Bohužel je zwjetša tak, zo něchtó mały zmylk bóle wuzběhuje hač někajki wulki skutk. Zawěsće pak potom na wotewrjenju noweho Worklečanskeho horta wopytowarjam w foyeru napadnje, zo je so na tafli z wopisanjom jednotliwych stwow na delnim a hornim poschodźe kumštne słowo „snoezelen“ zabłudźiło. Ja wšak z nim znajmjeńša ničo započeć njemóžu. Hakle wjesnjanosta Franc Brusk je mi tele dny rozswětlił, zo jedna so wo nowomodne zapřijeće za wočerstwjenje, kotrež so tež jemu njelubi. Wone je so najskerje přez mału njekedźbliwosć na taflu dóstało. Snano so hišće poradźi, słowo z po­wšit­kow­nje zrozumliwym narunać. Mału njerjanosć pak njesměł nětko wjetšu hódnotu dóstać hač cyły rjany nowy hort. Tón je so mjenujcy přewšo derje radźeny a wuhotowany. Wuzběhnyć tuž chcu, zo je so gmejnje poradźiło tajki rjany dom za wjace hač 120 dźěći natwarić, a nic, zo je so při tym małe misnjenje stało. Marian Wjeńka

Słowjanske rěče jemu hižo wot dźě­ćatstwa leža. „W šuli wuknjech rušćinu. Ze swojej mandźelskej Urszulu hač do dźensnišeho krok po kroku pólšćinu wuknu. Wot lěta 2004 dźěłam w Zho­rjelcu jako swobodny, zjawnje skazany a wobkrućeny přełožowar za pólšćinu“, powěda Lutz Jankus. Jako wokrjesny radźićel skutkuje 49lětny na namjet AfD w přiradźe za serbske naležnosće Zhorjelskeho wokrjesneho sejmika. Čestnohamtsce angažuje so wón hižo mnohe lěta jako nazwučowar w ST Lok Zhorjelc we wobłuku dźěćaceho płuwanja a na krajnej runinje jako sudnik w płuwanju.

Adwentne wiki maja so wotměć

Drježdźany. Sakska ministerka za kulturu a turizm Barbara Klepsch (CDU) je so­ za to wuprajiła, zo měli adwentne wiki lětsa wotměć. „Wone su wuznamny kulturny podawk w Sakskej z tradiciju, rozpřestrěwacy so po cyłym swobodnym staće. Zdobom maja wulki hospodarski a turistiski wuznam.“ Pandemije dla planuje wona forum z komunami.

Wot jutřišeho nowy prezident

Lipsk. Sakske wustawowe sudnistwo změje wot jutřišeho noweho prezidenta. Po tym zo je z Wanne-Eickela pochadźaca Birgit Munz 13 lět sudnistwo w Lipsku nawjedowała, naslěduje ju nětko dr. Matt­hias Grünberg. 59lětneho je krajny sejm 10. junija z dwěmaj třećinomaj hłosow wuzwolił. Grünberg pochadźa z Mannheima a skutkuje wot lěta 1996 w Sakskej. Wot 2008 bě wiceprezident Wyšeho zarjadniskeho sudnistwa w Budyšinje.

Rekordny dobytk

Ekstremna suchota njenačinja jenož ratarjam wulke ćeže, ale zaběraše wčera po­poł­dnju tež wohnjowych wobornikow. Jich wołachu k hašenju šćernišća pola Hodźija. Při puću do Žičenja (Seitschen) paleše so polo na něšto tysac kwadratnych metrach. Z wětřikom so płomjenja dale rozpřestrěwachu. Přiwšěm mějachu wobornicy woheń­ po něhdźe jednej hodźinje pod kontrolu. Foto: Jens Kaczmarek