Kruty koncept za festiwal
Zarjadowanje pod hołym njebjom zapřichodny kónc tydźenja wupředate
Hamor (AK/SN). Openair-festiwal lětnjeje nocy smědźa 21. a 22. awgusta pod krutymi wuměnjenjemi přewjesć. Z jednym napřećiwnym hłosom je Hamorska gmejnska rada wčera zrěčenju z Nišćanskim zarjadowarjom GBG wo wužiwanju płoniny na Klětnjanskim přibrjohu Bjerwałdskeho jězora přihłosowała. Kónc julija wotmě so wěstotna konferenca, hdźež su hišće raz wšitke dypki hygienoweho koncepta přešli. Tam zdobom zwěsćichu, zo je festiwal na woběmaj dnjomaj dospołnje wupředaty.
Serbske blido so zetka
Drježdźany. Trochu wodychnjenja a wokřewjenja wot drača přehorceho a přesucheho lěća lubi přichodna serbska bjesada w sakskej stolicy. Wona wotměje so srjedu, 19. awgusta, w 19 hodź. w hosćencu „The Red Rooster“, Rähnitzgasse 10. Organizator Benedikt Dyrlich naležnje prosy, jemu hač do 17. awgusta signalizować, hač so zajimcy na bjesadźe wobdźěla. Móžno je to telefonisce, z SMS abo přez Whatsapp pod čisłom 0177-4576695.
Kino pod hołym njebjom
Budyšin. Tragikomediju „The Farewell“ pokazaja jutře, srjedu, pod hołym njebjom na terenje bywšeho Budyskeho woclotwarskeho zawoda na Sprjewinej hasy 10. W pasku dźe wo poćahi w swójbje a kak wone při wšěch rozdźělach ludźi skrućeja. Film započnje so w 21 hodź. Zastup płaći 7,50 eurow.
Rukowaćelnja we wustajeńcy
Angažuja so za pěstowarnju
Nimo wulkich nadregionalnych serbskich towarstwow, kotrež su často w medijach prezentne, mamy w dwurěčnej kónčinje njeličomne mjeńše a małe towarstwa, kotrež runje tak pilne dźěło wukonjeja, wo nich pak přewjele njezhoniš. W swojej lětnjej seriji lětsa tajke aktiwne cyłki předstajamy, dźensa Zdźěrjanske pěstowarske towarstwo (11).
Wulke rjedźenje wjesneho hata steji tele dny w Serbskich Pazlicach na ...
Kultura a identita wažnej faktoraj
„Zhromadnje za HoyWoj“ je jeho slogan, kiž steji za bliskosć k wobydlerjam, zjawnu rozmołwu a transparencu. Mjeno města so w hesle němsce a zdobom tež serbsce jewi. „Serbska kultura a identita stej bjezdwěla wažnej hospodarskej faktoraj. Wonej wjedźetej nas stajnje zaso ke Krabatej – k jeho duchej swobody, k jeho dowěrje a njewotwisnosći“, Dirk Nasdala wuswětla. „Předewšěm serbšćina steji za jónkrótnosć regiona. Na to inwestorojo dźiwaja.“ 54lětny Němčan kandiduje po lěće 2013 znowa za wólby wyšeho měšćanosty we Wojerecach. Wón nastupi 6. septembra jako njestronski a njewotwisny kandidat.
Krótkopowěsće (11.08.20)
Nahubnik zwonka rjadownje
Podstupim. Po zahajenju noweho šulskeho lěta chcyše braniborski kabinet na swojim dźensnišim posedźenju na kóždy pad wobzamknyć, zo je škitny nahubnik w šulach zwonka wuwučowanskich rumnosćow a dworow za přestawki winowatostny. Wo dalšim přiměrjenju krajneho postajenja nastupajo wobmjezowanja koronapandemije dla chcychu dźensa popołdnju informować.
Danielu Krien mytuja
Drježdźany. Sakske literarne myto 2020 dóstanje Daniela Krien. W Lipsku bydlaca awtorka budźe za swoje dotalne prozowe twórby wuznamjenjena. Loni je 55lětna awtorka roman „Die Liebe im Ernstfall“ předpołožiła. Wot lěta 2012 spožča sakske ministerstwo za wědomosć, kulturu a turizm hromadźe ze Sakskej literarnej radu kóžde druhe lěto myto w hódnoće 10 000 eurow.
