Zelena swěca za přesydlerjow
Zo so najwjetši dźěl wobydlerjow za wotbagrowanje předwidźaneho Miłoraza do Slepoho přesydli, je hižo dlěši čas jasne. Za to su nětko tež trěbne twarske wustawki schwalili.
Slepo (AK/SN). Za přesydlerjow z Miłoraza do Slepoho twori tamniša gmejna krok po kroku wuměnjenja, zo móhli woni tam nowu domiznu nańć. Na swojim zašłym posedźenju je Slepjanska gmejnska rada za přesydlensku městnosć při Dźěwinskim puću wustawki wo twarskim planje wobzamknyła. Naćisk bě wot spočatka februara hač do spočatka měrca zjawnje wupołoženy. Zarjadnistwa a nošerjo zjawnych zajimow zwuraznichu w tym času swoje stejišća. Tež wobydlerjo móžachu swoje wobmyslenja a pokiwy přednjesć. Stejišćo zapodała je na přikład ewangelska swobodnocyrkwinska wosada Slepo-Brězowka. „Wona poskići cyrkwi ležownosć napřećo pohrjebnišću na zelenej płoninje“, rozłoži planowar Ansgar Kaup. „Tele stejišćo pak bě překrótkodobne. Smy je najprjedy raz wróćo stajili.“
Policija (13.05.19)
Wopity z traktorom jěł
Kašecy. Na polu mjez Kašecami a Žuricami je sobotu 32lětny traktorist do dalšeho traktora zrazył. Při tym nasta wěcna škoda něhdźe 30 000 eurow. Po dróze so zawinowar njezboža ze swojim traktorom do Kašec wróći. Policisća zwěsćichu, zo měješe něhdźe 1,48 promilow alkohola w kreji, a tak dyrbješe w chorowni krej wotedać. Přećiwo traktoristej přepytuja nětko alkohola we wobchadźe dla.
Z „chorhojčku“ po puću był
Malešecy. Kedźbliwi wobydlerjo informowachu sobotu policistow wo wopitym šoferu awta w Malešanskej gmejnje. Zastojnicy z Budyskeho policajskeho rewěra prošachu 55lětneho w Hućinje wo dobrowólny test alkohola, tón wujewi 1,66 promilow. Wodźer awta dyrbješe w chorowni krej wotedać. Nimo jězdźenja pod alkoholom přepytuja přećiwo njemu jězdźenja bjez dowolnosće dla, dokelž muž tajku scyła nima.
Motorski so ćežko zranił
Tež w stanje derje klinčało
Najebać dešćikojte wjedro mejemjetanje derje wopytane było
Pančicy-Kukow (SN/MWj). Trochu improwizować dyrbjachu młodostni při mejemjetanju w Pančicach-Kukowje. Tam je sobotu popołdnju jědnaće porow małych dźěći, wosom porow trochu wjetšich dźěći a 16 porow młodostnych na swjedźenišću swoje reje předstajiło. Wšitke holcy běchu katolsku narodnu drastu woblečene. Najebać mokre wjedro je wjele ludźi přihladowało. Wšón čas wjedro někak wudźerža, hakle jako běchu młodostni nimale dorejwali, poča so zaso dešćować, tak zo sej k „Šewcej“ wšitcy do stana wućeknychu. Tón bě na to z ludźimi kopaty połny a tak zhromadne spěwy hišće rjeńšo klinčachu. Reje přewodźachu Marija Šołćina, Měrćin Weclich, Eckhard Czapek a Tomaš Hejduška. Při napřemoběhu hólcow wopokaza so mjez małymi dźěćimi Nevio Gattner jako najspěšniši, wón wuzwoli sej Miju Kralec za kralownu. Mejski por trochu wjetšich dźěći rěkaštaj Florian Zelnak a Amelie Hanušec, a mjez młodostnymi wuzwoli sej Jonas Pjetaš Jadwigu Šnajdrec za kralownu.
