Hansen nowy předsyda rady
Berlin. W lěće 2019 je Jon Hardon Hansen, Dana z Južneho Schleswiga, nowy předsyda rady štyrjoch awtochtonych narodnych mjeńšin a ludowych skupin w Němskej. Kaž mjeńšinowy sekretariat w Berlinje zdźěli, naslěduje wón Karla-Petera Schramma w zastojnstwje. Hansen je danski farar na kupje Sylt a předsyda južnoschleswigskeho towarstwa Sydslesvigsk Forening.
Ciwilnu towaršnosć zapřijeć
Wjelcej. Čłonce wuhloweje komisije Hannelore Wodtke z łužiskeho a Antje Grohus z porynskeho brunicoweho rewěra sej žadatej, ciwilnu towaršnosć bóle do procesa strukturneje změny zapřijeć. Dale měło zachowanje wot wotbragowanja wohroženych wsow kruty wobstatk kónčneje rozprawy być. W komisiji zastupujetej Wodtke a Grohus wot wuhlowych jamow potrjechenych.
Planuja powjaznicu nad Wołtawu
Što wopřijeća kaž zastaranska połnomóc (Betreuungsvollmacht), staraćelska połnomóc (Vorsorgevollmacht) a postajenje pacienta (Patientenverfügung) poprawom konkretnje woznamjenjeja, a kotry dokument za sebje trjebam? Što so stanje, njeje-li w tym zmysle ničo rjadowane? Dosaha formular za tajke rjadowanja a, hdyž haj, kotry formular wupjelnju a kak swoje přeća najlěpje sformuluju, zo jednaja zamołwići w chutnym padźe po mojej woli? Kotre kopolaki móža so jewić? Na tajke a podobne prašenja wotmołwja Susann Sperling ze Sakskeje centrale za přetrjebarjow na přednoškach. Mjez druhim čini to tež 30. januara we Wojerowskej wotnožce poradźowarnje. Silke Richter je so z referentku projekta „Hospodarski škit přetrjebarjow“ rozmołwjała.
Knjeni Sperling, stej staraćelska połnomóc a postajenje pacienta přeco hišće tabutemje?
Łaz (AK/SN). Wutwarjena a elektrifikowana železniska čara z Hórnikec hač na pólsku hranicu je mjeztym čile wužiwana. To zdźěli Łazowski wjesnjanosta Thomas Leberecht (CDU) na zašłym posedźenju gmejnskeje rady. Kaž gmejna z lista Němskeje železnicy AG zhoni, liča lětsa wšědnje z něhdźe 80 nakładnymi ćahami. Dale je tam wot póndźele do pjatka 18 wosobowych ćahow předewzaća ODEG po puću, sobotu a njedźelu 16. Kaž železnica dale informuje, zasadźeja dalše składnostne ćahi, wjesnjanosta rozłoži. Při tym jedna so wo krótkodobnje přizjewjene jězby nakładnych ćahow, kotrež kolije potom zwonka plana wužiwaja.
Kursaj pilates w chorowni
Kamjenc. Wot zajutřišeho poskića w Kamjenskej chorowni maltezow swj. Jana nowej kursaj pilates. Wonej wotmějetej so stajnje pjatk wot 12.30 do 13.30 hodź. za samodruhe žony a tohorunja pjatk wot 13.30 do 14.30 hodź. za maćerje po porodźe dźěsća. Kursaj nawjeduje fitnesowy ekonomka a wukubłana pilatesowa trenarka Nancy Römer. Přizjewjenja přijimuja pod telefonowym čisłom 01520/ 899 25 64.
Sanki pokradnjene
Běła Woda. We wjaceswójbnym domje w Běłej Wodźe su njeznaći minjene dny sanki pokradnyli a tak jeho wobsedźerjam wjeselo nad tuchwilnej zymu trochu skazyli. Swójba bě 80 eurow drohe sanki 13. januara na chódbu domu stajiła, zo bychu schnyli. Dwaj dnjej pozdźišo běchu wone fuk. Nadźija, zo bě je něchtó ze sobuwobydlerjow zrumował, so bohužel njespjelni. Swójba tuž padustwo na policajskim rewěrje přizjewi.
Nalutowanki zhubiła
Wojerecy. 85lětna žona sta so zawčerawšim we Wojerecach z woporom jebakow. Rentnarku bě njeznata žona zazwoniła, so jako přiwuzna wudawała a jej powědała, zo ma pjenježne starosće. Na te wašnje prošeše wo wjacore tysacy eurow – a dósta je tež. Něhdźe poł hodźiny po telefonaće cuzy muž pjenjezy pola staruški wotewza. Hakle po tym rentnarka na cyłej wěcy dwělować započa a zazwoni policiju. Kriminalisća pad nětko přepytuja. Nalutowanki Wojerowčanki pak su po wšěm zdaću fuk.
