Stróža. Swět insektow w Hornjej Łužicy je tema přednoška rangera w biosferowym rezerwaće Hornjołužiska hola a haty­ Marija Trampenauwa zajutřišim, 8. meje, w 19 hodź. w Stróžanskim Domje tysac hatow. Trampenau porěči mjez druhim wo tym, kak so změna klimy na wobstatk překasancow wuskutkuje. Zastup płaći dwaj euraj.

Serbske blido w stolicy

Berlin. Přichodne Serbske blido w Ber­linje budźe štwórtk, 9. meje, w 16 hodź. w hosćencu EINSTEIN KAFFEE na Frie­drichowej 206. Hosćenc je direktnje pó­dla bywšeho namjezneho přechoda Checkpoint Charlie. Štóž ma lóšt a chwile, na měsačnych zetkanjach k hajenju maćeršćiny w cuzbje so wobdźěleć, je wutrobnje witany.

Wojerecy (SN). Něhdźe dwaj měsacaj su we Wojerecach a pjeć měšćanskich dźělach tak mjenowane Hoyspoty přizamknjene. Takle mjenuja tam městna, hdźež móžeš mobilnje a darmotnje do interneta. Prěnje statistiske wuhódnoćenje pokazuje, zo wobydlerjo a hosćo tule móžnosć rady wužiwaja.

Njezadźiwa, tak rěka w zdźělence města, zo ludźo poskitk najčasćišo na Łužiskim naměsće a na torhošću před radnicu trjebaja. Derje přiwzaty je tohorunja Hoyspot na naměsće před dwórnišćom, předewšěm wot pućowacych a šulerjow. W pjeć měšćanskich dźělach widźa porno tomu hišće rezerwy, při čimž při Krabatowym młynje w Čornym Chołmcu wobstajny přirost zwěsćeja. Mjeztym zo registrowachu tam jutry wšědnje něhdźe 30 wužiwarjow, drje budźe jich přichodnje za čas turistiskeje sezony wjace. Dźewjeć Hoyspotow wužiwa wšědnje dohromady něhdźe 200 ludźi, štož wobhladuje měšćanske zarjadnistwo jako pozitiwne wuwiće. Najwjetšu ličbu zwěsćichu 18. apryla. Na tym dnju je 273 wosobow internetny serwis trjebało.

Twar Slepjanskeho šulskeho kompleksa w časowym a pjenježnym ramiku

Slepo (AK/SN). Na dnju wotewrjeneho twarnišća su sej sobotu w Slepom mnozy zajimcy nastawacy němsko-serbski šulski centrum wobhladali. „Smy w ča­sowym a pjenježnym ramiku“, zjima Annett­ Dreißig, kotraž je ze stron gmejny za projekt zamołwita.

Nowe kubłanišćo nastawa na 54 000 kwadratnych metrach. 80 procentow wšěch dźěłow dyrbjachu po wšej Europje wupisać. Runočasnje k nutřkownemu wuhotowanju zakładneje a wyšeje šule kaž tež horta, biblioteki a sportownje nastawaja wonkowne připrawy. Tak změje sportnišćo 400metrowskej běhanskej čarje, připrawje za kulostork a dalokoskok, wolejbulnišćo a gymnastisku łuku. 12. decembra ma šulski centrum hotowy być. Potom měsac dołho wšitko přepruwuja. W zymskich prózdninach 2020 wuknjacy zakładneje a wyšeje šule přećahnu.

Minjeny pjatk připołdnju njeje so jenož nimale wšěch 118 šulerjow Ralbičanskeje Serbskeje zakładneje šule na přestawkowym naměsće ze swojimi wučerkami zetkało. Tam běchu tež wjacori starši, sponsorojo a někotři zastupjerjo wokolnych zawodow.

Ralbicy (aha/SN). Wulki bě zajim za přepodaće nowowuhotowaneho hrajkanišća. Nawodnica zakładneje šule Andrea Liehnowa dopomni na to, zo bě na samsnym městnje před poł lětom jeničce pěskowa jama. Zo móhli městnosć za šulerjow wotpowědnje přihotować, pak njebě w gmejnskej kasy dosć pjenjez. Tuž wučerjo problem hinak rozrisachu. Woni rozsudźichu so za běh sponsorow, štož bě jónkrótne emocionalne dožiwjenje zhromadnosće. Předwidźany projekt přinošowaše tohorunja k skrućenju sebjewědomja a identifikacije šulerjow.