Choćebuz (SN). Dwurěčnosć w zjawnosći je město Choćebuz minjeny čas dale zwoprawdźiło. To zwěsći społnomócnjena za serbske naležnosće města Anna Kosacojc-Kozelowa wčera w rozprawje před měšćanskej radu w Choćebuskej měšćanskej hali.

Za wuspěch Kosacojc-Kozelowa ma, zo buchu zajimy serbskeho ludu w za­konju wo skrućenju a změnje struktury wobkedźbowane. To je so dźakowano do­bre­ho zhromadneho dźěła komunow ze serbskimi zastupjerjemi poradźiło, wona wuzběhny. Byrnjež w rozprawje wjacore pozitiwne dypki naličiła, pokaza wona tež na ćeže. Jako bolostne rysowaše Ko­sacojc-Kozelowa mjez druhim njespoko­jacy staw na kubłanskim polu. Kritisce wupraji so wona wo tym, zo je na dwěmaj z cyłkownje wosom zakładnych šulow w Choćebuzu přichod wučby serbšćiny chutnje wohroženy. Winu za to widźi wona w šulskich postajenjach, kotrež sej minimalnu ličbu wobdźělnikow žadaja. Tohodla njemóža na šulach serbske skupiny wutworić. Runja Braniborskej Serbskej radźe napominaše tuž wčera krajne knježerstwo tele postajenje wotstronić.

Wokrjesny sejmik Dubje-Błóta wo přistupje k Domowinje rozsudźił

Lubin (SN/JaW). Wokrjes Dubje-Błóta chce so ze spěchowanskim čłonom Domowiny stać. Wotpowědnu próstwu móža zamołwići nětko zarjadej serbskeho třěšneho zwjazka zapodać. To je wčera wokrjesny sejmik w Lubinje wobzamknył. Z tym je delnjołužiski wo­krjes scyła prěni, kotryž so wo status spěchowanskeho čłona Domowiny prócuje. Kaž z wobzamknjenja wuchadźa, je tójšto towarstwow wokrjesa, mjez druhim Běłeje Góry (Byhleguhre), Noweje Niwy (Neu Zauche) a Lubina (Lübben), z čłonom Domowiny. „Ze spěchowanskim čłonstwom w Domowinje sadźi wokrjes znamjo za wzajomne zhromadne dźěło a přisłušnosći Serbam. Z přistupom skića so wo­krjesej šansa na institucionalnej runinje, wuwiwanje jónkrótneho a mnohotneho kulturneho namrěwstwa Serbow sobu wuhotować.“ Dale wustaja wokrjes we wobkrućenju wobzamknjenja swój krok jako teritorialna korporacija status spěchowanskeho čłonstwa docpěć jako „pioněrski. Wo­krjes ma z tym wusahowacu hódnotu w serbskim sydlenskim rumje mjez krajomaj Braniborskej a Sakskej.“

Z časom slědować hižo njemóža

Budyšin/Zhorjelc. 139 nowych natyknjenjow z koronawirusom su wčera w Budyskim wokrjesu zwěsćili. Wulkeje ličby padow dla njemóže strowotniski zarjad hižo wšitke kontaktowe wosoby pozitiwnje testowanych informować, w zdźělence rěka. W Zhorjelskim wokrjesu su wčera 146 nowoinfekcijow zwěsćili.

Statnik gratuluje Kamjenicy

Budyšin. Předsyda Domowiny Dawid Statnik je Kamjenicy k wuzwolenju jako Europska kulturna stolica 2025 gratu­lował. „Kamjenica skići ze swojim słowjanskim pochadom dobry zwisk k ideji, w třikrajowym róžku 2018 abo 2019 mjezy přesahowacu kulturnu stolicu wutworić. By rjenje było, hdyž by Łužica jónu takrjec štafelowy stab wot Kamjenicy w rjedźe europskich kulturnych stolicow přewzać móhła“. (hlej tež 2. stronu)

Móst přez dróhu do Łužicy

Ralbicy. Z namjetom financowanja nowotwara pěstowarnje w Ralbicach zaběraja so čłonojo gmejnskeje rady Ralbicy-Róžant na swojim zjawnym posedźenju jutře, štwórtk, we 18.30 hodź. w Ralbičanskej sportowni. Dale póńdźe wo njeplanowane wudawki za planowanje noweje pěstowarnje. Na dnjowym porjedźe steji nimo toho wobzamknjenje k wozjewjenskim taflam gmejny. Wopytowarjo maja na posedźenju nahubnik wužiwać.

Nowa nadróžna mištrownja

Kinspork. Wot přichodneho tydźenja so struktura nadróžnych mištrownjow w Budyskim wokrjesu změni. Po přepruwowanju dotalnych šěsć mištrownjow na hospodarskosć a potrjebu inwesticijow zwěsćichu, zo měli mištrowni Kamjenc a Wachau hromadźe połožić a na nowym městnje w Kinsporku koncentrować. Tam budu wšitke trěbne rum­nosće w jednym twarjenju. Přichodny tydźeń­ srjedu nowu nadróžnu mištrownju w Kinsporku přepodadźa.