Njeswačidło (JK/SN). Kak rozdźělić pawšalu 70 000 eurow sakskeho knježerstwa gmejnam za lěto 2018 bě jedna z temow na wčerawšim posedźenju Njeswačanskeje gmejnskeje rady. Jeje čłonojo dojednachu so na to, z dźělom mjenowaneje sumy towarstwa na teritoriju gmejny podpěrać. Tak móže kóžde z dohromady 24 towarstwow hač do kónca februara próstwu wo podpěru hač do 1 000 eurow za projekty abo akcije we wobłuku swojeho skutkowanja stajić. Při tym je wšojedne, hač su projekty hižo loni přewjedli, abo hač je za lětsa planuja. Z tutym rozsudom hódnoća po słowach Njeswačanskeho wjesnjanosty Gerda Schustera (CDU) aktiwne a na dobro gmejny wusměrjene dźěło mnohich towarstwow. Wone wěnuja so na najwšelakoriše wašnje kulturnemu a hospodarskemu wuwiću komuny a zaručeja tak jeje dobry image daloko za jeje mjezami.
Dale su radźićeljo wčera zahajenskej bilancy k 1. januarej 2013 přihłosowali. Z tym je Njeswačanska gmejna jedna z prěnich Budyskeho wokrjesa, kotraž tajku zahajensku bilancu ma. Wšako je wuměnjenje za to, zo móže komuna po dwójnym (doppikowym) zličbowanskim systemje dźěłać.
Hamor (AK/SN). Na ćežke hospodarske časy dyrbi so gmejna Hamor nastajić. To podšmórny komornik Ulrich Bänsch na zašłym posedźenju tamnišeje gmejnskeje rady. Z dwěmaj wzdatymaj hłosomaj su radźićeljo dwójny etat 2019/2020 wobzamknyli. Jeničce lětsa dyrbi komuna 408 000 eurow tak mjenowaneho dawka bohatych Swobodnemu statej Sakskej płaćić. Ale hižo minjene tři lěta dyrbješe gmejna energijowemu koncernej Vattenfall wjace hač 15 milionow eurow přemysłoweho dawka wróćić. Za to drje dóstachu wot Sakskeje wulke sumy powšitkownych klučowych připokazanjow. Tych pjenjez dla pak płaći Hamor nětko zaso jako „bohaty“.
Róžant (SN/MWj). Najskerje z trochu brjušebolenjom, ale přiwšěm z dowidźenjom, jónkrótnu šansu wužić, su zastupjerjo pjeć sobustawskich gmejnow zarjadniskeho zwjazka Při Klóšterskej wodźe wčera w Róžeńće jednohłósnje wobzamknyli, běrowowy dom zarjadniskeho zwjazka w Pančicach-Kukowje přetwarić a saněrować dać.
Štož zdaše so minjene měsacy pobrachowacych spěchowanskich srědkow dla njemóžne, so potajkim tola zešlachći. Přičina je, zo we wobłuku sakskeho spěchowanskeho programa za witalne wsy hinak hač dotal nětko nadobo zarjadniske zwjazki spěchuja. Krótko do hód bě předsyda zwjazka Měrko Domaška tule informaciju na blido dóstał a dyrbješe spěšnje jednać. Zo njebychu žanu twarsku dowolnosć trjebali, rozsudźichu so, spočatnje planowaneho lifta w domje so wzdać.
Program za mjeńše předewzaća
Drježdźany. Sakski kabinet je wčera spěchowanski program za regionalny rozrost wobzamknył a chce přichodnej dwě lěće mjeńšim předewzaćam nastupajo inwesticije zaměrnje pod pažu přimać. Wosebje firmy we wjesnych kónčinach měli ze spěchowanja profitować, kaž sakske hospodarske ministerstwo zdźěla. Hłowny wotmysł je hospodarske wuwiće na wsach podpěrać.
Wuspěšni šulerjo
Wojerecy. Štyrjo šulerjo z Wojerowskeho Lessingoweho gymnazija su sakske šulske mišterstwa w šachu dobyli a so za němske šulske mišterstwa w meji w Berlinje kwalifikowali. Gino Rössel, Eddie Friedrich, Maciej Lesnikowski a Ramon Schuh běchu pola wučerja Detlefa Bachmanna šach hrać nawuknyli.
Čěska rodźi wo Ukrainjanow