Čas čakanja dale porjeńšeny
Žane překročenja
Plusnikecy (SN/JaW). Z Plusnikečanskeje (Pließkowitz) skały žane nadměrne poćežowanje powětra z drobnym prochom za Malešansku gmejnu a blisku bydlensku štwórć w Budyšinku njewuchadźa. To zdźěli wčera sakski wobswětowy zarjad. Zdobom wozjewi swoju zakónčacu rozprawu wo měrjenjach drobnoprocha z Plusnikečanskeje skały.
Kaž ze spisa wuchadźa, „njejsu hódnoty žane z postajenych hranicow za drobny proch PM10 překročili“. Měrili su, wjacorych skóržbow wobydlerjow dla, wot lońšeho 1. oktobra hač do lětušeho 30. septembra. Kaž zarjad dale informuje, „wučinja lětna srjedźna hódnota za drobnoproch 13,3 mikrogramy na kubikny meter powětra a leži tuž daloko pod hranicu 40 mikrogramow na kubikny meter“. Zdobom wobswětowy zarjad na to skedźbnja, zo su na bliskich měrjenskich stacijach w Budyšinje z 12,5 mikrogramami a w Niskej z 13,3 µg na kubikny meter powětra podobne hódnoty naměrili.
Dnjowa hranica za drobnoproch wučinja 50 mikrogramow na kubikny meter powětra a smě maksimalnje 35 dnjow w běhu jednoho lěta překročena być. W Plusnikecach bu wona jenički dźeń, 28. měrca 2020, překročena.
Webstrona ma klětu hotowa być (20)
Idejowe wubědźowanje sakskeho fondsa „Čiń sobu!“ je we wosebitej kategoriji „Žiwa dwurěčnosć“ znowa tworićelskosć na dobro našeje maćeršćiny pozbudźiło. Serbske Nowiny tule rjad drobnych a małych projektow w serialu předstajeja.
Zwjazać dotalne informacije wo serbskej katolskej narodnej drasće na zhromadnej internetnej stronje je wotpohlad Kamjenskeje župy „Michał Hórnik“ a hotowarničow. Wosebje dźe wo swjedźensku drastu, kaž so ju na přikład njewjesty, słónki a družki w Kamjenskej župje hotuja. Zapřijeć chcedźa tež drastu z dalšich wosadow, kaž z Radworskeje a Kulowskeje.
Krótkopowěsće (02.12.20)
Wulka ličba zemrětych
Budyšin. 25 smjertnych padow w zwisku z koronu w běhu 24 hodźin zličichu wčera we wokrjesomaj Budyšin a Zhorjelc. Cyłkownu ličbu w Sakskej podachu z 45. W Budyskim wokrjesu zwěsćichu 132 nowych natyknjenjow, w Zhorjelskim 192. Kaž Budyski krajnoradny zarjad dale zdźěli, je pomoc Zwjazkoweje wobory w hladarnjach starych, tak w Kulowje, Chrósćicach a Łazu, zakónčena.
Iniciatiwa nětko towarstwo
Radwor. Na digitalnej zhromadźiznje załoži 15 staršich wčera towarstwo Staršiska iniciatiwa Radwor. Přichodnej dwě lěće nawjedujetaj je Katrin Suchec-Dźisławkowa a Wito Bejmak. Zaměr je podpěra kubłanišćam w Radworskej gmejnje při zawěsćenju serbskorěčneho a do přichoda wusměrjeneho kubłanja. Towarstwo přihotuje tež přistup k Budyskej župje „Jan Arnošt Smoler“.
Połdigitalne posedźenje
Spožčeja kniham druhe žiwjenje
Kamjenc (SN/MWj). Što činiš poprawom ze starymi a hižo njenahladnymi knihami? Najjednoriše je, hdyž je do stareje papjery daš, přetož najwjetši dźěl knihow njejsu někajke luksusowe twory, ale móžeš je jenož krótki čas wužiwać. Po wšěm swěće kóžde 30 sekundow jednu publikaciju ćišća. W Němskej wuchadźa kóžde lěto něhdźe 80 000 titlow. Wulki dźěl z nich móžeš sej w bibliotekach wupožčić. Ale jónu dyrbja je zaso raz wuběrać. Přetož nadawk zjawnych bibliotekow njeje, knihi zběrać, ale aktualne medije poskićeć.
