Přewjedu prěnje wobšěrne testy
Budyšin/Worklecy (SN/JaW). W gmejnje Worklecy přewjedu jutře, pjatk, prěni raz w Sakskej wobšěrny spěšnotest na koronawirus, kaž Budyski wokrjes wčera zdźěli. „W dorěčenju ze statnym knježerstwom chcemy z pilotowym projektom dotal njeznate inficěrowanja wotkryć“, informuje nowinski wotrjad wokrjesa na naprašowanje. Zdobyć chcedźa tohorunja dopóznaća wo woprawdźitym rozpřestrěću wirusa kaž tež za móžne dalše naprawy.
W času wot 10 do 18 hodź. měli so wšitcy wobydlerjo mjenowaneje gmejny jutře we Worklečanskej sportowej hali testować dać. „Wuslědki zdźělimy jim po štwórć hodźinje hnydom na městnje. Štóž strowotnych přičin dla njemóže do sportownje přińć, njech so w sekretariaće šule přizjewi. K nim pósćelemy jedyn z třoch mobilnych teamow, zo bychu spěšnotest přewjedli“, zdźěli Mandy Noack z krajnoradneho zarjada.
Sakska je 10 000 spěšnotestow bjezpłatnje přewostajiła. Za testy we Worklečanskej gmejnje je so wokrjes rozsudźił, dokelž maja tam z 52 najwjace koronainficěrowanych na 1 000 wobydlerjow.
Krótkopowěsće (03.12.20)
Najwjetši dnjowy přirost
Budyšin. Z wčera 334 zwěsćenymi koronainfekcijemi ma Budyšin wokrjes dotal najwjetši dnjowy přirost. Ličba smjertnych padow je so wo dwaj na 93 powjetšiła. Wot 2 321 schorjenych (+47) lěkowachu wčera 168 w klinice. W Zhorjelskim wokrjesu bě 291 nowonatyknjenjow, štyrjo pacienća zemrěchu. Tak mjenowana incidenca wučinješe w Budyskim wokrjesu 441,33 a w Zhorjelskim 443,57.
Lyrika Dyrlicha w słowakšćinje
Bratisława. „Ryba a rak w pĕsku spěwatej“ rěka nowa antologija basnjow Benedikta Dyrlicha, kotraž je nětko w rjedźe fachoweho časopisa Vertigo słowakskeho Foruma alternatiwneje kultury a kubłanja FACE wušła. Zběrka wopřijima dohromady 21 twórbow, přebasnjenych z podpěru přećela Serbow Petera Čačka wot Dany Podrackeje. Publikaciju skulojćeja fotografije Tomáša Danielisa.
Myto za film dóstali
Předčitaća same čitaćje za dźěći wažne
Budyšin/Drježdźany (SN/MiR). Dźěćom čitać, je wažne za jich duchowne wuwiće. To njeje ničo nowe. Zwjetša činja to maćerje, wowki a kubłarki. Runje tak hódne za tule zaběru su nanojo, dźědojo a kubłarjo. Stajnje w nowembru wotměwa so předčitanski dźeń. Tež lětsa běchu so zajimcy na to přihotowali. Mjez druhim ma Rěčny centrum WITAJ kruty zdónk ludźi, kotřiž swoju najlubšu knihu w šulach abo dźěćacych dnjowych přebywanišćach předstajeja. Tola tež nowačcy so přizjewjeja, zo bychu dźěći za literaturu zahorili. Nažel dyrbješe tele zarjadowanje korony dla tónraz wupadnyć.
Bjez horceho wina budu pjenjezy pobrachować
Rotary-klub kaž tež Lionsowy klub w Budyšinje wostanjetej lětsa bjez dochodow z Budyskich Wjacławskich wikow. Přiwšěm wonej projekty za młodych ludźi a přirodu dale podpěrujetej.
Policija (02.12.20)
Korony dla kontrole přewjedli
Kamjenc. Na wjacorych městnach Budyskeho a Zhorjelskeho wokrjesa su policajscy zastojnicy předwčerawšim dodźerženje škitnych naprawow korony dla kontrolowali, mjez druhim na torhošću před Kamjenskej radnicu a na Cyrkwinskim naměsće w Radebergu. Internetnje zhonichu policisća wo planowanymaj zhromadźiznomaj, kotrejž pak njeběštej přizjewjenej. Dohromady zličichu 30 wosobow. Wuslědk bě jedne přeńdźenje přećiwo zakonjej wo zhromadźowanju a jedne přećiwo koronowym postajenjam. W Běłej Wodźe kontrolowachu zastojnicy dodźerženje hygienowych postajenjow w nakupowanskim centrumje. Při jednym předawanišću njebě personal nahubnik wužiwał a je to tež na napominanje policistow wotpokazał. Tam dyrbja so nětko přeńdźenja dla zamołwić.
Jenož pjeć razow škotować móhli
Haslow (SN/MWj). Zašo hač w normalnych časach dyrbja lětušu sezonu škotowych turněrow serbskich seniorow skónčić. Kaž hłowny organizator Měrćin Nowak zdźěli, dyrbi tež posledni planowany turněr za december w Haslowje koronoweje pandemije dla wupadnyć. Jeli to škitne postajenja dowola, chcedźa 26. januara 2021 w 14 hodź. w Haslowje nowu hrajnu sezonu zahajić.