Přednošuje wo železnicy
Budyšin. Zažne lěta železnicy a jeje wuskutki na Hornju Łužicu budu tema přednoška dr. Andreasa Bednareka jutře, 14. meje, w 19 hodź. w Budyskej měšćanskej bibliotece na Hrodowej. Na wubranych přikładach chce referent předstajić, kotre hospodarske, měšćanskotwarske a techniske změny je železnica ze sobu přinjesła. Zastup je darmotny.
Chcedźa z wobydlerjemi rěčeć
Worklecy. Na rozmołwnej kole z wobydlerjemi přeproša Worklečanski gmejnski zwjazk CDU. Prěnje wotměje so jutře, wutoru, we 18.30 hodź. w Smječkečanskim towarstwowym domje. Tam chcetej młodźinska wohnjowa wobora a młodźinski klub projekt za 48hodźinsku akciju předstajić. Nimo toho póńdźe wo aktiwity wjesneho kluba. Štwórtk, 16. meje, w 19 hodź. su zajimcy přeprošeni k nowemu mosćikej na Worklečansku mału kupu. Tam chcedźa ideje z nowowuhotowanje parka zběrać. Darmotne napoje budu přihotowane.
Wo kolesowanju w měsće
Mału wjes ze swětom zwjazaja
Nimale swójbne bě zašłe posedźenje Njebjelčanskeje gmejnskeje rady. Wone wotmě so pola Zahonec we Wěteńcy, hdźež hewak swójbne swjedźenje swjeća. To trochu wjace wopytowarjow přiwabi hač hewak.
Wěteńca (JK/SN). Jako jenička wjes Njebjelčanskeje gmejny dóstanje Wěteńca spěšny internet. To zdźěli wjesnjanosta Tomaš Čornak (CDU) na njedawnym poslednim posedźenju gmejnskich radźićelow do komunalnych wólbow. Internetnje bě wjes dotal jeno špatnje zastarana. Dokładniše informacije tež techniskeho razu měješe poprawom pólski projektowy nawoda tuchwilnych dźěłow we Wěteńcy podać, wón pak dyrbješe schorjenja dla wotprajić. Přiwšěm su wjesnjenjo z postupowanjom dźěłow a z poměrom k twarskim dźěłaćerjam jara spokojom. Hłubokotwarska firma kładźe tučasnje roły do zemje, w kotrychž potom kable hač k jednotliwym domam sćahnu. Monterojo Němskeje telekom je pozdźišo w domach přizamknu.
Serbšćina ma samozrozumliwa być
Za wólby Kulowskeje měšćanskeje rady 26. meje nastupi mjez druhim Seraphina Pašcyna z Kulowca. Skutkowanja w najwšelakorišich gremijach, na přikład jako poradźowaca čłonka techniskeho wuběrka Budyskeho wokrjesneho sejmika dla, běchu ju čłonojo Kulowskeje CDU narěčeli, hač nochcyła so tež na komunalnej runinje angažować. Tak kandiduje nětko prěni raz za měšćanski parlament. ,,Zwoprawdźić chcyła žiwu dwurěčnosć w gmejnje, tak zo je serbšćina wšudźe samozrozumliwa“, 44lětna wuzběhnje.
Mać dweju dźowkow prócowaše so zhromadnje z druhimi staršimi hižo wo to, załožić serbsku skupinu w Kulowskej pěstowarni, kotraž je w nošerstwje Křesćansko-socialneho kubłanskeho skutka. Čestnohamtsce poradźuje wona zakładnu šulu w měsće a Wojerowski Lessingowy gymnazij nastupajo serbske naležnosće, k čemuž słuša tež pěstowanje serbskich nałožkow. Za mejemjetanje je wona z dźěćimi bantowu reju wokoło meje nazwučowała. Dale bě sobu pomhała, serbsku narodnu drastu wobstarać.
Krótkopowěsće (13.05.19)
Tankownju na A 4 nadpadnyłoj
Budyšin. Na awtodróhowym zastanišću Hornja Łužica na A 4 blisko Słoneje Boršće bu něhdźe w 3.10 hodź. tankownja do směra na Zhorjelc nadpadnjena, kaž policija wozjewi. Jedyn skućićel bě předawarce tankownje z pistoli podobnym objektom wohrozył a žadaše sej pjenjezy. Žonje so na to schowaštej. Pokradnyłoj nadpadnikaj ničo njejstaj. Policija přepytuje nětko pospytaneho rubježneho wudrěwanja dla a pyta za swědkami.
