Krótkopowěsće (03.11.20)
Woidke z koronu natyknjeny
Podstupim. Braniborski ministerski prezident Dietmar Woidke (SPD) bu pozitiwnje na koronawirus testowany. Wón njeje po prěnich zjawach nazymjenja njedźelu žane dalše słužbne terminy wukonjał, zdźěli dźensa knježerstwowy rěčnik Florian Engels. Nětko kontaktowe wosoby identifikuja.
Podpěra promowowacym
Drježdźany. Sakska tři městna promowowacych na Uniwersiće Zjednoćenych narodow w Drježdźanach financnje podpěruje. Spěchuja doktorandki a doktorandow z prohowych a wuwićowych krajow při slědźenjach na temu „Wot Covid-19 wotkryte prašenja resursoweho zwiska powołanskich skupin w agarnym a žiwidłowym zastaranskim rjećazu“. Při tym dźěłaja tež ze slědźenskim institutom za globalne změny Čěskeje akademije wědomosće CzechGlobe hromadźe.
Zetkanje přestorčene
Wobšudnicy wužiwaja koronu za swoje zaměry
Budyšin (SN/MWj). Kaž zo njeby koronowa pandemija ludźom hižo dosć starosćow načiniła, nětko tež wobšudnicy tuchwilne połoženje za swoje zaměry wužiwaja, kaž Zhorjelska policajska direkcija rozprawja. Minjene dny je njeznaty w Zhorjelcu w připołdnišim času pola muža zazwonił. Wón wuda so jako lěkar, kiž runje syna zazwonjeneho do Drježdźan lećeć da. Jako přičinu mjenowaše njeznaty natyknjenje z koronawirusom a kritiski strowotny staw syna. Pozdatny lěkar dale rozprawješe, zo trjeba schorjeny nuznje ruski medikament, kiž pak by Zhorjelčan z 8 000 eurami sam zapłaćić dyrbjał. Tón na to prawje reagowaše, rjekny, zo žane pjenjezy nima, a telefonat skónči.
Policija wuraznje před nowej metodu warnuje, z kotrejž spytaja skućićeljo tuchwilu njewěstosć a strach mjez wobydlerjemi znjewužiwać. Kliniki sej telefonisce ženje žane pjenjezy za medikamenty nježadaja.
Wšitko wotprajili
Smochćicy. Smochčanske kubłanišćo swj. Bena a Katolska akademija Drježdźansko-Mišnjanskeho biskopstwa stej aktualneho wuwića koronoweje pandemije dla wšitke tak mjenowane prezencne zarjadowanja najprjedy raz hač do 30. nowembra wotprajiłoj. „Rozsud njebě lochki, dokelž su runje nětko zetkanja a rozmołwy wažne. Kóždy pak móže pomhać, zo so wirus dale njerozpřestrěwa“, zdźěli rektor kubłanišća swj. Bena Sebastian Kieslich.
Na wiki jeno z masku
Budyšin. W zwisku ze sakskimi koronowymi postajenjemi skedźbni město Budyšin na to, zo ma so na tudyšich tydźenskich wikach na kóždy pad škitny nahubnik wužiwać. Zelene wiki wotměja so wutoru wot 8 do 13 hodź. a sobotu wot 7 do 12 hodź, měšane wiki štwórtk wot 8 do 17 hodź., a to jeničce na Žitnych wikach. Tu móža so wotstawki lěpje dodźeržeć hač na Hłownym torhošću.
Policija (02.11.20)
Do Lkw-ja zrazyła
Kulowc. Wšo druhe hač rjany bě minjeny pjatk zazběh do kónca tydźenja za 34lětnu žonu w Kulowcu. Wona bě na statnej dróze S 95 do směra na Wojerecy po puću, jako ze swojim wosobowym awtom typa Toyota z dotal njeznateje přičiny na lěwy bok jězdnje zajědźe. Tam prasny wona do napřećo jěduceho beton měšaceho nakładneho awta a wosta hakle při muri chěže stejo. Přiwołani wohnjowi wobornicy žonu z jeje jězdźidła wuswobodźichu. Wěcna škoda wučinja po informacijach Zhorjelskeje policajskeje direkcije něhdźe 12 500 eurow.
Nowym strukturam šansu dać
Wojerecy (AK/SN). Komunalny twarski zawod města Wojerecy ma přichodnje zaměrnišo a efektiwnišo dźěłać. To wuchadźa z posudka Drježdźanskeje komunalneje poradźowanskeje firmy B & P, kotremuž je wjetšina Wojerowskich měšćanskich radźićelow na swojim zašłym posedźenju přihłosowała. B & P je wot lětušeho februara organizaciju a hospodarskosć twarskeho zawoda přepruwowała. Wuslědk je, zo měli zasadnu strukturu zawoda wobchować, jeje jednotliwe dźěle pak měli optiměrować. W lěće 2022 chcedźa zawod znowa přepruwować. Ličba jeho sobudźěłaćerjow chcedźa dołhodobnje wot tuchwilu 22 na 15 znižić.
