Krótkopowěsće (09.11.20)
Nowostce LND tež jako e-book
Budyšin. Lětsa w Ludowym nakładnistwje Domowina wušłej wěcna kniha Cordule Ratajczakoweje „Nowa swoboda?“ a powědančko Angele Stachoweje „Slědne dny strowja“ w delnjoserbskim přełožku předležitej nětko tež jako e-bookaj. Elektroniskej wudaći hodźitej so w shopje LND pod www.domowina-verlag.de skazać.
Nowe hudźbne widejo
Budyšin. Najnowši widejowy klip „Krabat“ serbskich hiphoperow z mjenami Lil Handrij, FloJ & SMAN je po swojej wčerawšej premjerje na Youtubekanalu „Serbska hduźba“ dotal něhdźe 1 100 přihladowarjow přiwabił. Produkciju běštej Załožba za serbski lud a kampanja „So geht sächsisch“ spěchowałoj.
Partitura Mětška wozjewjena
Berlin. Hudźbne nakładnistwo Edition Roy, specializowane na publikowanje referencnych zynkonošakow a notow přewažnje noweje hudźby, je partituru serbskeho komponista Jura Mětška wudało. Kruch „Quatuor noir“ je twórba za braču, cello a kontrabasaj, kotruž bě Mětšk w nadawku Budyskeho kulturneho zarjada spisał. Muzikalije su mjez druhim w Smolerjec kniharni na předań.
Policija (06.11.20)
Dźěći kamjenje mjetali
Chelno. Z njewšědnym padom wohroženja nadróžneho wobchada dyrbja so nětko w Budyskim policajskim rewěrje zaběrać. Na statnej dróze S 106 mjez Słonej Boršću a Chelnom je swědka předwčerawšim wobkedźbowała, kak wjacore dźěći po wšěm zdaću kamjenje na nimo jěduce jězdźidła mjetaja. Při mosće blisko Chelna trjechichu kamjenje nakładne awto. Policija pyta nětko dalšich swědkow, kotřiž su něšto wobkedźbowali, abo potrjechenych šoferow. Pokiwy přijimuje pod telefonowym čisłom 03591/ 35 60.
Nowe postajenja płaća
Bydlenja chcedźa předać
Kotre imobilijowe rozrisanje namakaja, dotal jasne njeje
Njebjelčicy (SN/MWj). Imobilijowe naležnosće w Miłoćicach Njebjelčansku gmejnsku radu tuchwilu zaběraja. Jeje čłonojo rozestajachu so wčera z prašenjom, hač socialne bydlenja při puću k Miłočanskej žabje předadźa, a na kotre wašnje měło so to stać. Po słowach wjesnjanosty Tomaša Čornaka (CDU) su 1991 něhdźe 1,1 milion hriwnow do twarjenja ze štyrjomi bydlenjemi a ze zarjadowanskej rumnosću w pincy inwestowali. Wot toho časa su bydlenja nimale bjez přestawki přenajate.
Pozadk je, zo chcedźa w Njebjelčicach swoje gmejnske financy wurunać, kaž to Kamjenski imobilijowy makler Matthias Bosch wčera rjekny. Z jeho pomocu su hižo bywšu Njebjelčansku pěstowarnju wuspěšnje wotbyli. Nětko rozmysluja wo tym, kak Miłočanske bydlenja najlěpje předać. Jedna móžnosć móhła być, dom jako cyłk poskićeć. To pak móhło spekulantow přiwabić. Lěpje drje by było, a to tež w zajimje socialneho měra we wsy, štyri bydlenja wotnajerjam poskićić, zo móhli dale w nich bydlić.
Korona wuskutkuje nowe ideje
Kaž Bože słužby su tež najwšelakoriše cyrkwinske zarjadowanja hižo měsacy wot koronoweje pandemije wobwliwowane. Přichodny tydźeń potrjechi to jara woblubowany termin.