Susanne Heinrich počesćena
Zgorzelec. Film „Melancholiska holca“ filmytwórče Susanny Heinrich dósta hłowne myto 16. nysoweho filmoweho festiwala w třikrajowym róžku. „Z humorom měri so režiserka ... na paradoksy našeho moderneho swěta“, rěka we wopodstatnjenju jury. Z 10 000 eurami dotěrowane hłowne myto je sakska ministerka za wuměłstwo Eva-Maria Stange (SPD) sobotu w Zgorzelecu přepodała.
Zahaja kónčne pruwowanja
Tež serbske skupiny w akciji
Budyšin (mk/SN). Za lětušu 48hodźinsku akciju je so po cyłym Budyskim wokrjesu 95 młodźinskich skupin přizjewiło. Mjez nimi je jědnaće serbskich. Su to młodźinske kluby z Njebjelčic, Radworja, Smječkec a Wotrowa kaž tež Smječkečanska młodźinska wohnjowa wobora. Tež wuknjacy wyšich šulow z Kulowa, Ralbic a Worklecy su přizjewjeni a chcedźa so runja druhim młodostnym na dobro wjesneje zhromadnosće angažować. Tak planuja najwšelakoriše twarske a wuporjedźenske dźěła při młodźinskich klubach, šulskich kubłanišćach, towarstwowych domach na wsach a na sportnišćach. Nimo toho budu naměsta, rěki a puće rjedźić a insektowe hotele twarić. Dalši chcedźa swojich sobučłowjekow zwjeselić. Tak planuja, wopytać wobydlerjow Smječkečanskeho Domu swj. Jana a podpěrać přistajenych dźěłarnje swj. Michała w Pančicach-Kukowje.
Gratu so přimać hišće móžno
Budyšin. Sobotu, 1. junija, chce jury, wobstejaca z čłonow młodźinskeje přirady rozsudźić, na kotre młodźinske projekty, iniciatiwy a ideje we wobłuku akcije „Přimaj so gratu!“ rozdźěla cyłkownje 1000 eurow dobyćerskich pjenjez. Sumu přewostaji Partnerstwo za demokratiju w ramiku młodźinskeho fondsa. Bohužel njeje so dotal ani jenička młodźinska skupina abo iniciatiwa požadała. Młodostni, kotřiž chcedźa šansu hišće wužić, njech zapodadźa swoju próstwu hač do 20. meje pod www.my.domowina.de abo młodźinskej socialnej dźěłaćerce RCW Mariji Koklinej.
Smědźa muzeje rumować?
Wojerec. Stawizniske a domiznowědne muzeje su wěste městno zachowanja historiskich objektow. Na jednym boku chcedźa wone wjace zachowanjahódnych wěcow přiwzać, na tamnym maja za to dźeń a mjenje pjenjez a personala. Smě muzej potajkim tež raz něšto wurumować a jeli haj, što? Wo tym přednošuje wutoru, 14. meje, w 17 hodź. Marcel Steller w kaminowej stwě Wojerowskeho hrodu. Zastup je darmotny.
Dróha połojčnje zawrjena
Policija (10.05.19)
Paduchow lepili
Budyšin. Cigarety a alkohol chcyštaj mužej zawčerawšim z kupnicy w Budyskej Strowotnej studni kradnyć. Jako to předawarki pytnychu, wobaj ćeknyštaj. Při tym je 33lětny při informaciji dwaj telefonaj skóncował, dokelž sobudźěłaćerka runje policiju wołaše. Jeho pak zastojnicy přiwšěm zajachu, při čimž so jedyn z nich zrani. Tamny skućićel, 36lětny Budyšan, je z kupnicy twochnył a sobudźěłaćerjej hrozył. Tež to pak jemu ničo njepomhaše, dokelž policisća jeho z druhich deliktow hižo znajachu a pozdźišo „wopytachu“.
