Krótkopowěsće (08.10.20)
Znowa smjertny pad korony dla
Budyšin. Koronapandemija je sej w Budyskim wokrjesu dalši wopor žadała, dohromady je jich 23. Potrjechenu 69lětnu žonu běchu do toho w chorowni lěkowali, krajnoradny zarjad wčera zdźěli. Stacionarnje nětko dweju hladaja. Ličba natyknjenych je wo dźewjeć na 663 rozrostła. Schorjenych bě wčera 83 (+8), 557 ludźi je so mjeztym wustrowiło.
Nobelowe myto žonomaj
Stockholm. Lawreatce lětušeho Nobeloweho myta za chemiju stej w Berlinje skutkowaca Francozowka Emmanuelle Charpentier a Američanka Jennifer Doudna. Wonej stej tak mjenowane genowe nožicy wuwiłoj, z kotrymiž móža namrěte kajkosće zaměrnje změnić. Procedura je rewolucija we wědomosći molekularneho žiwjenja, informowaše Kralowska-šwedska akademija wědomosćow wčera w Stockholmje.
Po přestawce nowy powěstnik
Jubilejnemu dźěsću šek přepodali
Zajimawostki z domizny čitałoj
Krabat we wobrazach
Budyšin. Nowu wustajeńcu wotewru jutře, štwórtk, we 18 hodź. w Budyskej Serbskej kulturnej informaciji. W njej pokazaja mólby, rysowanki a skulptury wuměłca Jörga Tauscha, kiž je za swoje wobrazy Krabata mjez druhim w Chorwatskej slědźił. Na wotewrjenju přehladki předstaji Kulowski genealoga Hans-Jürgen Schröter zajimawostki wo wosobje Janka Šajatovića (Krabata).
Twarja šćežku k jězorej
Wojerecy. Podłu statneje dróhi S 108 wot Wojerec do směra na Łaz su spočatk tydźenja kolesowansku šćežku hač k Šibojskemu jězorej twarić započeli. 460 metrow dołhi wotrězk ma hižo wobstejacy kolesowanski puć z města won a kołopuć wokoło jězora zwjazać. Hač do 15. nowembra maja twarske dźěła wotzamknjene być. Poprawom by krajny zarjad za dróhotwar a wobchad jako nošer statneje dróhi přisłušny był. Zo pak bychu projekt spěšnje zwoprawdźić móhli, je město Wojerecy režiju přewzało, rěka w nowinskej zdźělence.
Dwójny jubilej swjećili
Policija (07.10.20)
Jebak sej pjenjezy wulišćił
Biskopicy. 88lětny muž je so předwčerawšim w Biskopicach z woporom jebaka stał. Dotal njeznaty skućićel rentnarja na parkowanišću kupnicy narěča a jeho prošeše pjenjezy zaměnić. Dobroćiwy starc wočini swoju móšnju, w kotrejž měješe wjetšu sumu pjenjez. W tym wokomiku cuzy do móšnje sahny a pokaza na dźesaćeurowsku bankowku, wo kotruž Biskopičana prošeše. Myslo sej, zo je wotpowědne drobne pjenjezy hižo dóstał, 88lětny wone dźesać eurow cuzemu da, na čož so tón zminy. Hakle pozdźišo škodowany pytny, zo jemu wjacore sta eurow w móšni pobrachuja. Po jeho wopisanju je jebak 170 centimetrow wulki, ma swětłe, krótke włosy a ćmowu drastu. Pokiwy přijimuje policija pod telefonowym čisłom 03594/ 75 70.
Ideje wobydlerjow prašane
Zdźěłuja wjesne wuwićowe koncepty za přichodne lětdźesatki
Slepo (AK/SN). Hač do kónca februara 2021 chce Slepjanska gmejna wjesne wuwićowe koncepty za Slepo, Rowno a Mułkecy w dalokej měrje wotzamknjene měć. Tónle zaměr wobkrući amtěrowacy hamtski rjadowar Jörg Funda na wčerawšim posedźenju tamnišich gmejnskich radźićelow. „Zwjesela, zo je nětko wjele dynamiki spóznać, štož wosebje w Rownom začuwamy. Ale tež w Mułkecach so tójšto hiba“, Funda rozłoži. „Chcemy zhromadnje docpěć, zo so tež w Slepom njedostatki wotstronja. Chcemy po móžnosći hač do nowembra naćisk za wjesny wuwićowy koncept předpołožić.“ Za to so tež tamniša wjesna rada zasadźa.
50 lět po maturje so zetkali
Něhdyša rjadownja 12B1 Serbskeje wyšeje šule je so minjenu sobotu zetkała, zo by spominała na połstatu róčnicu złoženja matury 1970. Bohužel so pjećo wobdźělić njemóžachu. Tež naš tehdyši rjadowniski wučer Teo Bejmak chorosće dla pódla njebě.
Najprjedy pobychmy w naše „starej“, nowej šuli, w Budyskim Serbskim gymnaziju. Tele twarjenje někotři z nas hišće njeznajachu. My smy tehdy hišće w Małym Wjelkowje do šule chodźili a w internaće bydlili. Internat hólcow bě na starym hrodźe w Radworju.
Nawoda Serbskeho gymnazija René Wjacławk nas po domje wodźeše. Wón je nam fachowe rumnosće z načasnym wuhotowanjom pokazał, w awli zajimawosće wo šuli powědał a na naše prašenja wotmołwjał. Tak plećeše so rozmołwa mjez druhim tež wo wučbje po systemje 2plus, wo serbskosći na gymnaziju abo wo wućeženju kubłanišća. Skónčnje móžachmy hišće cyle horjeka na štwórtym poschodźe wužiwać krasny wuhlad na cyłe sprjewine město. Renéjej Wjacławkej so za zajimawe a wěcywustojne wodźenje a rozmołwu hišće raz cyle wutrobnje dźakujemy.
Zo njebychu korjenje puć kóncowali
Asfaltowane kolesowanske šćežki podłu łužiskich jězorow su přewšo woblubowane. Wone pak maja špak, zo je korjenje štomow wotspody kóncuja. Łazowska gmejna chce nětko přećiwo tomu zakročić.
Łaz (AK/SN). Kolesowanski kołopuć wokoło Třižonjanskeho jězora chce gmejna Łaz ponowić a w tym zwisku tomu zadźěwać, zo korjenje štomow a kerkow asfaltowu worštu kóncuja. Tomu su gmejnscy radźićeljo na swojim zašłym posedźenju přihłosowali.
