Skrótšene časy
Budyšin. Koronapandemija wuskutkuje so nětko tež na Serbsku kulturnu informaciju w Budyskim Serbskim domje. Kaž wottam rěkaše, maja wot dźensnišeho na njewěsty čas skrótšene wotewrjenske časy. SKI je nětko wšědnje jenož hišće wot 10 do 14 hodź. přistupna.
Sudnistwo rozsudźiło
Kulow. Wjacore lěta trajace juristiske rozestajenje mjez městom Kulowom a Łazowskej gmejnu je skónčene. W druhej instancy je Kulow skóržbu přećiwo susodnej gmejnje přěhrał. Tak bě prawnisce w porjadku, zo je Łaz w lěće 2015 wupowědźił, wopłóčki z Wulkich Ždźarow a Koblic do Kulowskeje wodočisćernje klumpać. Wot toho časa ćeku wopłóčki z wobeju wsow do wodočisćernje na Horach. Po słowach Kulowskeho měšćanosty Markusa Poscha (CDU) najnowši wusud akceptuja. Wupowědźenja dla pak ma Kulow mjenje wopłóčkowych popłatkow.
Dóstanu nowy tomograf
Pomoc w poslednim wokomiku
Budyšin (SN/MWj). Přeco zaso dyrbi policija rozprawjeć, zo spytaja wobšudnicy staršim ludźom při telefonje pjenjezy wulišćić. Zwjetša wužiwaja při tym tak mjenowany wnučkowy trik abo wudawaja, zo trjebaja pjenjezy, dokelž chcedźa sej awto kupić. Najnowši trik je, zo wobšudnicy ludźom napowědaja, zo je jedyn z přiwuznych na koronawirus schorjeł, zo trjeba nuznje medikament a zo dyrbi jón sam financować. Mjeztym zo najwjetši dźěl ludźi prawje reaguje a telefonat skónči, by so njedawno tajki trik nimale poradźił.
92lětna žona měješe za wustrowjenje swojeho syna 14 000 eurow zapłaćić. Pozdatny lěkar z Čěskeje pola njeje zazwoni a rozprawješe jej wo schorjenym synje. Staruška wo to prošeše, zo smě ze synom rěčeć. Na to so při telefonje płakacy hłós přizjewi a rjekny sady kaž „Njemóžu prawje dychać.“ a „Ja ći pjenjezy zaso wróću.“ Na to „lěkar“ zaso telefonat přewza. We wušiknej rozmołwje wón žonu přerěča, z pjenjezami do Pólskeje jěć a je tam někomu přepodać. Za to chcyše jej taksi słać. Žonje pak wón kruće zakaza, z někim wo tym rěčeć.
Spřećiwjeja so sćežorej
Wobydlerska iniciatiwa žada sej pasmo bjez prudźenja
Kubšicy (CS/SN). Nowy standard za mobilne telefonowanje 5G je Kubšisku gmejnsku radu na jeje zašłym posedźenju zaběrał. We wobłuku hodźiny wobydlerskeho naprašowanja su so zastupjerjo wobydlerskeje iniciatiwy słowa jimali. Tale iniciatiwa wustupuje přećiwo planowanemu škričkowanskemu sćežorej, kotryž chce firma direktnje při zwjazkowej dróze B 6 nastajić.
Wjesela so nad pjenježnej podpěru
We wobłuku sportoweho spěchowanja je město Budyšin awtomatisku krjepjensku připrawu koparskeho wotrjada Pósta Germanije Budyšin podpěrało. Nimo su tuž na hrajnišću při Edisonowej časy sucheho trawnika w lěću.
Budyšin (SN/MWj). Wjele słónca, wysoke temperatury a mało spadkow – štož w lěću mnozy witaja, tych, kotřiž dyrbja so wo trawniki starać, kóžde lěto znowa wužaduje. Tež za koparski wotrjad towarstwa Póst Germania Budyšin. Hižo lěta so tam z wulkim angažementom prócuja, zo by jich koparski trawnik tež w lěću zeleny był. Wuslědk su na kóncu přiwšěm jenož brune blaki. Ćim bóle so tam tele dny wjesela, zo maja nětko modernu połnoawtomatisku krjepjensku připrawu instalowanu. Dohromady 14 nastrojow je pod trawnikom schowanych. Hdyž ze zemje wujědu, wone pak w połnym kruhu pak w dźělnym dosć wody na trawnik pryskaja a tak kóždy kućik kopanišća docpěwaja, rěka w nowinskim wozjewjenju měšćanskeho zarjadnistwa.