Naslědnikej dobry zakład zawostajił
Wojerecy (SiR/SN). Po 14 lětach na čole města Wojerecy su minjeny pjatk tamnišeho wyšeho měšćanostu Stefana Skoru (CDU) na wuměnk rozžohnowali. Předewšěm běchu to słowa dźaka, dopomnjenja a rozmyslowanja, kotrež wjacori rěčnicy zwuraznichu. Tak rjekny krajny rada Michael Harig (CDU), zo su Wojerecy najskerje najwažniše město wokrjesa, dokelž nima tu strukturna změna runjeća. „Wšitcy wobdźěleni z wyšim měšćanostu na čole su tule změnu wuběrnje zmištrowali. A Stefan Skora wosobinsce je wuspěšne dźěło wukonjał, nic jeno za Wojerecy, ale tež za wokrjes“, praji Harig.
Za zemrětych a žiwych
Poselstwo pochowanskeho lěsa snano někotrehožkuli zadźiwa
Brunow (UM/SN). Započało bě so wšiko z wowku. Wona – dokładnišo prajene wowka Andréja Rascha – chcyše rady w lěsu pochowana być. Jako ju jeje wnučk, lěsnistwowy inženjer a mějićel lěsnistwoweho zawoda pola Kamjenca, na to skedźbni, zo je to z běrokratiskimi zadźěwkami zwjazane, wona jeno znapřećiwi: „Staraj so wo to!“ A André Rasch so postara. Wuslědk je wot minjeneho pjatka w lěsu mjez Brunowom (Brauna), Lückersdorfom a Kamjencom widźeć. Tam wotewrěchu prěni pochowanski lěs Budyskeho wokrjesa.
Wotpohlad Andréja Rascha su na zbožowne wašnje zwjazali ze zaměrom města Kamjenc, kotrež so hižo wjacore lěta prócuje, přirodźe bliske pochowanišćo zwoprawdźić. Z předewzaćom FriedWald tzwr nadeńdźeštaj wobaj třećeho partnera, kiž ma wobšěrne nazhonjenja ze zapołoženjom a wobhospodarjenjom pochowanskich lěsow. Před lětomaj wotewrěchu tajki w Deutsch-Paulsdorfje w susodnym Zhorjelskim wokrjesu. Tón je mjeztym chětro woblubowany.
Wažna dróha Choćebuza ponowjena
Jörg Funda nowy wjesnjanosta w Slepom
Slepo (CK/SN). Něhdźe w 18.50 hodź. bě wčera na žurli Serbskeho kulturneho centruma w Slepom wuslědk jasny: Jörg Funda, kotryž je wot awgusta jako hamtski rjadowar na čole Slepjanskeje gmejny skutkował, čini to tež přichodne lěta jako jeje wjesnjanosta. K překwapjence, kotruž su snadź někotři w Slepom, Rownom a Mułkecach wočakowali, tuž dóšło njeje. 55lětny Rownjan, požadar CDU, je so jasnje přećiwo Mathiasej Lampje, kiž nastupi z mandatom AfD, přesadźił. Po nachwilnym wólbnym wuslědku hłosowaše 970 wolerjow za Fundu (67,4 procenty). 447 wólbokmanych (30,9 procentow) by Lampu za šefa gmejny měło. Wólbne wobdźělenje bě 70,24 procentow.
Krótkopowěsće (02.11.20)
120 nowych infekcijow
Budyšin. W Budyskim wokrjesu bu wčera 120 nowych infekcijow z koronawirusom zwěsćenych. Z tym je ličba w sydom dnjach poćahowana na ličbu wobydlerstwa 781. W karantenje je 2 415 ludźi. 41 dalšich pacientow je wuhojenych. Tuchwilu je we wokrjesu 1 166 ludźi inficěrowanych. 32 z nich so w klinikach hoja. Mjeztym je dalši pacient zemrěł.
Myto Büchnera Elce Erb
Darmstadt. Autorka Elke Erb je sobotu w Darmstadtskim Statnym dźiwadle Myto Georga Büchnera přijała. Korony dla bě tam lědma publikuma. Z mytom bu 82lětna lyrikarka a basnica za swoje „njezaměnliwe“ literarne žiwjenske tworjenje wuznamjenjena. Myto we wysokosći 50 000 eurow Němskeje akademije za rěč a basnjenje je najwažniše wuznamjenjenje na polu literatury w Němskej.
Filmowy festiwal přesunjeny
Choćebuz. Organizatorojo 30. filmoweho festiwala Choćebuz (FFC) su podawk na 8. do 13. decembra 2020 přesunyli. Dualny festiwal wotměwa so w tych dnjach z předstajenjom filmow w kinach delnjołužiskeho města kaž tež na internetnej stronje festiwala. Kartki za předstajenje filmow w kinach wot 3. do 8. nowembra dale płaća.
