Wo krjepjenju trawnika sportoweho towarstwa horco diskutowali

Pančicy-Kukow (SN/MWj). Skerje na kromje načachu na zašłym posedźenju gmejnskeje rady Pančicy-Kukow temu, kotraž je so wo dlěšu a předewšěm kontrowersnu diskusiju postarała. Tak radźićel Joachim Kokla porokowaše, zo Sportowe towarstwo Marijina hwězda na swój koparski trawnik wšědnje pitnu wodu pryska. „Pitna woda je drohotna. Njemóžemy ju prosće na łuku kidać, zo by ta zelena była“, wón přitomnemu před­sydźe sportoweho towarstwa Andreasej Bedrichej wumjetowaše. Tón so zakitowaše a rjekny, zo wokomiknje žanu hinašu alternatiwu nimaja, chcedźa-li trawnik za koparske hry zachować. Hewak běchu sportowcy wodu z Klóšterskeje wody na sportnišćo klumpali a trawnik krjepili. W zwisku z wottorhanjom bywšeho hosćenca je so tež wotpowědna roła najprjedy raz zhubiła. Kaž wjesnjanosta Markus Kreuz (CDU) informowaše, je wona mjeztym zaso instalowana. Čłonojo towarstwa maja ju jenož hišće ze swojim wodowodom zwjazać. Za to su wurywanske dźěła trěbne, kotrež dyrbja sportowcy w swójskej režiji přewjesć.

Nimo wulkich nadregionalnych serbskich­ towarstwow, kotrež su často w medijach prezentne, mamy w dwurěčnej kónčinje njeličomne mjeńše a małe towarstwa, kotrež runje tak pilne­ dźěło wukonjeja, wo nich pak přewjele njezhoniš. W swojej lětnjej seriji­ lětsa tajke aktiwne cyłki před­sta­jamy, dźensa Serbsku murju (12).

Kónc julija 2016 wotmě so XXXI. swětowy dźeń młodźiny w Krakowje. Na tym mjezynarodnym zetkanju katolskich młodostnych z cyłeho swěta bě mjez wobdźělnikami tež něhdźe 50 serbskich. Kaž druzy woni tohorunja ze serbskej chorhoju po měsće spěwajo ćahachu. Módro-čerwjeno-běłeje barby na chorhoji dla mějachu jich někotři za Rusow abo Francozow. Skupina z Bayerskeje so dźiwaše nad dobrej němčinu serbskich młodostnych. Dyrbjachu wšak přiznać, zo hišće ničo wo Serbach w Němskej słyšeli njeběchu.

Wojerecy su jeho před 20 lětami wu­trob­nje witali. „Dźensa chcu wobydlerjam něšto wróćić. Chcu nawjedować, wuwiwać a wuhotować. Wojerecy maja w strukturnej změnje postupować, město ma šansu změnow za swój přichod wužić“, podšmórnje Torsten Ruban-Zeh.

Rodźeny Drježdźanjan je dźensa we Wojerecach kruće zakótwjeny a nastupi za SPD k wólbam wyšeho měšćanosty. Wot lěta 2011 je wón jednaćel AWO we Wojerecach. Sam widźi so jako zwja­zowar syćow. Tak chce tež zarjadnistwo jako wyši měšćanosta nawjedować a hospodarske spěchowanje wodźić. Jako nowy na čole města chcył wón přiradu předewzaćelow załožić. Ta ma měšćansku radu a zarjadnistwo poradźować a pře­wo­dźeć. Najwjetšu prioritu ma za njeho rozmołwa z wobydlerjemi. Tak chce 57lětny zaměrnje připosłuchać a hakle po tym skutkownje rozsudźeć.