Budyšin (CS/SN). Wotsrjedź januara steji na terenje Budyskeje chorownje blisko Flincoweje wulki kran. Hižo spočatk lěta su tam twarsku jamu wuzběhować započeli, po tym zo běchu loni w lěću stary přitwar wottorhali. Nětko twarja tam nowe laborowe twarjenje, z kotrymž Medicinski labor wuchodneje Sakskeje powjetša. Wón ma wot lěta 2006 swoje hłowne sydło w lěkarskim domje na Hornčerskej 17, w bywšej poliklinice. Zapřijimajo twarjenje, kotrež podołhojće k Flincowej steji a w kotrymž běchu něhdy krej darowanska centrala a labory Hornjołužiskich klinikow zaměstnjene, změje medicinski labor potom 2 000 město dotal 1 200 kwadratnych metrow městna. Podołhojte twarjenje nětko wobšěrnje saněruja.