Trjebinski wjesnjanosta apeluje małe komuny chutnišo brać

Trjebin (AK/SN). Zajimowemu zastupnistwu Łužiski kruh gmejna Trjebin tež dale přisłuša. Wjetšina jeje radźićelow je so wčera za to wuprajiła. Namjetej, zo měł so přistup z lěta 2018 cofnyć, štyrjo radźićeljo přihłosowachu, dwaj so hłosa wzdaštaj, šesćo běchu přećiwo tomu. Do toho běchu kontrowersnje wo naležnosći diskutowali.

Trjebinski wjesnjanosta Waldemar Locke (CDU) za małe komuny žanu lěpšinu z Łužiskeho kruha njewidźi. „Jako gmejna Trjebin přinjesemy najwjetši wopor, dokelž swój wjesny dźěl Miłoraz za Wochožansku brunicowu jamu damy“, wón měnješe. „Bohužel pak nas chutnje njebjeru.“ Hižo cyłe lěto prócuje so Waldemar Locke wo rozmołwu z rěčnikomaj kruha za Braniborsku a Saksku, Grodkowskej wyšej měšćanostku Christinu Herntier a Běłowodźanskim wyšim měšćanostu Torstenom Pötzschom. Hač do dźensnišeho so na žadyn termin dojednać njemóžachu. Posledni móžny dyrbjachu korony dla wotprajić. „W času digitalizacije, widejowych a telefonowych konferencow je to njezrozumliwe.“

Njeswačidło (CS/SN). Jutrowne jejka k hodam darić je snano trochu njewšědna myslička, nic pak, su-li jutrowne jejka zwobraznjene na kalendrje. Sylvina Schilling z Njeswačidła je tajki tele dny wudała, a to w dwěmaj wariantomaj. Na wšitkich łopjenach protyki su widźeć jutrowne jejka, kotrež je sama debiła. Tomu wěnuje so 68lětna wot swojeho dźesateho žiwjenskeho lěta, raz z wjetšim raz z mjeńšim zapalom. Nětko w rentnarskej starobje zaběra tónle hobby wulki dźěl jeje wólneho časa.

Rodźena w Grodku, ale hižo wot lěta 1954 w Njeswačidle bydlaca je sej Sylvina Schilling debjenje jejkow wot swojeje maćerje wothladała. Tak je so na wubědźowanjach wo najrjeńše serbske jutrowne jejko runje tak wuspěšnje wobdźěliła kaž na wustajeńcach. Byrnjež žana Serbowka njebyła, dźěła wona z tradicionalnymi serbskimi technikami.

Bychu-li so w Budyšinje Wjacławske wiki kaž zwučene wotměli, bychu dźěći tudyšeje pěstowarnje „Jan Radyserb-Wjela“ prěnje woknješko adwentneho kalendra wočinili. Dokelž pak to móžno njeje, je chowancow serbskeje pěstowarnje předwčerawšim Anna-Maria Bretschneiderec jako jandźel ze swojim pomocnikom w nadawku města wopytała. Wona zaspěwa jim „Přadła je Marja kudźałku“ a rozdźěli jim dariki. Dźěći dźakowachu so z małym program a přednjesechu serbske a němske adwentne pěsnički. Foto: Maik Brězan

Budyšin/Worklecy (SN/JaW). W gmejnje Worklecy přewjedu jutře, pjatk, prěni raz w Sakskej wobšěrny spěšnotest na koronawirus, kaž Budyski wokrjes wčera zdźěli. „W dorěčenju ze statnym knježerstwom chcemy z pilotowym projektom dotal njeznate inficěrowanja wotkryć“, informuje nowinski wotrjad wokrjesa na naprašowanje. Zdobyć chcedźa tohorunja dopóznaća wo woprawdźitym rozpřestrěću wirusa kaž tež za móžne dalše naprawy.

W času wot 10 do 18 hodź. měli so wšitcy wobydlerjo mjenowaneje gmejny jutře we Worklečanskej sportowej hali testować dać. „Wuslědki zdźělimy jim po štwórć hodźinje hnydom na městnje. Štóž strowotnych přičin dla njemóže do sportownje přińć, njech so w sekretariaće šule přizjewi. K nim pósćelemy jedyn z třoch mobilnych teamow, zo bychu spěšnotest přewjedli“, zdźěli Mandy Noack z krajnoradneho zarjada.

Sakska je 10 000 spěšnotestow bjezpłatnje přewostajiła. Za testy we Worklečanskej gmejnje je so wo­krjes rozsudźił, dokelž maja tam z 52 najwjace korona­inficěrowanych na 1 000 wobydlerjow.