Wobydlerjo maja dale wobmyslenja noweho hata dla
Miłoćicy (SN/MWj). Najnowši ekologiski projekt Njebjelčanskeje gmejny na kromje Miłoćic blisko tamnišeje Žaby stara so we wsy a wokolinje dale wo diskusije. Tohodla su wjesnjanosta Tomaš Čornak (CDU), fachowc za permakulturu Thomas Noack a planowar Andreas Stowasser na spočatku minjeneho posedźenja gmejnskeje rady w Miłoćicach wo projekće informowali. Wjace hač 20 wobydlerjow je tam mjez druhim zhoniło, zo financuja projekt, kiž by normalnje 410 000 eurow płaćił, přez gmejnske ekokonto. Tak płaći hat na kóncu „jenož“ 85 000 eurow. Zezběrane ekodypki za njón pak móža předać, na přikład, hdyž w bliskosći zaso nowy milinowětrnik nastaja. Dale informowachu, zo ma Drježdźanska towaršnosć Permagold nastawace terasy intensiwnje wobhospodarjeć a tak zhubjenu ratarsku płoninu móhłrjec narunać. Nimo toho wuzběhnychu wjacekrótny wunošk wódnišća. Wone ma słužić zadźěwanju erozije pódy, škitej najwšelakorišich družin zwěrjatow, wočerstwjenju wobydlerjow a nic na kóncu zastaranju z hašenskej wodu.
Jubilejne rjadowniske zetkanje
Stróža (aha/SN). W lěće 1958 je 45 maturantow dweju rjadownjow Serbskeje wyšeje šule Budyšin abiturne pruwowanje złožiło. Běštej to rjadownja 12 B/1 z wučerjom Měrćinom Wornarjom a paralelka 12 B/2 z rjadowniskim wučerjom Jurjom Pěčku. Sporadisce jako studenća so woni po tym na schadźowankach dojednachu, přewjesć jako bywši cyłk rjadowniske zetkanje. Prěni raz zetkachu so 14 lět po abiturje 1972, a to nimale wšitcy šulerjo rjadownje 12 B/2. Wot toho časa so wobstajnje dwulětnje zetkawaja.
Historisku studnju poswjećili
Z njewšědnej namakanku farska zahroda wo zajimawostku bohatša
Slepo (CK/SN). Na terenje Slepjanskeje fary su minjenu njedźelu historisku studnju oficialnje poswjećili. Fararka Jadwiga Malinkowa mjenowaše ju „městno zetkawanja, hdźež móžeš so wo Bohu a cyłym swěće rozmołwjeć“.
Namakali běchu studnju cyle připadnje. Loni su na farskej zahrodźe archu Noacha twarili. Tam mějachu pólne kamjenje jako wotmjezowanje skłasć. Jako za to trěbna twarska mašina wróćo jědźeše, wona ze zadnim lěwym kolesom nadobo zapadny. Zornowcowa plata bě so złamała. Pod njej wuhladachu twarscy dźěłaćerjo znajmjeńša dwaj metraj hłuboku dźěru, kaž čłon wosadneje cyrkwinskeje rady Edgar Pawel zwěsći. Zornowcowu platu połožichu nabok, a tak wujewi so studnja, pochadźaca po trochowanju něhdźe z 15. lětstotka. Dokładnu starobu archeologojo hižo zwěsćić njemóžachu. Za to bě dubowe drjewo studnje přejara přetłate.
Měšćanske kolesowanje zahajene
Naležnosće ludźi wukonliwišo wobdźěłać
Lubij (AK/SN). Zhorjelski wokrjes chce swoje zarjadnistwo moderniše, wobydlerjam blisko, wukonliwiše a jednanjakmaniše wuhotować. Za to planuja we wobłuku modernizowanskeho koncepta „Zarjadnistwo 4.0“ 28 projektow, k čemuž słušeja tež wobydlerske běrowy, kotrež chcedźa hač do lěta 2024 po cyłym wokrjesu wotewrěć.
Prěni běrow je wot zawčerawšim w Lubiju přistupny. „Tu posłužby centralnje z jedneje ruki poskićamy“, podšmórny nawoda hłowneho zarjada Zhorjelskeho wokrjesa a nawoda projekta „wobydlerske běrowy“ Stefan Tork minjeny štwórtk, jako nowinarjam ideju rozłoži. Ćežišćo dźěławosće tworitej tam přizjewjenje jězdźidłow kaž tež wuměna jězbneje dowolnosće. Dale móža wobydlerjo swoju próstwu wo bydlenski pjenjez zapodać. Zdobom je předwidźane, zo sobudźěłaćerjo wobydlerjam pomhaja próstwy za wopisma, dokumenty atd. zhotowić.