Třećina Saksow mało zasłuža
Ideje a přeća za zahrodnisku přehladku zapodać
Wojerecy (SN/MWj). Krajnu zahrodnisku přehladku 2025 chce město Wojerecy na swojim teritoriju wuhotować, budźe-li požadanje za nju wuspěšne. Minjene tydźenje su na projekće hižo intensiwnje dźěłali, rěka w zdźělence měšćanskeho zarjadnistwa. Mjez druhim rozmołwjachu so zastupjerjo města a jeho rady z předewzaćom za komunalne wuwiće srjedźneje Němskeje KEM.
Mjeztym je tež móžny teren za zahrodnisku přehladku naćisnjeny. Wuběrk za měšćanske wuwiće kaž tež techniski wuběrk wuprajištej so za płoninu wokoło gondeloweho hata a na tamnym boku dróhi, hdźež něhdy jědnaćeposchodowe bydlenske domy stejachu. Wupytana płonina leži w přechodnym pasmje mjez starym a nowym městom Wojerec. Jako areal wustajeńcy móhła wona měšćanskej dźělej wušo zwjazać a atraktiwnosć noweho města jako bydlenskeje štwórće zesylnić.
Pytaja čestnohamtskich
Budyšin. We wobłuku Zhorjelskeje policajskeje direkcije pytaja tuchwilu zaso čestnohamtskich zajimcow, kiž chcyli so we wobłuku sakskeje wěstotneje straže angažować. Woni dóstanu wotpowědne wukubłanje a wuhotowanje a podpěraja dźěło policije w komunach, hdźež maja tež swoje bydlenje a hdźež maja wotpowědne zwiski k wobydlerjam. Za swoje skutkowanje dóstanu woni pjenježne zarunanje. Dalše informacije, na přikład kotre wuměnjenja dyrbja zajimcy spjelnić, nadeńdu zajimcy internetnje pod www.polizei.sachsen.de. Požadanja přijimuje Zhorjelska policajska direkcija hač do 20. awgusta.
Zańdźeny přichod
Policija (10.08.20)
Elektrokolesy pokradnyli
Zahor. Dokelž bě runje něchtó dwě elektrokolesy z jeho ležownosće w Zahorju (Sagar) pola Krušwicy (Krauschwitz) blisko Běłeje Wody pokradnył, je so sobotu dopołdnja muž na Běłowodźanskim policajskim rewěrje přizjewił. Wokoło 9 hodź. bě wón hakle swoje elektrisce podpěrane dwukoleso do kólnje stajił, hdźež tež te jeho mandźelskeje steješe. Jako wón dobru hodźinu nimo wočinjeneje kólnje dźěše, dyrbješe wustróžany zwěsćić, zo wobě kolesy tam hižo njeběštej. Kaž policija zdźěli, stej wonej hromadźe něhdźe 3 400 eurow hódnej.
Blisko Žaby twarja wulki hat
Ekologiski projekt gmejny Njebjelčicy nima jeno přihłosowarjow
Miłoćicy (SN/MWj). Idyliski blečk zemje a hoberske twarnišćo stej w Miłoćicach tuchwilu cyle blisko sebi. Mjeztym zo móžeš při znatej Miłočanskej žabje powotpočnyć, wuhladaš jenož 200 metrow dale ćežke twarske mašiny a nakładne awto we wulkej dźěrje při dźěle. Na prěni pohlad dopomina wobraz trochu na brunicowu jamu. Cyle deleka steji bager, kotryž so dale a bóle do zemje žerje. Trochu wyše je dalši, kiž z wulkej łžicu zemju na nakładne awto sypa. Te jědźe něšto stow metrow dale a tam wšitko wotsypnje. Mjeztym přijědźe jedyn z bagrow z dźěry a někotre łžicy pjeršće tež na připowěšak z traktorom sypnje. Wodźer bagra Silvio Reineke ma nětko kusk přestawki a chwile za rozmołwu.
