwota wučinješe 6,6 proc.
Dźesać nowych infekcijow
Budyšin. Znowa wo dźesać je wčera ličba zwěsćenych koronainfekcijow w Budyskim wokrjesu rozrostła, cyłkownje su jich 603. Wčera bě 35 wosobow schorjenych, z kotrychž dwě dale w chorowni lěkuja. Předwčerawšim su 44 testow přewjedli. Zhorjelski wokrjes rozprawješe wčera wo štyrjoch nowonatyknjenych, cyłkownje 392. Třo su w Hamorje, jedyn w Zhorjelcu.
Z přistajenymi so dojednali
Karnewal lětsa njebudźe
Serbske Pazlicy. Kaž w Kulowje je so nětko tež Serbskopazličanske karnewalowe towarstwo rozsudźiło, koronapandemije dla lětuše póstniske zarjadowanja w Njebjelčanskej „Bjesadźe“ wotprajić. To woznamjenja, zo tam žane zahajenje karnewaloweje sezony njeswjeća a tež žanoho noweho princa njewuzwola. Hač so klětu k wjerškej póstniskeje sezony kapičkowe wječory a dalše ze zańdźenych lět zwučene zarjadowanja wotměja, tuchwilu hišće jasne njeje. Kaž ze Serbskopazličanskeho karnewaloweho towarstwa rěka, dyrbja najprjedy raz dalše wuwiće korony a z nim zwisowace postajenja hygieny wočaknyć.
Nowi spěwarjo rady witani
Konjecy. Serbski muski chór Delany přeproša dalšich muži, kotřiž rady a rjenje spěwaja, na projektny spěwny wječor. Po dorěčenju z prěnimi nowymi spěwarjemi zetkaja so stajnje štwórtk w 19 hodź. w Konječanskej Burskej stwě, informuje zamołwity za projektny chór Alojs Langa. „Na nowych spěwarjow čaka a wjeseli so předsydstwo chóra Delany“, rěka w jeho zdźělence.
Kulturna zyma wupadnje
Lessingowe město změje najmoderniši gymnazij
Kamjenc (BG/SN). Za nowy přitwar Kamjenskeho Lessingoweho gymnazija su minjeny pjatk nachwatali zakładny kamjeń połožić. Dołho běchu w měsće a wokrjesu wo to wojowali, zo so kubłanišćo na swoje starodawne městno załoženja nawróći. „Nětko so to zwoprawdźa a šula budźe modernišo wuhotowana dyžli do toho“, rjekny 1. přirjadnik krajneho rady Udo Wićaz (CDU). Hromadźe z wyšim měšćanostu Rolandom Dantzom (njestronjan) połoži wón kasetu z aktualnymi dokumentami, nowinami a pjenjezami do fundamenta. Trójce z hamorom na zakładny kamjeń klepnył je stolětny wobydler Kamjenca Werner Geißler, kotrehož dźěćatstwo a powołanske žiwjenje běštej wusko z Lessingowym gymnazijom zwjazanej. Tam bě wón šuler a pozdźišo hač do wuměnkarskeje staroby wučer.