Nowe ławki za muzej Njechorńskeho(9)
Idejowe wubědźowanje sakskeho fondsa „Čiń sobu!“ je we wosebitej kategoriji „Žiwa dwurěčnosć“ tworićelskosć na dobro našeje maćeršćiny znowa pozbudźiło. Serbske Nowiny tule w serialu rjad drobnych a małych projektow předstajeja.
Nimale kóždy Serb Dom Měrćina Nowaka w Njechornju znaje. Je wšak to na muzej přetwarjeny ródny dom jednoho z najwuznamnišich serbskich ludowych wuměłcow. Tójšto swojich twórbow wěnowaše 1900 rodźeny Njechorński wosebje lubosći k domiznje. Tak tež njezadźiwa, zo chcyše swojemu ludej něšto trajne zawostajić, serbski pomnik we Wósporskej kónčinje, hdźež dźensa lědma hišće něchtó serbuje.
Krótkopowěsće (09.09.20)
Zhromadne kontrole
Choćebuz. Zhromadne patrulje porjadniskeho zarjada a policije započinaja nětko w Choćebuzu w drobnym wikowanju kontrolować, hač ludźo we wobchodach škitny nahubnik wužiwaja. Zaměr njeje přeńdźenja z pokutu chłostać, ale kupcow na winowatosć skedźbnić, jich poradźować a napominać, rěka z měšćanskeho zarjadnistwa. Wospjetnych hrěšnikow pak pochłostaja.
Dyrbja direktny přistup dóstać
Karlsruhe. Socialna syć Facebook dyrbi potomnikam direktny přistup ke kontam zemrětych dać. To je wčera Zwjazkowe sudnistwo rozsudźiło, wobkrućejo tak rozsud z lěta 2018, zo ma Facebook digitalne namrěwstwo zemrětych potomnikam přepodać. Njedosaha pak wobsah konta jako pdfku přewostajić. Skoržiłoj běštaj staršej młodostneje, kotraž bě 2012 w Berlinje smjertnje znjezbožiła.
Železniske njezbožo w Čěskej
Dar płuwanskemu towarstwu
Budyšin. Frakcija AfD Budyskeho wokrjesneho sejmika je Wuchodosakskemu płuwanskemu towarstwu 1 700 eurow přewostajiła. Pjenježny dar zezběrali su z posedźenskich popłatkow čłonow frakcije w zwisku z wurjadnym posedźenjom sejmika nowotwara Kamjenskeje płuwarnje dla.
Předstaji pišćelowu knihu
Budyšin. Přichodny Kofej w třoch w Budyskim Serbskim muzeju budźe srjedu, 9. septembra, w 15 hodź. Tónraz steji rukopisna pišćelowa kniha „Spěwawa Jězußowa Wincza“ z pjera Michała Jana Wałdy (1721–1794) w srjedźišću. Referent budźe Alexander Pólk. Zajimcy njech přizjewja so pod telefonowym čisłom 03591/270 870 0.
Policija (08.09.20)
35 eurow dla do jastwa
Rakecy. Dokelž swoju pokutu dotal zapłaćił njeje, dyrbješe 48lětny muž z Rakec předwčerawšim do jastwa. Při tym drje jednaše so jenož wo 35 eurow, tež te pak wón njeměješe, jako policisća pola njeho klinkachu. Wo kelko dnjow jastwa so jedna, bohužel znate njeje.
Za zhromadnosću so žedźili
Bórk (JoS/SN). Pjaty Bórkowski wjesny swjedźeń po wožiwjenju tradicije w lěće 2016 bě dołhi čas njewěsty. Hakle w juniju je so wjesny klub Mała Sprjewja jako wuhotowar rozsudźił, hladajo na tehdyše wolóženja korony dla móžnosć swjedźenja pruwować a koncept hygieny zestajeć. „Při planowanju chcychmy kóždežkuli riziko wuzamknyć. Tohodla njejsmy žane zrěčenja z diskotekami a dalšimi zabawjerjemi wotzamknyli. Swój wjesny swjedźeń chcychmy na kóždy pad přewjesć, ale pod tuchwilnymi wuměnjenjemi w mjeńšej formje“, praji čłonka wjesneho kluba Silvana Syckor.
Hižo pjatk wječor minjeny kónc tydźenja zetka so Bórkowska młodźina z młodostnymi z wokolnych wsow, a to w stanje kaž tež wonka. Wšako je sportnišćo wulke dosć. Sobotu běchu starši a młódši na kofej a tykanc přeprošeni. Za to běchu ludźo dźakowni, po tym zo dyrbjachu tajku zhromadnosć wjacore měsacy parować. Nětko móžachu zaso raz z tymi pobachtać, kotrychž hižo dlěši čas zetkali njejsu. Wo tykancowy bazar běchu so wjesne hospozy ze 14 tykancami a tortami starali.
