Stadion milinarnikow chcedźa hišće lětsa přetwarić

Běła Woda (AK/SN). Sportowe připrawy Běłowodźanskeho stadiona milinarnikow chcedźa hišće lětsa přetwarić a nahódnoćić. K tomu wuzna so tamniša měšćanska rada na swojim zašłym posedźenju. Při pjeć napřećiwnych hłosach radźićeljo wobzamknychu, planowanske dźěła we wobjimje nimale 30 000 eurow Nišćanskemu inženjerskemu běrowej přepodać. Při tym jedna so wo naćiskowy plan z wobličenjom kóštow, plan za dowolnosće kaž tež wuwjedźenski plan. „Hrubje smy so wo trěbnych dźěłach wothłosowali, nětko móžemy so nadrobnosćam wěnować“, rjekny nawoda měšćanskeho twarskeho wotrjada Thomas Böse.

Projekt płaći dohromady 500 000 eurow. Z toho zapłaći město swójski podźěl 50 000 eurow. Tamny dźěl 450 000 eurow dóstanu jako spěchowanje z programa Zwjazka a krajow za měšćanski přetwar. Město Běła Woda bě loni w januaru próstwu wo spěchowanje na zakładźe přednaćiska z lěta 2019 zapodało. 12. oktobra dósta wopismo wo přizwolenju spěchowanskich srědkow.