Poradźuje při telefonje
Pančicy-Kukow. Přiwótřenych koronowych postajenjow dla so w zarjadniskim zwjazku Při Klóšterskej wodźe tuchwilu žane wosobinske rěčne hodźiny změrca njewotměja. Za to pak poskićuje Eduard Luhmann telefoniske rěčne hodźiny, a to pod telefonowym čisłom 035796/ 946 117. W decembru su slědowace terminy stajne wot 16 do 18 hodź. předwidźane: wutoru 8. a 15. decembra kaž tež štwórtk, 10. a 17. decembra.
Wšědnje woknješko wočinić
Budyšin. Wot dźensnišeho je adwentny online-kalender literarneho konopeja přistupny, a to jako žortna grafika Štefana Hanuša. Lětsa njechowaja so za woknješkami jenož literarne teksty, ale tež natočenja a wideja z wubranymi chłóšćenkami serbskeje literatury, hudźby a samo reje. Słyšeć su mjez druhim Gabriela Marija Šmajdźina, Měrana Cušcyna na Jurji Koch. Kalender namakaće pod http://www.literarny-konopej.de/kalender/2020. Přidata je dale informacija, hdźe je kniha abo CD w poskitku.
Nowy centrum budźe dróši
Rozmysluja wo powjetšenju Koprčanskeje wodočisćernje
Bukecy (CS/SN). Ze změnjenym naćiskom za nowotwar kulturneho a zetkawanskeho centruma w Rodecach (Rodewitz) su so čłonojo Bukečanskeje gmejnskeje rady na swojim zašłym posedźenju zaběrali. Wotpowědne podłožki je jim Budyski planowar Falko Hinz rozłožił, po tym zo běchu radźićeljo wjacore změny namjetowali. Nimo toho běchu so porno prěnim planam twarske płaćizny změnili. Kaž Falko Hinz rjekny, móže wón tuchwilu kóšty jenož trochować, dokładne wobličenje ma klětu kónc januara předležeć. Hižo nětko pak je jasne, zo spočatnje planowane 1,4 miliony eurow dawno njedosahaja. Tuchwilu liča z něhdźe 2,1 milionom eurow. Dalše změny su hižo nětko wotwidźeć, dokelž so tež koronowa pandemija na twarske płaćizny wuskutkuje.
Policija (01.12.20)
Zasadźenje na awtodróze
Wóspork. Policajskeho zasadźenja dla bě wčera rano awtodróha A 4 pola Wósporka dwě hodźinje zawrjena. Tam spyta policija wodźerja Renaulta zadźeržeć, dokelž wón njewěsće jědźeše. 44lětny zrazy najprjedy do praweho wobhrodźenja a potom dale jědźeše. Skónčnje jeho tola zadźeržachu. Muž pak wulěze a chcyše na napřećiwnu jězdnju hić. Na to jeho sputachu a do chorownje dowjezechu.
Filigrane dźěło jeho wupjelnja
Hórki (aha/SN). Hač do wuměnkarskeje staroby bě dźensa 79lětny Hórčan Bernhard Vcelich za wodźidłom wulkich nakładnych awtow po puću. Při nakładowanju a wotkładowanju kaž tež při trěbnych reparaturach mašinow bě stajnje ćežkemu ćělnemu dźěłu wustajeny. To je sylneho, wulkeho muža formowało. Čłowjek njeby wěrił, zo je so docpěwši rentnarsku starobu wěnował dospołnje hinašemu dźěłu. Ze swojimaj wulkimaj rukomaj zamóže so filigranemu wužadanju stajić a twari Bože narodki, pyramidy a swěčkate wobłuki. Lubosć dźěłać z drjewom a trěbne kmanosće za to je sej hižo wjele zašo přiswojił.
