Wobšěrny dróhotwarski projekt w Jenkecach traje dwě lěće

Jenkecy (CS/SN). Na poćežowanja najwšelakorišeho razu dyrbja so wobydlerjo Jenkec (Jenkwitz) w přichodnymaj lětomaj nastajić. Hłowna dróha přez wjes budźe po dołhosći něhdźe 1 200 metrow wobšěrnje wu­twarjena. Zo bychu dotal njerozrisane prašenja rozłožili, přewjedźechu zawčerawšim w Bošecach (Baschütz) wobydlersku zhromadźiznu, na kotruž je tójšto zajimcow přišło. Na prašenja wjesnjanow wotmołwichu wjesnjanosta Olaf Reichert, Jens Denk z Lětońskeje (Litten) twarskeje firmy SLB a René Dürlich z dróho- a hłubokotwarskeho wotrjada krajnoradneho zarjada.

Mjez druhim připosłucharjo zhonichu, zo njetraje dróhotwar kaž dotal planowane tři lěta, ale jenož dwě. Ze změnjenym rozdźělenjom twarskich wotrězkow móža cyłkowny čas přikrótšić. Tak chcedźa wot 15. apryla najprjedy wotrězkaj zapadnje a wuchodnje wjesneho srjedźišća twarić, dokelž stej wonej trochu njekomplikowanišej. Wjesne srjedźišćo ze swojimi křiwicami a wuskimi městnami, kotrež twarske dźěła poćežuja, budźe w lěće 2020 na rjedźe.

Wopitaj randalěrowałoj

Budyšin. W předawanišću zakuskow na Budyskej Róžowej staj zawčerawšim mužej w starobje 27 lět hosći wobćežowałoj. Po tym zo přistajeni jeju namołwichu předawanišćo wopušćić, dóńdźe wonka k tomu, zo młodaj mužej tam stejace awta wobškodźi­štaj. Jako policija přijědźe, poča jedyn ze skućićelow do policajskeho awta kopać. Nimo toho wón zastojnikow biješe. To sej woni lubić nje­dachu a jeho sputachu. Pola muža na­měrichu 3,14 promilow alkohola w kreji. Wón smědźeše so na policajskim rewěrje wuspać. Tamneho z 1,74 promilemi domoj­ pósłachu.

Chrósćicy. 19. hłowna zhromadźizna Domowiny­ wotměje so jutře, 30. měrca, wot 9 hodź. w Chróšćanskej wjacezaměrowej hali „Jednota“. Na dnjowym porjedźe steja mjez druhim rozprawy wo dźěławosći w zašłymaj lětomaj a schwalenje předewzaćow za dobu hač do přichodneje „hłowneje“. Wot 9 hodź. móža zajimcy wuradźowanje tež přez livestream slědować, a to pod linkom https://www.youtube.com/user/DomowinaBudysin/live.

Porěčitej wo putnikowanju

Chrósćicy. Posledni wječor aktualneje kulturneje zymy w Chróšćanskej putniskej hospodźe wotměje so jutře, sobotu, w 19.45 hodź. Dwanaće lět je Monika Gerdesowa hižo po puću po Jakubowym puću. Startowała bě 2007 w Zhorjelcu a kóžde lěto w dowolu čwak dale nóžkuje, z wulkim cilom Santiago de Compostela před wočomaj. Loni bě wona zhromadnje ze swojej přećelku Beatu Gruß na wotrězku „Camino frances“ w Španiskej wot Pamplony hač do Leóna po puću. Zhromadnje rozprawjatej wonej wo wutrobnych zetkanjach z dalšimi putnikami ze wšeho swěta, wo kulturnych drohoćinkach po puću a wo smalacym słóncu na pustej wysočinje Meseta.

Wobrazy na hrodźe

W katolskich Serbach je wjele wjetšich a mjeńšich historiskich drohoćinkow, kotrež sej ludźo jara waža. Jedna tajka – wona zdaše so hižo zhubjena być – je nětko znowa w Ralbicach widźeć.

Ralbicy (aha/SN). Hdyž bu před 16 lětami njeposrědnje za wosadnej cyrkwju wot 1992 njewobydleny statok spotorhany, zhubi so z nim tež Grubertec-Narćikec kapałka. Wuběrny znajer stawiznow delanskeje wsy Pawoł Rota zhladowaše tehdy w Serbskich Nowinach na stawi­zny wokoło 1840 natwarjeneho statoka a jich wobsedźerjow. Kónc 19. lětstotka bě Šunowčan Michał Narćik dom a ležownosć w Ralbicach kupił. Wón měješe tam swoju šewcownju. Nimo toho wikowaše ze šijawami a kolesami, kotrež tež porjedźeše. Hač bě wón mnohim hišće znatu kapałku z postawomaj Wutroby Jězusoweje­ a Wutroby swjateje Marije zarjadował,­ bohužel znate njeje. 1942 je Narćik 77lětny zemrěł.

Wudowa zapisa lěto na to statok swojemu sotrowcej Janej Grubertej. W Katolskim Posole w meji 1956 jeničce čitamy, zo je nowy wobsedźer postawje wobnowić dał a zahrodu před kapałku rjenje wuhotował.