Na Worklečanskej kupje je Wätzigec firma ze Serbskich Pazlic w ...
Krótkopowěsće (06.11.20)
Korona-hotspot Němskeje
Budyšin/Zhorjelc. Budyski a Zhorjelski wokrjes stej korona-hotspot Němskeje. Krajnoradnej zarjadaj stej wčera ličbje 328 resp. 305 natyknjenjow na 100 000 wobydlerjow w minjenych sydom dnjach wozjewiłoj. Ličba zwěsćenych koronainfekcijow je wo 169 na 2 545, smjertnych padow wo sydom na 36 w Budyskim wokrjesu rozrostła. W Zhorjelskim powjetši so ličba natyknjenjow wo 109 na 1 416 a smjertnych padow wo dwaj na 32.
Hłowna wólbna wotprajena
Chrósćicy. Župa Kamjenc je swoju hłownu a wólbnu zhromadźiznu 18. nowembra wotprajiła, Domowina dźensa zdźěli. Za přičinu mjenuja aktualne postajenja koronakrizy dla. Kaž čłonka župneho předsydstwa Katharina Jurkowa rjekny, „dyrbimy nětko zamołwiće jednać a dalšemu rozpřestrěću korony zadźěwać, zo móžemy hromadźe hody swjećić“. Zhromadźiznu chce Kamjenska župa spočatk 2021 nachwatać.
Schow před koronu w klóštrje
Policija (05.11.20)
Žana kmana rubizna
Słona Boršć. Na awtodróhowym wotpočnišću pola Słoneje Boršće su so njeznaći w nocy na wutoru do nakładneho awta zadobyli, jako 35lětny šofer prědku spaše. Najskerje pak běchu skućićeljo frustrěrowani, dokelž bě na Lkw-ju pica za kóčki nakładowana. Ta jim po wšěm zdaću ničo wunjesła njeby, přetož sobu wzali ničo njejsu. Weterinarny zarjad Budyskeho wokrjesa bě na městnje, šofer móžeše na to dale jěć.
Žane płuwanje za šule
Wojerecy. Runja mnohim dalšim zarjadnišćam dyrbješe spočatk tydźenja tež Wojerowska Łužiska kupjel zawrěć. Kaž jednaćel Matthias Brauer zdźěli, potrjechi to zjawne kupanje a sawnu kaž tež wšitke dalekubłanja, kursy a towarstwowe płuwanje. Byrnjež so intensiwnje wo to prócowali, njemóža tež žane šulske płuwanje a płuwanske kursy za pěstowarnje přewjesć. Po słowach Brauera je kupjel w tak mjenowanym standby-modusu. Ručež budu wotpowědne zakonske móžnosće wutworjene, chcedźa Łužisku kupjel krótkodobnje zaso wočinić.
Dźěći móža darik dobyć
Do „Sprjewineje parle“ přińdu nětko rjemjeslnicy
Malešecy (CS/SN). Sanitarne připrawy w towarstwowym domje „Sprjewina parla“ w Połpicy (Halbendorf) w Malešanskej gmejnje zawěrno přemoderne njejsu. Tohodla dyrbja je nuznje ponowić. Zo móhli so čłonojo Malešanskeje gmejnskeje rady wo tuchwilnym stawje přeswědčić, přewjedźechu woni swoje posedźenje předwčerawšim w „Sprjewinej parli“. Tam mějachu wudawkam we wobjimje 12 000 eurow přihłosować. Sanitarne dźěła za tule sumu přewozmje Gärtnerec firma z Barta. Dale wobstaraja firma Hantke elektrodźěła za 1 100 eurow, firma Hanisch blidarske dźěła za 500 eurow a Baslerec předewzaće molerske dźěła za 2 500 eurow. Dokelž dyrbja hosćency cyły nowember začinjene měć, maja rjemjeslnicy w Połpicy přichodne tydźenje swobodnu ruku.
