Lětsa žadyn perfektny park
Na terenje bywšeho hosćenca hišće wjele dźěła čaka
Pančicy-Kukow (SN/MWj). Nimojěducy móhł sej myslić, zo je na terenje bywšeho stareho hosćenca w Pančicach-Kukowje wšitko dotwarjene. Bager drje tam hišće je, ale kontury su hižo derje spóznać. Štomy a kerki rosć abo samo hrajkanišćo nastać pak tam dawno hišće móc njebudu. Tule iluziju skóncować dyrbješe wjesnjanosta Markus Kreuz (CDU) na wčerawšim posedźenju gmejnskeje rady we Wotrowskej starej šuli. „Hdźež je stary hosćenc stał, lětsa hišće žadyn perfektny park njebudźe“, wón rjekny.
Hruby profil drje je hotowy, na gmejnu a twarsku firmu pak čaka hišće wjele dźěła. Na terenje dyrbja dalšu worštu pjeršće nasypać. Nimo toho maja puć wutworić a schód twarić. Planowane přepołoženje wotrězka Klóšterskeje wody drje stanje so po słowach Kreuza hakle 2022. Na druhim boku to gmejnje zmóžnja, so na planach wobdźělić a swoje předstawy sobu zapřijeć. Jedyn z přichodnych nadawkow budźe, jednotliwe wysokosće wuměrić, zo móhli porjadny schód twarić, wjesnjanosta wčera zdźěli.
Filmy před Krabatowym młynom
Krabatowe swjedźenske hry drje dyrbjachu lětsa w Čornym Chołmcu wotprajić. Za to pak so tam přichodny tydźeń z kinowym lěćom event hinašeho razu započnje.
Čorny Chołmc (SN/MWj). Tež w koronowych časach so Čornochołmčanski Krabatowy młyn wot 2. julija hač do 30. awgusta na wulke kino pod hołym njebjom přeměni. Krabatowe filmowe nocy přeprošuja lětsa na 35 wječorach na kinowe předstajenje z wotstawkom. Stajnje wot štwórtka hač do njedźele pokazaja nowe filmy z Hollywooda, klasikarjow, kultowe filmy a najwšelakoriše němske paski, praji zamołwita za zjawnostne dźěło Katja Wersch. Předpředań je so hižo minjenu wutoru započała.
Na njewšědne wašnje so tuchwilu Budyska firma Knorre wo štomy ...
Krótkopowěsće (26.06.20)
Tydźeń bjez nowonatyknjenych
Budyšin. Hižo sydom dnjow njesu w Budyskim wokrjesu žanych nowych infekcijow z koronawirusom zwěsćili. Wot spočatka pandemije je tu dotal dohromady 501 koronapadow, z nich je 19 ludźi zemrěło. 480 je so mjeztym wustrowiło. Hišće dwě wosobje stej aktualnje schorjenej, 32 ludźi je w karantenje. Zawčerawšim su wosom testow přewjedli.
Wuběrkam skoro runostajena
Podstupim. Rada za naležnosće Serbow při Krajnym sejmje Braniborskeje je dźeń a bóle „normalnemu“ wuběrkej parlamenta runostajena. To wuchadźa z wčera wozjewjeneho noweho jednanskeho porjada sejma. Tam je gremij w 17 paragrafach zakótwjeny. Samostatny wotrězk 12 rjaduje dźěławosć serbskeje rady we wobłuku skutkowanja parlamenta.
Jednaćel zastojnstwo złoži
Drje do padušneje tury zapřijaty
Nachwilnjedruhdźe do šule
Kubšicy (CS/SN). Po třoch měsacach nanuzowaneje přestawki korony dla je so Kubšiska gmejnska rada tele dny prěni raz zaso zetkała. Na dnjowym porjedźe steješe mjez druhim šulerski transport, kiž je trěbny, dokelž Bošečansku zakładnu šulu w septembru wobšěrnje saněrować započnu. Šulerjow z Kubšiskeje gmejny chcedźa za čas twarskich dźěłow w bywšej Budyskej powołanskej šuli na Lubijskej dróze wuwučować. Za to je gmejna wotnajenske zrěčenje z krajnoradnym zarjadom wotzamknyła, kotrež płaći hač do awgusta 2022. Tak dołho maja dźěła na zakładnej šuli trać. Kubšiski wjesnjanosta Olaf Reichert (njestronjan) wšak so nadźija, so budźe wšitko tola hižo trochu prjedy hotowe, snano hižo k šulskemu połlětu 2021/2022. Tohodla su transportne zrěčenje z firmu Regio-bus najprjedy raz jenož hač do februara 2022 wotzamknyli, móža pak je opcionalnje podlěšić.
W Bošečanskej zakładnej šuli wuknje něhdźe 100 holcow a hólcow. Tohodla stej stajnje dwaj busaj trěbnej. Cyłkowne wudawki za šulerski transport płaća Kubšisku gmejnu nimale 50 000 eurow.
Křižerjo křiž zhromadnje zapłaćili
Mosćiki móža planować
Radźićeljo financowanskemu zrěčenju z LMBV přihłosowali
Łaz (AK/SN). Za wožiwjenje Hórnikečanskeho jězora je Łazowska gmejna dalše wuhibki stajiła. Na swojim zašłym posedźenju přihłosowachu jeje radźićeljo financowanskemu zrěčenju za infrastrukturu planowaneho towarstwoweho centruma, hdźež maja mjez druhim płuwace mosćiki nastać.
Cyłkowny projekt běchu hižo před lětom Sakskemu wyšemu hórnistwowemu zarjadej w Freibergu zapodali, zo móhli jón do spěchowanskich programow zapřijeć. Loni w oktobru pak gmejna Łaz prošeše, płuwace mosćiki wuspinkować. Na te wašnje móža je hižo prjedy zwoprawdźić, wjesnjanosta Thomas Leberecht (CDU) nětko rozłoži. Swójski podźěl gmejny we wobjimje 15 procentow, to je něhdźe 11 000 eurow, je w hospodarskim planje za lěto 2021 zapřijaty. Tak móža mosćiki hižo planować započeć.
Policija (25.06.20)
Pedalej zaměniła
Kamjenc. Při wuparkowanju na Njebjelčanskej dróze je předwčerawšim w Kamjencu 77lětna wodźerka VWja město spinadła na płun stupiła. Jeje awto zrazy na to do Opela a suny jón dźesać metrow dale, hdźež steješe 76lětna pěška. Wona so při tym ćežko zrani, zo dyrbjachu ju do chorownje dowjezć.
Angažuje so za kulturu a tradicije
Wot awgusta 2018 počesći Budyski wokrjes angažowane wosobiny z wuznamjenjenjom „Čestnohamtski měsaca“. Na te wašnje dźakowachu so nětko we Wojerecach Gabrieli Linakowej za jeje skutkowanje na dobro serbstwa.
Wojerecy (SN). Hajenje serbskeje ludoweje kultury kaž tež zachowanje a nałožowanje serbskeje rěče je za přichodne generacije wosebity nadawk wobydlerskeho angažementa. Tutón nadawk njezdokonja drje we Wojerecach nichtó lěpje hač Gabriela Linakowa.
Jako sobuskutkowaca w předsydstwje 1997 załoženeje Serbskeje rejwanskeje skupiny Ćisk planuje wona programy towarstwa, zdobom rejuje sama sobu a moderěruje wustupy w tu- a wukraju. Na swojorazne a amizantne wašnje powěda Gabriela Linakowa publikumej anekdoty a podawa zajimawe dohlady do wuwića rejowanskeje skupiny.