Zwěrjeća pedagogowka z Francoskeje je minjeny kónc tydźenja na ...
Krótkopowěsće (16.11.20)
Tysacy w karantenje
Budyšin. Ličba zwěsćenych natyknjenjow z koronawirusom je přez kónc tydźenja we wokrjesu Budyšin wo 449 na cyłkownje 4 012 rozrostła. Schorjenych bě wčera 2 006, šěsćdźesaćoch w klinice lěkuja. 4 784 ludźi je w karantenje. W Kamjenskej chorowni maltezow su pomocnicy Zwjazkoweje wobory dźěłać započeli. Mjeztym sej Budyski měšćanski zwjazk SPD žada šulske rjadownje dźělić, zo njebychu kubłanišća znowa zasadnje zawrěć trjebali.
Reportaža mytowana
Praha. W čěskej kategoriji tekst mytowachu we wobłuku lětušeho Němsko-Čěskeho žurnalistiskeho myta reportažu Vladimíra Ševele „Kohout? Spadl ze schodů ...“ (Kokot? Je po schodźe dele padnył ...), wozjewjenu w Hospodářskich novinach loni 30. awgusta. Awtor poda so tam do Delnjeje Łužicy a wobswětla kulturu a identitu Serbow kaž tež jich prócowanja, stare tradicije wobchować.
Minister so starosći
Policija (13.11.20)
Pjenježny transporter přewodźeli
Słona Boršć. Njewšědny nadawk měješe policija předwčerawšim na awtodróze A 4 mjez Hornim Wujězdom a Słonej Boršću. Tam je so awto wěstotneje firmy, z kotrymž pjenjezy transportowachu, skóncowało, tak zo dyrbjachu wotwlečenske předewzaće wołać. Samo na sebi njeje to ničo wosebite. Dokelž pak bě w transporteru wjetše mnóstwo pjenjez, staraše so policija wo wěsty wotběh. Skóncowane awto wotwlečechu hač k awtodróhowemu wotpočnišću. Tam su pjenjezy do dalšeju jězdźidłow firmy překładowali.
Planuja klóšterski swjedźeń 2021
Kónc z přećemi
Wojerecy. Dźensa, pjatk, bě posledni termin za wotedaće namjetow, kotrež měli so we wobłuku wobydlerskeho budgeta 2021 města Wojerec zwoprawdźić. Wjace hač 60 přećow z města samoho a z přisłušacych wokolnych wsow su minjene dny do měšćanskeho zarjadnistwa dóšli. Najprjedy internje pruwuja, što hodźi so zeskutkownić, w aprylu móža wobydlerjo potom swojich faworitow wolić.
Adwentničku wotprajili
Budyšin. Předsydstwo Zwjazka serbskich wuměłcow je so rozsudźiło lětsa žanu adwentničku njeswjećić. Tuchwilu je předwidźane, zo ZSW swoje tradicionalne zetkanje do nalěća přesunje, zdźěli předsyda Jan Bělk. Klětu w aprylu steja nowowólby předsydstwa ZSW na planje. Bychu-li hłownu zhromadźiznu ze słódnej hosćinu zwjazali, njeby to jenož „narunanje“ za wupadnjenu adwentničku było, ale zdobom rjany zazběh do noweje legislatury. Termin planować pak móža hakle něhdźe w februaru/měrcu započeć.
Straty přemysłoweho dawka dla
Radwor (SN/MkWj). Hižo nětko je jasne, zo změje Radworska gmejna lětsa wo wjele mjenje dawkowych dochodow hač spočatnje planowane. To zhonichu radźićeljo a hosćo předwčerawšim na posedźenju gmejnskeho parlamenta. Wjesnjanostka Madeleine Rentsch (Domizniscy přećeljo Minakał) informowaše, zo njezměja kónc lěta planowane 800 000 eurow přemysłoweho dawka w kasy ale jenož něhdźe 300 000 eurow. Hač stat gmejnje pobrachowace 500 000 eurow naruna, tam dotal hišće njewědźa. Hłowna přičina je, zo sej zawody hižo płaćene dawki wróćo žadaja, dokelž njemóžachu koronapandemije dla produkować.
