Čorny Chołmc (UH/SN). Najebać njewobstajne wjedro so organizatorojo Čornochołmčanskich adwentnych wikow minjenu njedźelu přemało wopytowarjow dla hóršić njemóžachu. Mnozy zajimcy ze wsy a wokoliny chwalachu wotměnjawy poskitk wot nakraća wulkeho wosuška přez mnohe předawanišća a tradicionalnu bajku Brětnjanskich a Čornochołmčanskich dźěći hač k poskićenjam dujerskeje kapały Kummelbrass.

Stajni hosćo wšak dóńdźechu sej jako prěnje do Frencloweho domu. Tam su kóžde lěto Čornochołmčanske wjesne žony ze swojimi kreatiwnymi wudźěłkami za domjacu dohodownu dekoraciju zastupjene. Kaž jich předsydka Elke Lindenberger rozłoži, běchu žony w nowembru tydźensce paslili a tak dohromady wjace hač sto mjeńšich a wjetšich adwentnych wěncow a dalšich wudźěłkow zhotowili.

Wobruče fuk

Jaseńca. Njeprošeny wopyt měješe minjene tydźenje ratarski zawod w Jaseńcy w Kubšiskej gmejnje. Kaž hakle spočatk tydźenja pytnychu, běchu so tam njeznaći minjeny měsac zadobyli a dohromady 16 wobručow ratarskeje mašiny pokradnyli. Zawodej nasta něhdźe 3 200 eurow wěcneje škody.

Křesło so zhubiło

Wojerecy. W nocy na wutoru běchu nje­znaći we Wojerecach po puću. Z chódby wjacebydlenskeho domu pokradnychu woni křesło. Te bě 72lětna wobydlerka před bydlenje stajiła, dokelž chcyše je ponowić dać. Swětłobrune kožane křesło bě po informacijach rentnarki něhdźe 200 eurow hódne.

Wuměnkarjo gmejny Ralbicy-Róžant zhromadnje adwentničku swjećili

Šunow (aha/SN). Pokročujo z tradiciju, kotraž saha hač do časa NDR, přeprosy gmejna Ralbicy-Róžant swojich wuměnkarjow – žony, staršich hač 60 lět, a muži nad 65 lětami – wčera do Šunowskeje Fabrikskeje hospody. Něhdźe 140 ludźi ze wšěch wsow gmejny je přeprošenje sćěhowało. Na połnej wobsadźenej žurli běštej mjez nimi jenož dwě žonje w katolskej narodnej drasće.

Po słódnej kwasnej jědźi kaž tež pozdźišo při kofeju a wosušku wuwi so mjez přitomnymi lóštna bjesada. Runja minjenym lětam dožiwichu hosćo spodobny kulturny program, kotryž wuhotowaše za nich nimale 20 tři- do pjećlětnych chowancow Ralbičanskeje pěstowarnje „Dr. Jurij Młynk“. Wšitke holčki běchu na sněženki předrasćene, mjez hólcami bě samo swj. Mikławš. Tři kubłarki a dalši kubłar kaž tež nawodnica pěstowarnje Jadwiga­ Nukowa dźěći přewodźachu. Ze sylnym přikleskom dźakowachu so rentnarjo za předstajenu mału hru kaž tež za spěwčki a rejki.

Kubłanske prašenja zaběrachu centralne městno w lětušej rozprawje społnomócnjeneje za serbske naležnosće An­ny­ Kosacojc-Kozeloweje tele dny před zhromadźiznu Choćebuskich měšćanskich zapósłancow. Nastupajo Serbski sejm nawjaza wona na słowa wyšeho měšćanosty Holgera Kelcha (CDU).

Choćebuz (SN/at). Serbske kubłanske nalež­nosće wužadachu sej w minjenym lěće wobšěrne dźěło. Kaž Anna Kosacojc-Kozelowa rozprawješe, njewotpowěduje tuchwilu předležacy naćisk noweho postajenja wo serbskich šulach w Braniborskej wobzamknjenju měšćanskeho parlamenta wot měrca 2017. Za to pak ma kraj trěbny cyłkowny ramik wutworić, „ma-li so serbske šulske kubłanje hišće lěpje radźić“.­ Wona wučerkam a wučerjam w serbskim wobłuku wobkrući, „zo wšě­dnje enormne dźěło wukonjeja, za kotrež maja so wobłukowe wuměnjenja polěpšić“. Porokowała je rjadowanje wo minimalnej šulerskej ličbje w přiłoze 1 zarjadniskich předpisow k organizaciji wučby, „to so wotpohladej wobzamknjenja měšćanskich zapósłancow spřećiwja“.