Epidemije dla móžachu so serbscy seniorowi škotowarjo lětsa jenož pjeć króć ke kartyplacanju zetkać, a to w Lejnje, Šunowje, Chrósćicach, Kozarcach a Sernjanach. Dohromady je so jedna hrajerka a 27 hrajerjow wobdźěliło. Prěnje městna wobsadźichu Gerat Šmeling z 11 207 dypkami, Křesćan Weclich (11 002) a Wolfgang Kühn (10 694). Lětuši zabawny wjeršk škotowarjow bě w septembru jich zhromadny wulět do Drježdźan z jězbu z parnikom, wodźenjom po měsće a z wobhladanjom cyrkwje Našeje knjenje a galerije starych mištrow.
Wodarnja nastawa cyle po planje
W Hamorje rosće milionowy projekt ze zemje, kiž ma w nalěću 2021 dźěłać započeć. Z nim budu raz 35 000 ludźi z pitnej wodu zastarać.
Hamor (CK/SN). Twar noweje wodarnje w Hamorje leži w časowym a terminowym planje. Wo tym informowaše jednaćelka wodoweho zaměroweho zwjazka „Srjedźna Nysa–Šepc“ (WZV) Petra Brünner njedawno wjesnjanostow wosom sobustawskich gmejnow, mjez druhim tež tych Slepjanskeje wosady. W lěću běchu za wodarnju zakładny kamjeń połožili, fundamenty kidali a šěsć filtrowych kotołow po 18 tonach zatwarili. Wokoło nich natwarjena hala je tak daloko hotowa, zo móža wšitke trěbne mašiny zatwarić. Paralelnje k tomu saněruja wulkej wodowej zběrnikaj.
Premjera budźe wirtuelna
Budyšin. Nowa antologija Ludoweho nakładnistwa Domowina „Susodźa“ změje srjedu, 9. decembra, w 19 hodź. premjeru. Ta pak njewotměje so kaž hewak zwučene w Smolerjec kniharni, ale koronoweje pandemije dla wirtuelnje w interneće. Nadźijomnje prawje wjele zajimcow móža doma sedźo w křesle při škleńčce wina na wobrazowce čitanje z noweju serbskeju powědkow awtorki Měrany Cušcyneje a awtora Pětra Dźisławka sćěhować, dyrbja pak so za to přizjewić. Přizjewjenja su móžne přez link na stronje internetneho wobchoda LND pod www.domowina-verlag.de. Spočatnje předwidźana knižna premjera w Serbskim muzeju we wobłuku rjada „Kofej w třoch“ z tym płaćiwych wobmjezowanjow korony dla wotpadnje.
Do hornčernje pohladnyć
Inwestuja do woborow
Spěchowanske přizwolenje za hašenske jězdźidło wčera dóšło
Slepo (AK/SN). Nowotwar Rownjanskeje wohnjowoborneje gratownje je w kónčnej fazy. To rjekny twarski nawoda gmejny Slepo Steffen Seidlich na wčerawšim posedźenju gmejnskeje rady. „Tuchwilu dźěłaja tam molerjo, tepjenjotwarcy, suchotwarcy a kachlicarjo. Přichodny tydźeń přińdu elektrikarjo“, Seidlich rozłoži. Runočasnje twarja wonkowne připrawy.
Gratownja ma klětu hotowa być. W njej budźe městno za nowe hašenske jězdźidło TLF 4 000, kotrež financuja ze swójskimi srědkami gmejny a ze spěchowanjom Zhorjelskeho wokrjesa. Runje wčera je spěchowanske přizwolenje dóšło, informowaše komornica Carmen Petrick. Tak móža woborne jězdźidło zapłaćić.
Narodk hižo w adwenće steji
Šunow (aha/SN). Na křižowanišću wosrjedź Šunowa dopominaja před tamnišim swjatym křižom štyri kamjentne tafle z mjenami w Druhej swětowej wójnje padnjenych wjesnych muži. Na samsnym městnje sadźichu před někotrymi lětami wulku jědlu, kotruž w adwenće ze swěčkami wupyšichu. Ideju za to měješe tehdy Józef Woko. Běše to symbol přihota na hody, na swjedźeń měra a pokoja. Runočasnje bě to napominanje, zo bychu so wojerske rozestajenja po wšěm swěće skónčili.
Šunowčenjo pak chcychu tež zwuraznić, zo je so hody Jězusdźěćatko narodźiło. Tuž su so před třomi lětami rozsudźili tam tohorunja postajić Boži narodk, kotryž staj Pawoł Rachel a Norbert Völkel w šěrokosći nimale dweju metrow z drjewa wisateje wjerby natwariłoj. Patoržicu stajichu žłobik pódla wulkeho božodźěsćoweho štoma. Wot lońšeho widźiš pak tam hižo w adwentnym času wowcku, wóslika, swjateho Józefa a swjatu Mariju dźěćo wočakujo. Pokazka to na to, zo swjataj hospodu pytaštaj, kotruž w chuduškej hródźi skónčnje nańdźeštaj.
